މި މަހުގެ 11 ވަނަ ދުވަހު އެމޭޒަން ޕްރައިމްގައި ޕްރީމިއާކުރަން ނިންމާފައިވާ ފިލްމު "ޗޯރީ 2"ގެ ޓްރެއިލާ ދައްކާލައިފިއެވެ. ބަތަލާ ނުޝްރަތު ބަރޫޗާގެ ކެރިއަރުގެ އެންމެ މަގުބޫލު ފިލްމު ކަމަށްވާ "ޗޯރީ 2" އަކީ ޓީ-ސީރީސް ފިލްމްސްއިން އެމޭޒަން ޕްރައިމްއިން ޑިސްޓްރިބިއުޓް ކުރާގޮތަށް އުފައްދާފައިވާ ފިލްމެކެވެ. ބުޝަން ކުމާރު ޕްރޮޑިއުސްކޮށް ވިޝާލް ފޫރިއާ ޑައިރެކްޓްކޮށްފައިވާ މި ފިލްމަކީ 2021ވަނަ އަހަރު އެމޭޒަން ޕްރައިމްގައި ޕްރީމިއަކުރި ފިލްމު "ޗޯރީ"ގެ ދެވަނަ ފިލްމެވެ. ނުޝްރަތު މާބަނޑު އަންހެނެއްގެ ރޯލްއިން ފެންނަ މި ފިލްމަކީ ބިރުވެރި ހާދިސާތަކެއް ދައްކުވައިދޭ ފިލްމެކެވެ. ފިލްމު "ޗޯރީ 2"ގައި ނުޝްރަތު މަސައްކަތް ކުރާނީ އަލަތު އަންހެން ދަރިފުޅު މަރާލަން އުޅޭ ރޫހާނީ އަންހެނެއްގެ ކިބައިން ސަލާމަތް ކުރުމަށެވެ. ފިލްމު "ޗީރީ 2"ގެ ޕޯސްޓަރެއް--ފޮޓޯ/ފޭސްބުކް ބިރުވެރި ސިފައެއްގައި ފެންނަ މި އަންހެންމީހާގެ ރޯލް ފިލްމުގައި ކުޅެނީ ބަތަލާ ސޮހާ އަލީ ޚާންއެވެ. މިއީ ވަރަށް ގިނަ ދުވަސްތަކަކަށްފަހު ސޮހާގެ ފިލްމެއް ބެލުންތެރިންނަށް ފެންނާނެ ފަހަރެކެވެ. ގިނަ ދުވަސްތަކަކަށްފަހު ސޮހާ ފިލްމަކުން ފެނުމުން ވަރަށް ގިނަ ބެލުންތެރިން ވަނީ އެކަމަށް މަރުހަބާ ކިޔާފައެވެ. ފިލްމުގެ ޓްރެއިލާއިން ވެސް ސޮހާ ފިލްމުގައި ކުޅެފައިވާ ކެރެކްޓާ ފުރިހަމަކޮށްދޭނެ މިންވަރު ހާމަވި ކަމަށް ޓްރެއިލާ ބެލުމަށްފަހު ބައެއް ބެލުންތެރިން ވަނީ ބުނެފައެވެ. ފިލްމު "ޗޯރީ" އަދި "ޗޯރީ 2" އަކީ ނުޝްރަތުގެ ކެރިއަރުގައި ވަރަށް ބުރަކޮށް ބަތަލާ މަސައްކަތްކުރި ފިލްމެއް ކަމަށް ނުޝްރަތާ ހަވާލާދީ ރިޕޯޓުތައް ބުނެއެވެ. ފިލްމު "ޕިޔާރު ކާ ޕަންޗްނާމާ"، "ސޯނޫ ކޭ ޓީޓޫ ކީ ސްވިޓީ"، "ރާމް ސެޓޫ" އަދި "އަކޭލީ" ފަދަ ފިލްމުތައް ކުޅެފައިވާ ބަތަލާއަކީ ބޮލީވުޑްގެ އެންމެ އުއްމީދީ ބަތަލާއިންގެތެރޭ ހިމެނޭ ފިލްމީ ތަރިއެކެވެ.