އެމެރިކާ އާއި އިޒްރޭލުން ހަފުތާތަކެއް ވަންދެން ދެމުންދާ ހަމަލާތަކަށް ފަހު، އީރާނުގެ ވެރިކަމުގެ ނިޒާމު އަދިވެސް އޮތީ ސަލާމަތުން ކަމަށާއި، ނަމަވެސް ބޮޑު ބައެއް ބަލިކަށިވެފައިވާ ކަމަށް އެމެރިކާގެ އެންމެ އިސް އިންޓެލިޖެންސް އޮފިޝަލް އިއްޔެ ވިދާޅުވެއްޖެ އެވެ.
އޭނާ މިހެން ވިދާޅުވީ ހަނގުރާމަ ކުރަން ނިންމި ސަބަބުތަކާ ގުޅޭ ގޮތުން ގާނޫނު ހަދާ މަޖިލީހުގެ މެންބަރުންގެ ފާޑުކިޔުންތަކާއި ސުވާލުތައް ސީނިއާ އޮފިޝަލުންނަށް އަމާޒުވެފައިވާ ދަނޑިވަޅެއްގަ އެވެ.
ޑައިރެކްޓަރު އޮފް ނޭޝަނަލް އިންޓެލިޖެންސް ތުލްސީ ގަބާޑް ކޮންގްރެސްގެ އަޑުއެހުމެއްގައި ވިދާޅުވީ، އީރާނުގެ ލީޑަޝިޕަށާއި އަސްކަރިއްޔާއަށް ދިން ހަމަލާތަކުގެ ސަބަބުން އެ ގައުމުގެ ގާބިލުކަން ވަރަށް ބޮޑަށް ހީނަރުވެފައިވާ ކަމަށެވެ.
"އިންޓެލިޖެންސް ކޮމިއުނިޓީން އަންދާޒާކުރާ ގޮތުގައި އީރާނުގެ ނިޒާމު ފެންނަނީ ސަލާމަތުން އޮތް ތަން. ނަމަވެސް ބޮޑު ބައެއް ވަނީ ބަލިކަށިވެފައި،" އޭނާ ވިދާޅުވި އެވެ.
މި ހަނގުރާމަ ފެށުނު ފަހުން ބޭއްވި ފުރަތަމަ އާންމު އިންޓެލިޖެންސް ބްރީފިން ކުރިއަށްދިޔައީ، އީރާނުގެ ފަރާތުން އެމެރިކާއަށް ވަގުތުން ކުރިމަތިވެދާނެ ނުރައްކަލެއް ނެތް ކަމަށް ވިދާޅުވެ، ކައުންޓަޓެރަރިޒަމްގެ ވެރިޔާ ޖޯ ކެންޓް އިސްތިއުފާ ދެއްވިތާ އެއް ދުވަސް ފަހުންނެވެ.
ހަނގުރާމައިގެ ކުރިން އީރާނަކީ ވަގުތުން ކުރިމަތިވެދާނެ ނުރައްކަލެއްގެ ގޮތުގައި ބެލެވުނުތޯ ކަށަވަރުކޮށްދެއްވަން ގަބާޑް އިންކާރު ކުރެއްވި އެވެ.
"ވަގުތުން ކުރިމަތިވެދާނެ ނުރައްކަލަކީ ކޮބައިކަމާއި ނޫންކަން ކަނޑައެޅޭނެ ހަމައެކަނި މީހަކީ ރައީސް،" އޭނާ ވިދާޅުވި އެވެ.
ސީއައިއޭގެ ޑައިރެކްޓަރު ޖޯން ރެޓްކްލިފް، ކެންޓްގެ އަންދާޒާއާ ދެކޮޅު ހައްދަވައި، ގާނޫނު ހަދާ މަޖިލީހުގެ މެންބަރުންނަށް ވިދާޅުވީ އީރާނަކީ ދާއިމީ ނުރައްކަލެއް ކަމަށާއި، ހަނގުރާމަ ފެށިއިރު އެއީ ވަގުތުން ކުރިމަތިވެދާނެ ނުރައްކަލެއް ކަމަށެވެ.
ހޮރްމޫޒް ކަނޑުއޮޅީގެ ދަތުރުފަތުރަށް ބުރޫއަރާނެ ކަމަށް އެމެރިކާއިން ލަފާކޮށްފައިވާކަން ވެސް އޮފިޝަލުން ކަށަވަރުކޮށްދެއްވި އެވެ. ގަބާޑް ފާހަގަކުރެއްވި ގޮތުގައި، އީރާނުން އެ މުހިންމު ކަނޑުގެ މަގު ކޮންޓްރޯލް ކުރަން މަސައްކަތް ކުރާނެ ކަމަށް ބެލެވޭ ޒަމާންވީ އަންދާޒާއެއް އޮވެ އެވެ. ރެޓްކްލިފް އިތުރަށް ވިދާޅުވީ، ސަރަހައްދުގެ ހަކަތަ އުފައްދާ ތަންތަނުގައި ހުރި އެމެރިކާގެ މަސްލަހަތުތަކަށް އީރާނުން ދީފާނެ ހަމަލާތަކަށް ތައްޔާރުވެފައިވާ ކަމަށެވެ.
ދެ ޕާޓީގެ މެންބަރުން ވެސް ވަނީ ސަރުކާރުން ހަނގުރާމައަށް އާދެވުނު ސަބަބު އެކަށީގެންވާ ގޮތެއްގައި ސާފުކޮށްދީފައިވޭތޯ ސުވާލު އުފައްދާފަ އެވެ. ސެނެޓަރު މާކް ވާނާ ވިދާޅުވި ގޮތުގައި، ގަބާޑްގެ ވާހަކައިން ބައެއް ކަންކަން އުނިކޮށްފައިވަނީ، އީރާނުގެ ނިއުކްލިއާ އުންމީދުތަކާ ގުޅޭ ގޮތުން ރައީސް ޑޮނަލްޑް ޓްރަމްޕް ކުރައްވާ ދައުވާތަކާ ފުށުނާރާނެ ގޮތް ހެދުމަށެވެ.