ގުޅީގެ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަސައްކަތް އެމްޓީސީސީން ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެއް ފުއްދުމުގެ ގޮތުން، ކ. ގުޅީގެ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ފަށައިފިއެވެ.
މި މަޝްރޫޢުގެ ދަށުން ހިއްކުމަށް ހަމަޖެހިފައިވަނީ 10.15 ހެކްޓަރުގެ ބިމެކެވެ. މިއީ މިހާރު ގުޅީގައި އޮތް ބިމުގެ ސައިޒު 2 ގުނައަށް އިތުރުވާނެ މިންވަރެކެވެ. މީގެ އިތުރުން މި މަޝްރޫޢުގެ ދަށުން 940 މީޓަރުގެ ހިލަ ރިވެޓްމަންޓް، 362 މީޓަރުގެ ޖީއޯބޭގް ރިވެޓްމަންޓް އަދި 88 މީޓަރުގެ ގޮރޮއިން ޖެހުމުގެ މަސައްކަތްވެސް ކުރިއަށް ގެންދިއުމަށް ވަނީ ހަމަޖެހިފައެވެ.
މި މަސައްކަތަކީ 2023 ވަނަ އަހަރުގެ މާރޗް މަހުގައި އެމްޓީސީސީއާ ހަވާލުކުރެވުނު މަސައްކަތެއް ނަމަވެސް، އެކި ސަބަބުތަކާހުރެ މިހާތަނަށް މަސައްކަތް ފެށިފައެއް ނުވެއެވެ. ނަމަވެސް މިހާރު މަސައްކަތް ފެށިފައިވަނީ އެމްޓީސީސީގެ ސީއީއޯ އަޙްމަދު ސަޢުދުގެ އިސްނެގުމުގައި، ރައީސް މުޢިއްޒުގެ ޚާއްސަ އިރުޝާދުގެ ދަށުންނެވެ.
ރައީސް މުޢިއްޒު ވަނީ ގުޅީގެ ރައްޔިތުންނަށް "ބަންޑް ވޯލް ޖަހައި، ފަސްއަޅައި ނިމެންދެން މަޝްރޫޢު ނުހުއްޓޭނެ" ކަމުގެ ޔަޤީންކަން ދެއްވާފައެވެ. މި މަޝްރޫޢު ނިމުމުން ގުޅީގެ ރައްޔިތުންނަށް އިތުރު ތަރައްޤީގެ ފުރުސަތުތަކެއް ހުޅުވިގެންދާނެ ކަމަށް ބެލެވެއެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ