އެމެރިކާ އަދި އިޒްރޭލާއި އީރާނާ ދެމެދު ކުރިއަށްދާ ހަނގުރާމައިގެ ސަބަބުން ހޮރްމޫޒް ކަނޑުއޮޅި މެދުވެރިކޮށް ތެޔޮ އުފުލުމަށް ހުރަސްތަކެއް ކުރިމަތިވެފައިވާތީ، ކުވެއިތު ޕެޓްރޯލިއަމް ކޯޕަރޭޝަން (ކޭޕީސީ) އިން ތެޔޮ އުފައްދާ މިންވަރު މަދުކުރަން ފަށައިފި އެވެ.
މި ހަމަނުޖެހުންތަކާ ގުޅިގެން، ދުނިޔޭގެ ބާޒާރަށް ސަޕްލައިކުރާ ތެލާއި ގުދުރަތީ ގޭހުގެ ގާތްގަނޑަކަށް %20 ހިއްސާކުރާ މުހިންމު ކަނޑުއޮޅި ބަންދުވެފައި އޮންނާތާ މިއަދަށް މިއީ ވިދިވިދިގެން 8 ވަނަ ދުވަހެވެ. މި ދަތިތަކާ ގުޅިގެން އިރާގާއި ގަތަރުން ވެސް ވަނީ ތެލާއި ގޭސް އުފައްދާ މިންވަރު މަދުކޮށްފަ އެވެ.
ރޮއިޓާސްއަށް ލިބިފައިވާ ކޭޕީސީގެ ވިޔަފާރި ނޯޓިސްއެއްގައި ބުނެފައިވަނީ، ސަރަހައްދީ ސަލާމަތީ ނުރައްކާތަކާ ގުޅިގެން ކުރޫޑް އޮއިލް އުފެއްދުމާއި ސާފުކުރާ މިންވަރު ދަށްކޮށްފައިވާ ކަމަށެވެ. ފެބްރުއަރީ މަހު ކުވެއިތުން ދުވާލަކު ގާތްގަނޑަކަށް 2.6 މިލިއަން ފީފާގެ ކުރޫޑް އޮއިލް އުފައްދާފައިވީ ނަމަވެސް، މިހާރު މަދުކުރި މިންވަރު އެ ކުންފުނިން ހާމަކޮށްފައެއް ނުވެ އެވެ.
ކޭޕީސީން ބުނި ގޮތުގައި، މި ނިންމުމަކީ ރައްކާތެރިކަމުގެ ފިޔަވަޅެއްގެ ގޮތުން ނިންމި ނިންމުމެކެވެ. އަދި މަސްރަހަށް އަންނަ ބަދަލުތަކަށް ބަލައި މި ނިންމުން މުރާޖައާ ކުރަމުންދާނެ ކަމަށާއި، ހާލަތު ރަނގަޅުވުމުން އަލުން އުފެއްދުންތެރިކަން އިތުރުކުރުމަށް ތައްޔާރަށް އޮތް ކަމަށް ވެސް އެ ކުންފުނިން ބުންޏެވެ.
ކޭޕީސީން ފާހަގަކޮށްފައިވަނީ، ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ސީދާ ބިރުދައްކަމުން ދިއުމާއި ކުވެއިތަށް ދެމުންދާ ހަމަލާތަކުގެ އިތުރުން، ކުރޫޑް އޮއިލް އާއި ތެލުގެ އުފެއްދުންތައް އުފުލުމަށް ބޭނުންވާ އުޅަނދުފަހަރު އަރަބި ގަލްފުން ލިބުމުގައި ދަތިތަކެއް ހުރުމެވެ.
މަސްރަހު ދިރާސާކުރާ ފަރާތްތަކުން އިންޒާރުދޭ ގޮތުގައި، ތެޔޮ ބޭރުކުރުމަށް ހުރަސްތަކެއް ކުރިމަތިވެ ތެޔޮ ރައްކާކުރާ ތަންތަން ފުރިއްޖެ ނަމަ، ސައުދީ އަރަބިއްޔާ އާއި ޔޫއޭއީ ފަދަ ގަލްފުގެ އެހެން ގައުމުތަކަށް ވެސް ތެޔޮ އުފައްދާ މިންވަރު މަދުކުރުމަށް މަޖުބޫރުވެދާނެ އެވެ.
އެމެރިކާ، އިޒްރޭލު އަދި އީރާނާ ދެމެދު ހިނގަމުންދާ މި ހަމަނުޖެހުން މުޅި ސަރަހައްދަށް ފެތުރިފައިވާއިރު، އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތަކަށް އީރާނުން ދަނީ ހަމަލާދެމުންނެވެ. އަދި ހިޒްބުއްލޯ އިން ބޯޑަރު ހުރަސްކޮށް ރޮކެޓް ހަމަލާތައް ދިނުމާ ގުޅިގެން، އިޒްރޭލުން ލުބުނާނަށް ދެމުންދާ ހަމަލާތައް ވެސް ވަނީ ވަރުގަދަކޮށްފަ އެވެ.