ޕްރޮޑިއުސަރު ކަރަން ޖޯހަރުގެ ދަރުމާ ޕްރޮޑަކްޝަންއިން މި އަހަރު ރިލީޒްކުރާނެ އެންމެ އުއްމީދީ ފިލްމު ކަމަށްވާ "ކޭސަރީ 2"ގެ ޓްރެއިލާ ދައްކާލައިފިއެވެ. އިނގިރޭސީންގެ އަޅުވެތިކަމުގެ ދަށުގައި އިންޑިއާ އޮތް ދުވަސްވަރު ހިންގާފައިވާ ގަތުލުއާންމާ ދެކޮޅަށް ހިނގާފައިވާ ކޯޓު ކޭސްއަކަށް ބިނާކޮށް އުފައްދާފައިވާ "ކޭސަރީ ޗެޕްޓާ 2"ގެ ޓްރެއިލާ ބެލުމަށްފަހު އަކްޝޭ ކުމާރު، އާރް މާދަވަން އަދި ބަތަލާ އަނަނިޔާއަށް ބެލުންތެރިންގެ ތައުރީފު އަންނަނީ އޮހެމުންނެވެ. މި ފިލްމުގެ ޓްރެއިލާ ބަލަމުން ދިޔައިރު ގައިން ހީބިހި ނަގައިގެންދާ ފަދަ މަންޒަރުތަކެއް ފެނުނު ކަމަށް ބައެއް ބެލުންތެރިން ވަނީ ބުނެފައެވެ. މި ފިލްމަކީ އިނގިރޭސީންގެ އަޅުވެތިކަމުގެ ދަށުގައި އިންޑިއާ އޮތް ދުވަސްވަރާ އެކު އެ ޤައުމުގެ ތާރީޚުގައި ހިނގި އެންމެ އަނދިރި ސޮފްޙާތައް ކަމުން ފިލްމު ބެލުމުގެ ޝައުގުވެރިކަން ވަރަށް ބޮޑަށް އެބައޮތްކަމަށް ބެލުންތެރިން ވަނީ ބުނެފައެވެ. ފިލްމު 'ކޭސަރީ ޗެޕްޓާ 2"ގެ މުހިއްމު ތިން ތަރިން ކަމަށްވާ އާރް މާދަވަން، އަނަނިޔާ ޕާންޑޭ އަދި އަކްޝޭ ކުމާރު--ފޮޓޯ/އީޓީވީބާރަތު ފިލްމުގައި ވަކީލެއްގެ ރޯލް ކުޅެފައިވާ އަކްޝޭ ކުމާރު އަނެއްކާވެސް ސާބިތުކޮށްދިނީ އަކްޝޭގެ މި ފިލްމުން ބެލުންތެރިން މާޔޫސްނުވާނެ ކަމަށް ކަމުގައި ޓްރެއިލާ ބެލުމަށްފަހު ބެލުންތެރިޔަކު ވަނީ ކޮމެންޓުކޮށްފައެވެ. އަކްޝޭ ކުޅެފައި ވަނީ އިނގިރޭސީންނާ ދެކޮޅަށް ވަކާލާތު ކުރުމުގައި އިސްކޮށްހުރި ސީ ޝަންކަރަން ނާރަޔަންގެ ރޯލެވެ. ސީ ޝަންކަރަން ނާރަޔަން އަކީ އިންޑިއާގެ ތާރީޚުގައި ޤައުމީ ބަތަލެއްގެ ގޮތުގައި ސިފަކޮށްފައިވާ ޝަހުސިއްޔަތެކެވެ. ބެލުންތެރިންގެ ގިނަ ބަޔަކު ވަރަށް ބޮޑަށް ފާޑުކިޔާ ޒުވާން ބަތަލާ އަނަނިޔާ ޕާންޑޭ ފިލްމުގައި ފެންނަ ގޮތުގެ ޕޯސްޓަރު ތަންކޮޅެއް ކުރިން ރިލީޒް ކުރުމާ އެކު ބަތަލާގެ ލުކްއަށް ވެސް ވަރަށް ގިނަ ބަޔަކު ވަނީ ތައުރީފުކޮށްފައެވެ. މިފަދަ ރޯލްތަކަކީ އަކްޝޭ ކުމާރު އަދި ބަތަލާ އަނަނިޔާއަށް އެންމެ ފިޓު ރޯލްތައް ކަމަށާއި ފިލްމު "ކޭސަރީ 2" އުފައްދާކަން އިއުލާނުކުރި އިރު މި ފިލްމު ގެނެސްދޭނީ މިހާ ބޮޑު ފިލްމެއްގެ ގޮތުގައި ގަބޫލު ނުކުރެވޭ ކަމަށް ވަރަށް ގިނަ ބަޔަކު ވަނީ ބުނެފައެވެ. ހެއްވާ މަޖާ ރޯލްތައް ދޫކޮށް އަކްޝޭ މިފަދަ ސީރިއަސް ރޯލްތައް ކުޅެން ބެލުންތެރިން ވަނީ ޑިމާންޑުކޮށްފައެވެ. ކަރަން ސިންގް ތިއާގީ ޑައިރެކްޓްކޮށްފައިވާ މި ފިލްމު ސިނަމާތަކަށް ގެންނާނީ މި މަހުގެ 18 ވަނަ ދުވަހުއެވެ.