އެމެރިކާ އާއި އިޒްރޭލާ ދެކޮޅަށް ކުރަމުންދާ ވަރުގަދަ ހަނގުރާމަ ހަ މަސްދުވަހުގެ މުއްދަތަކަށް ދެމެހެއްޓުމުގެ ގާބިލުކަން އެ ގައުމަށް ލިބިގެންވާ ކަމަށް އީރާނުގެ ރިވޮލިއުޝަނަރީ ގާޑްސްއިން މިއަދު ބުނެފި އެވެ.
ގާޑްސްގެ ތަރުޖަމާނު އަލީ މުހައްމަދު ނާއިނީ ވިދާޅުވީ، އީރާނުން މިހާތަނަށް ބޭނުންކޮށްފައިވަނީ ފުރަތަމަ އަދި ދެވަނަ ޖީލުގެ މިސައިލްތައް ކަމަށެވެ. ނަމަވެސް، ހަނގުރާމަ ކުރިއަށްދާ ނަމަ ކުރިއަށް އޮތް ދުވަސްތަކުގައި، މީގެ ކުރިން މަދުން ނޫނީ ބޭނުންކޮށްފައި ނުވާ، ދުރު ރާސްތާގެ ފެންވަރު ރަނގަޅު މިސައިލްތައް ބޭނުންކުރަން ފަށާނެ ކަމަށް އޭނާ އިންޒާރު ދެއްވި އެވެ.
އީރާނުން މިހެން ބުނެފައިވަނީ، ލުބުނާނުގެ ބެއިރޫތުގައި ހުންނަ އަތިރިމަތީ ހޮޓަލަކަށް އަމާޒުކޮށް، އީރާނުގެ ގުދުސް ފޯސްގެ ކޮމާންޑަރުންނަށް އަމާޒުކޮށް ނުރައްކާތެރި ހަމަލާއެއް ދީފައިވާނެ ކަމަށް އިޒްރޭލުން ބުނެފައިވާ ދަނޑިވަޅެއްގަ އެވެ. ލުބުނާނުގެ ހެލްތު މިނިސްޓްރީން ބުނި ގޮތުގައި، މި ހަމަލާގައި މަދުވެގެން ހަތަރު މީހުން ވަނީ ޝަހީދުވެފައެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، އީރާނާ ދެކޮޅަށް ހިންގާ އަސްކަރީ ހަރަކާތްތައް ފުރިހަމަ ބާރުގައި ކުރިއަށް ގެންދާނެ ކަމަށެވެ. މިއީ އެމެރިކާ އާއި އިޒްރޭލު ގުޅިގެން މިދިޔަ ހަފުތާގައި ހިންގި އޮޕަރޭޝަނެއްގައި އީރާނުގެ އެންމެ މަތީ ލީޑަރު އާޔަތުއްލޯ އަލީ ހާމަނާއީ އަވަހާރަކޮށްލުމާ ގުޅިގެން އޭނާ ދެއްވި ބަޔާނެކެވެ.
ސަރަހައްދީ ނުތަނަވަސްކަން އިތުރަށް ގޯސްވެފައިވާއިރު، ސައުދީ އަރަބިއްޔާގެ ރިޔާދުގައި ހުންނަ ޑިޕްލޮމެޓިކް ސަރަހައްދު ހިމެނޭހެން އެކި ތަންތަނަށް އަމާޒުކޮށް ފޮނުވާލި 12އަށް ވުރެ ގިނަ ޑްރޯން ހުއްޓުވާފައިވާ ކަމަށް އެ ގައުމުން ވަނީ ބުނެފަ އެވެ. ކުވެއިތުގެ ބައިނަލްއަގުވާމީ އެއާޕޯޓުގެ ތެޔޮ ރައްކާކުރާ ތަންތަނަށް ހަމަލާދީފައިވާ ކަމަށް ރިޕޯޓުކޮށްފައިވާއިރު، ގަތަރަށް އަމާޒުކޮށް އީރާނުން ދެ ކްރޫޒް މިސައިލާއި 10 ބެލިސްޓިކް މިސައިލް ފޮނުވާލާފައިވާ ކަމަށް އެ ގައުމުން ބުންޏެވެ.
ތެހެރާނުގައި ހުރި ތެޔޮ ގުދަނަކަށް އެމެރިކާ އާއި އިޒްރޭލުން ހަމަލާދީފައިވާ ކަމަށް އީރާނުން ތުހުމަތުކުރެ އެވެ. އިޒްރޭލުން ވަނީ ތެހެރާނުގައި އަސްކަރީ ބޭނުންތަކަށް ބޭނުންކުރާ ތެޔޮ ރައްކާކުރާ ބައެއް މަރުކަޒުތަކަށް ހަމަލާދިންކަން ކަށަވަރުކޮށްދީފަ އެވެ.
އީރާނުގެ ސަލާމަތީ ކަންތައްތަކާ ބެހޭ އިސްވެރިޔާ އަލީ ލަރީޖާނީ ވިދާޅުވީ، ވޮޝިންޓަނުން މި ހަނގުރާމައިގެ ނުރައްކާތެރިކަން ވަޒަންކޮށްފައިވަނީ ކުށްހީއެއްގެ މައްޗަށް ކަމަށެވެ.
"އެ މީހުން ހީކުރީ މިއީ ވެނެޒުއޭލާ ފަދަ ތަނެއް ކަމަށް. ހަމަލާދީ، ކޮންޓްރޯލް ނަގައި، ހުރިހާ ކަމެއް ނިމޭނެ ކަމަށް. އެކަކު ވެސް ހީނުކުރާ ފަދަ މަޅިއެއްގައި އެ މީހުން މިވަނީ ބެދިފައި،" އޭނާ ވިދާޅުވި އެވެ.
އީރާނުގެ ރައީސް މަސްއޫދު ޕެޒެޝްކިއާން އިންޒާރު ދެއްވީ، އަވަށްޓެރި ގައުމުތަކުގެ ބިން ބޭނުންކޮށްގެން އީރާނަށް ހަމަލާދޭ ނަމަ، އެކަމަށް ރައްދު ދޭން އީރާނަށް މަޖުބޫރުވާނެ ކަމަށެވެ.
އީރާނުގެ އެތެރޭގައި އާންމުންގެ ގިނަ ބަޔަކު މަރުވެ، އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބެމުންދާ ކަމަށް އޮފިޝަލުން ބުންޏެވެ. އީރާނުގެ ހެލްތު މިނިސްޓްރީން ބުނި ގޮތުގައި، މިހާތަނަށް މަދުވެގެން 926 އާންމުން މަރުވެ، 6,000އެއްހާ މީހުން ވަނީ ޒަހަމްވެފަ އެވެ.