ކުރިން މި މަހުގެ 19 ވަނަ ދުވަހު ސިނަމާތަކަށް ގެންނަން ތާވަލުކުރި ފިލްމު "ޓޮކްސިކް: އަ ފެއަރީ ޓޭލް ފޯ ގްރޯން އަޕްސް" ރިލީޒްކުރުން ފަސްކޮށްފިއެވެ. މި ފިލްމުގެ ޓީމުން އިއްޔެގެ ވަގުތެއްގައި ނެރުނު ބަޔާނުގައި ބުނެފައި ވަނީ، ފިލްމު "ޓޮކްސިކް" އަކީ އިންޑިއާގެ އިތުރުން ގްލޯބަލް އޯޑިއަންސަށް ވެސް އަމާޒުކޮށް އުފެއްދި ފިލްމެއް ކަމަށާއި ނަމަވެސް މާޗް މަހުގެ 19 ވަނަ ދުވަހު ފިލްމު ރިލީޒްކޮށްފި ނަމަ އިންޑިއާއިން ބޭރުގައި ތިބި އޯޑިއަންސަށް ފިލްމު ބެލުމުގެ ފުރުސަތު ނުލިބިދާނެ ކަމުގެ ބިރު އެބައޮތް ކަމަށެވެ. ކަންނާޑާ އެކްޓަރު ޔަޝް ލީޑް ރޯލް ކުޅެފައިވާ "ޓޮކްސިކް" އަކީ ކަންނާޑާ ބަހުންނާއި އިނގިރޭސި ބަހުން ގެނެސްދޭ ފިލްމެއް ކަމަށާއި އިނގިރޭސި ބަހުން ފިލްމު ގެނެސްދިނުމުގެ އެންމެ މުހިއްމު އެއް ބޭނުމަކީ ވެސް ގްލޯބަލް އޯޑިއަންސާ ފިލްމު ގުޅުވާލަދިނުން ކަމަށް މި ބަޔާނުގައި ވަނީ ބުނެފައެވެ. ފިލްމު "ޓޮކްސިކް"ގެ ޕޯސްޓަރެއް-- ފޮޓޯ/ ފޭސްބުކް ނަމަވެސް މިހާރު މެދުއިރުމަތީގެ މަސްރަހަށް އައިސްފައިވާ ނުތަނަވަސްކަމާ ހެދި އޭގެ ނޭދެވޭ އަސަރު "ޓޮކްސިކް"އަށް އިންތިޒާރުކުރާ އޯޑިއަންސަށް ކޮށްފާނެކަމަށް ބެލެވޭތީ ފިލްމު ރިލީޒްކުރުން މި އަހަރުގެ ޖޫން މަހަށް ފަސްކޮށްފައިވާ ކަމަށް ފިލްމު ގެނެސްދޭ ކޭވީއެން ޕްރޮޑަކްޝަންސްގެ ބަޔާނުގައި ވަނީ ހާމަކޮށްފައެވެ. ފިލްމު ރިލީޒްކުރުން ފަސްކުރެވުނީ އިންޓަނޭޝަނަލް މާކެޓް ހިންގާ ފަރާތްތަކުގެ ލަފައާއި މަޝްވަރާގެ މަތިން ކަމަށާއި "ޓޮކްސިކް" ރިލީޒްކުރާ އާ ތާރީޚެއްގެ ގޮތުގައި ބުނެފައި ވަނީ ޖޫން މަހުގެ ހަތަރު ވަނަ ދުވަހެވެ. ބޮޑު ކާމިޔާބީއެއް ހޯދާފައިވާ ފިލްމު "ކޭޖީއެފް" ސީރީސްގެ އެކްޓަރު ޔަޝްގެ "ޓޮކްސިކް" ރިލީޒްކުރާ ތާރީޚު ފަސްކުރަން ނިންމުމާ ގުޅިގެން އެ ތާރީޚުގައި ރިލީޒްކުރަން ނިންމާފައިވާ ބޮލީވުޑްގެ ފިލްމު "ދުރަންދަރު 2"އާ ވާދަކުރާނެ އިތުރު ފިލްމެއް އަދިއެއް ނެތެވެ. އެހެންވެ ދެ ފިލްމުގެ މެދުގައި ބޮޑު ވާދަވެރިކަމެއް އުފެދޭނެ ކަމަށް ކުރިން ދެކެވުނު ވާހަކަތަކަށް މިހާރު ވަނީ ނިމުން އައިސްފައެވެ. ޖުމްލަ 600 ކްރޯޑު ރުޕީސްގެ ބަޖެޓަކުން އުފައްދާފައިވާ "ޓޮކްސިކް" އަކީ ގީތޫ މޯހަންދާސް ޑައިރެކްޓްކޮށް ވެންކަތު ކޭ، ނާރަޔަން އަދި ޔަޝް ޕްރޮޑިއުސްކޮށް ގެނެސްދޭ ފިލްމެކެވެ. މި ފިލްމުގެ ކާސްޓުގައި ސައުތު ސިނަމާގެ އިތުރުން ބޮލީވުޑްގެ ތަރިން ވެސް ހިމެނެއެވެ. އޭގެ ތެރޭގައި ކިއާރާ އަދުވާނީ، ނަޔަންތާރާ، ހުމާ ގުރައިޝީ، ތާރާ ސުތާރިއާ އަދި ރުކްމިނީ ވަސަންތު ހިމެނެއެވެ.