ވައިގެ މަގުން ރާއްޖެއަށް ކިލޯއަކަށްވުރެ ގިނަ މަސްތުވާތަކެތި އެތެރެކުރި ކަމަށް ތުހުމަތު ކުރެވޭ އިންޑިއާ ދެ މީހުންގެ ވަނަވަރު މިއަދު އާއްމުކޮށްފިއެވެ. މި މައްސަލައާ ގުޅިގެން ހައްޔަރުކޮށްފައި ވަނީ ޖައިނަބު ވާޖިދު ޢަލީ، އިންޑިއާ (25އ) އަދި މުޙައްމަދު ނަވާޒް ދަޔަތަރު، އިންޑިއާ (21އ) އެވެ. ފުލުހުން ހާމަކުރި ގޮތުގައި އިންޑިއާއިން ރާއްޖެ އައި މި ދެ މީހުންނަކީ ކިލޯއަކަށްވުރެ ގިނަ މަސްތުވާތަކެތި ރާއްޖެ އެތެރެކުރިކަމުގެ ތުހުމަތުގައި މޯލްޑިވްސް ކަސްޓަމްސް ސާވިސްއިން ފުލުހުންނާ ހަވާލުކުރި ދެ މީހުންނެވެ. https://sun.mv/218770 މި މައްސަލައާ ގުޅިގެން މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ދެމީހުން ވެސް ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ. ފުލުހުން ބުނީ މި މައްސަލަ ފުލުހުން ތަހުގީގު ކުރަމުންދާ ކަމަށެވެ. ކްރިމިނަލް ކޯޓުގެ އަމުރުން އެނގޭ ގޮތުގައި މި ދެ މީހުންގެ ލަގެޖުން ފެނިފައިވަނީ ހަޝިޝް އޮއިލް ފުޅިތަކެކެވެ. އަދި އެ ދެ މީހުންވެސް ކޯޓުގައިވަނީ ވަކީލުން ބޭނުންވާ ކަމަށް ބުނެފައެވެ. މިއީ މިދިޔަ ހަފުތާ ތެރޭގައި މަސްތުވާތަކެތީގެ މައްސަލަތަކުގައި ހައްޔަރުކުރި އިންޑިޔާގެ ހަތަރުވަނަ މީހާއެވެ. މިދިޔަ ހަފުތާގައި ކުރިން ހައްޔަރު ކުރި މީހުންގެ ލަގެޖުން ގާތްގަނޑަކަށް ހަތް ކިލޯގެ މަސްތުވާތަކެތި ފެނިފައިވެއެވެ.