އިންޑިއާގެ ވެސްޓް ބެންގަލްއިން މިހާތަނަށް ފެނިފައިވަނީ ނިޕާ ވައިރަސްގެ އެންމެ ދެ ކޭސް ކަމަށާއި، އެޅި ވަރުގަދަ ފިޔަވަޅުތަކާއެކު ބަލި ފެތުރުން މިހާރު ކޮންޓްރޯލް ކުރެވިފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފިއެވެ. އިންޑިއާގެ ސިއްހީ ވުޒާރާއިން ރޭ ނެރުނު ބަޔާނެއްގައި ބުނީ، ބަލި ފެނުމާއެކު ސަވައިލެންސާއި ލެބޯޓްރީ ޓެސްޓުތަކުގެ އިތުރުން ފީލްޑް އިންވެސްޓިގޭޝަންތައް ވަރުގަދަކޮށް، ބަލި އިތުރަށް ފެތުރުނަ ނުދީ ވަނީ ހިފަހައްޓާފައި ކަމަށެވެ. މި ބަލި ޖެހުނު ދެ މީހުންނާ ކޮންޓެކްޓްވި ކަމަށް ބެލެވޭ 196 މީހަކު ދެނެގަނެ، އެ މީހުން ކަރަންޓީނުކޮށް ހެދި ޓެސްޓުތަކުން އެ އެންމެން ބައްޔަށް ނެގެޓިވްވެފައިވާކަން މިނިސްޓްރީން ވަނީ ކަށަވަރުކޮށްދީފައެވެ. https://sun.mv/217225 "ހާލަތު މި އަންނަނީ ހުއްޓުމެއް ނެތި ގާތުން މޮނިޓަކުރަމުން. އަދި އާންމު ސިއްހަތުގެ ރައްކާތެރިކަމަށް އަޅަންޖެހޭ ފިޔަވަޅުތައް ވަނީ އަޅާފައި،" މިނިސްޓްރީގެ ބަޔާނުގައިވެއެވެ. ނިޕާ ވައިރަހަކީ ޖަނަވާރުންގެ ގައިން، ވަކިން ހާއްސަކޮށް "ފްރުޓް ބެޓް" ނުވަތަ ވާލުގެ ޒަރީއާއިން އިންސާނުންނަށް އަރާ ފުރާނައަށް ނުރައްކާތެރި ވައިރަހެކެވެ. މި ބައްޔަށް މިހާތަނަށް އެއްވެސް ވެކްސިނެއް ހޯދިފައެއް ނުވެއެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހާމަކުރާ ގޮތުގައި، މި ބަލި ޖެހޭ މީހުންގެ ތެރެއިން 40 އިންސައްތައާއި 75 އިންސައްތައާ ދެމެދުގެ އަދަދެއް މަރުވުމުގެ ބިރު އޮވެއެވެ. އިންޑިއާގައި އެންމެ ފުރަތަމަ ނިޕާ ވައިރަސް ފެނިފައިވަނީ 2001 ވަނަ އަހަރު މިހާރު ބަލި ފެނުނު ވެސްޓް ބެންގަލްއިންނެވެ. އޭގެ ފަހުން 2018 ވަނަ އަހަރު ކެރެލާ ސްޓޭޓުން މި ބަލި ފެނި 17 މީހަކު މަރުވިއިރު، 2023 ވަނަ އަހަރުވެސް އެ ސްޓޭޓުން މި ބަލި ޖެހިގެން ދެ މީހަކު މަރުވެފައިވެއެވެ. ނިޕާ ވައިރަސް އެންމެ ފުރަތަމަ ދުނިޔެއިން ފެނުނީ 1998 ވަނަ އަހަރު މެލޭޝިއާގެ އޫރު ގެންގުޅޭ ބައެއްގެ ތެރެއިންނެވެ. މި ބަލީގެ އަލާމާތްތަކުގެ ތެރޭގައި ގަދައަށް ހުން އައުމާއި، ނޭވާލާން އުނދަގޫވުމާއި، ބޮޑުވަރުވާ ހާލަތްތަކުގައި ފިޓް ޖެހުމާއި ސިކުނޑި ދުޅަވެ ކޯމާއަށް ދިއުން ފަދަ ކަންކަން ހިމެނެއެވެ.