އަގު ހެޔޮ ފްލެޓް އިމާރާތްކުރުމަށް ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް) އިން އުފައްދާފައިވާ އެފޯޑަބަލް ހޯމް ލީސިން ކުންފުނިން 5 މަޝްރޫއެއްގެ އަމަލީ މަސައްކަތް މިއަދު ފަށައިފި އެވެ.މި މަޝްރޫއުތަކުގެ މަސައްކަތްތައް ފަށާފައި ވަނީ މިއަދު ހުޅުމާލޭގައި ބޭއްވި ރަސްމިއްޔާތެއްގަ އެވެ.ބީއެމްއެލްގެ އަގުހެޔޮ ފްލެޓް އިމާރާތް ކުރުމުގެ މަޝްރޫއުގެ ދެ ޓަވަރެއްގެ މަސައްކަތް މީގެ ކުރިން ވަނީ ރާއްޖޭގައި ބޮޑެތި ބައެއް މަޝްރޫއުތައް ހިންގަމުން އަންނަ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ޗައިނާ މެޝިނަރީ އިންޖީނިއަރިން ކޯޕަރޭޝަން (ސީއެމްއީސީ) އާ ވެސް ހަވާލުކޮށްފަ އެވެ.ބީއެމްއެލް އިން މިއަދު ބުނީ،  މޯލްޑިވްސް މަނިޓަރީ އޮތޯރިޓީ(އެމްއެމްއޭ)އިން އެކުލަވާލާފައިވާ އިންކްލޫސިވް ނޭޝަނަލް އެފޯޑަބަލް ހައުސިން (އައިއެންއޭއެޗް)ގެ ދަށުން ކަނޑައަޅާފައިވާ މަގުސަދު ހާސިލް ކުރުމަށް އުފެއްދި ބީއެމްއެލް ސަބްސިޑަރީ ކުންފުނިން ރާއްޖޭގެ ތިން ކުންފުންޏަކާ ވެސް މަސައްކަތް ހަވާލު ކޮށްފައިވާ ކަމަށެވެ.އެއީ އެ ބޭންކުން ބުނި ގޮތުގައި، ރާއްޖޭގައި އެންމެ ކާމިޔާބު ކޮންސްޓްރަކްޝަން ކުންފުނިތަކުގެ ތެރޭގައި ހިމެނޭ އަމިން ކޮންސްޓްރަކްޝަނާއި އެފްޑަބްލިއު ކޮންސްޓްރަކްޝަން އަދި އާރުސީސީ އެވެ.މި މަޝްރޫއުތައް ނިމުމުން ހުޅުމާލޭ ފޭސް 1 އަދި ފޭސް 3ގެ އިތުރުން ވިލިމާލޭގައި 3،200އަށް ވުރެ ގިނަ ހައުސިން ޔުނިޓް ކުލި ދައްކައި ހަލާސްކުރުމުން މިލްކުވާ ގޮތަށް، ނިސްބަތުން ކުޑަ ކުއްޔެއްގައި ދޫކުރާނެ އެވެ.