ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން އެމެރިކާ ވަކިވުމުގެ މަސައްކަތް ފެށުމަށް އެމެރިކާގެ ރައީސް ޑޮނަލްޑް ޓްރަމްޕް ރިޔާސީ އަމުރެއްގައި ރޭ ސޮއިކުރައްވައިފި އެވެ.
އެއީ ވެރިކަމުގެ ފުރަތަމަ ދުވަހު އޭނާ ސޮއި ކުރެއްވި އެތައް ބައިވަރު ރިޔާސީ އަމުރުތަކުގެ ތެރެއިން އެއް ލިއުމެވެ.
މިއީ ޑަބްލިއުއެޗްއޯއިން އެމެރިކާ ވަކިވުމަށް ޓްރަމްޕް އަމުރުކުރެއްވި ދެވަނަ ފަހަރެވެ.
ޓްރަމްޕް ވަނީ ކޮވިޑް-19އާ ގުޅިގެން އެ ޖަމާއަތުން އަމަލުކުރި ގޮތާ މެދު ވަރަށް ބޮޑަށް ފާޑު ވިދާޅުވެ، ބަލިމަޑުކަމުގެ ތެރޭގައި ޖެނީވާގެ އެ މުއައްސަސާއިން ވަކިވުމުގެ މަސައްކަތް ފަށައިފަ އެވެ. ނަމަވެސް ފަހުން ރައީސް ޖޯ ބައިޑަން ވަނީ އެ ނިންމުން ބަދަލުކުރައްވައިފަ އެވެ.
ފުރަތަމަ ދުވަހު މި އަމުރުގައި ސޮއިކުރެއްވުމުން، އެމެރިކާ އިން ރަސްމީކޮށް އެ ޖަމިއްޔާ ދޫކޮށްދިއުމުގެ ފުރުސަތު ބޮޑެވެ.
އެ އަމުރުގައި ބުނެފައި ވަނީ އެމެރިކާ ޑަބްލިޔުއެޗުއޯ އިން ވަކިވާން ނިންމީ ޗައިނާގެ ވޫހާން ސިޓީން ފެންމަތިވި ކޮވިޑް-19ގެ ބަލިމަޑުކަމާ މެދު އެ ޖަމިއްޔާ އިން އަމަލު ކުރި ގޮތުގެ ސަބަބުން ކަމަށެވެ. އަދި ދުނިޔޭގެ ސިއްހީ އެހެނިހެން ކާރިސާތަކާއި މިހާރުން މިހާރަށް ބޭނުންވާ އިސްލާހުތައް ގެނައުމުގައި އެ ޖަމާއަތް ފޭލިވެފައިވާ ކަމަށް ވެސް އޭނާ ވިދާޅުވި އެވެ.
އަމުރުގައި ބުނެފައި ވަނީ އދ.ގައި ހިމެނޭ ޑަބްލިއުއެޗްއޯއަށް އެމެރިކާ އިން ފައިސާ ދިނުމަކީ ބޭއިންސާފެއް ކަމަށެވެ.
ޓްރަމްޕް ވެރިކަމުގައި ހުންނެވި އިރު، ކޮވިޑް-19ގެ ބަލިމަޑުކަމުން އަރައިގަތުމުގައި އެ ޖަމިއްޔާއަކީ މާ ބޮޑަށް "ޗައިނާއަށް ހަމްދަރުދީވާ" ޖަމިއްޔާއެއް ކަމަށް ވިދާޅުވެ، އެ ޖަމިއްޔާއަށް ވަރަށް ބޮޑަށް ފާޑު ވިދާޅުވި އެވެ.
ބައިޑަންގެ ވެރިކަމުގައި އެމެރިކާ އަކީ ޑަބްލިއުއެޗްއޯއަށް އެންމެ ގިނައިން ފައިސާ ދޭ ގައުމެވެ. އެގޮތުން، 2023 ވަނަ އަހަރު އެ ތަނުގެ ބަޖެޓުގެ ފަސް ބައިކުޅަ އެއް ބައި ހިއްސާކޮށްފައި ވަނީ ވެސް އެމެރިކާ އިންނެވެ.
އެ ޖަމިއްޔާގެ އަހަރީ ބަޖެޓަކީ 6.8 ބިލިއަން ޑޮލަރެވެ. 
ޑަބްލިއުއެޗްއޯ އިން ވަކިވެވަޑައިގަތުމަށް ޓްރަމްޕް ނިންމެވި ނިންމެވުމަށް އާންމު ސިއްހަތުގެ މާހިރުން ގެންދަވަނީ ވަރަށް ބޮޑަށް ފާޑު ވިދާޅުވަމުންނެވެ. މެލޭރިއާ، ޓީބީ، އެޗްއައިވީ އަދި އެއިޑްސް ފަދަ ގައިންގަޔަށް އަރާ ބަލިތަކާ ދެކޮޅަށް އެ ޖަމާއަތުން ކުރަމުން އަންނަ މަސައްކަތަށް ލިބެމުން އަންނަ ކުރިއެރުންތައް މިފިޔަވަޅުގެ ސަބަބުން ބަދަލުވެދާނެ ކަމަށް ވެސް ބައެއް ފަރާތްތަކުން ދަނީ ބުނަމުންނެވެ.