މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބާއްވާ މިއުޒިކަލް ޑްރިލް ޑިސްޕްލޭ މިއަދު ހަވީރު ހުޅުމާލޭގައި ކުރިއަށް ގެންދިއުމަށް ނިންމައިފިއެވެ.
އެމްއެންޑީއެފްއިން މައުލޫމާތުދޭ ގޮތުގައި، މިއުޒިކަލް ޑްރިލް ޑިސްޕްލޭ އޮންނާނީ މިއަދު ހަވީރު 16:30 ގައި ހުޅުމާލޭ ސެންޓްރަލް ޕާކުގައެވެ.
މިއުޒިކަލް ޑްރިލް ޑިސްޕްލޭ އަކީ އަސްކަރީ ސިފަވަންތަކަމާއި ސަފުތަކުގެ ބަދަހިކަމާއި އެއްބައެއްގެ ގޮތުގައި މަސައްކަތްކުރުމުގެ މަތިވެރި ރޫޙު ވަރަށް ފުރިހަމައަށް ދައްކުވައިދޭ ހެވިކަމެކެވެ. އަދި މެހިތަރުގެ އެއްވެސް ކޮމާންޑެއް ނެތި ވަކި ސީކުއެންސަކަށް ސިފައިން އެއްބައެއްގެ ގޮތުގައި ހެވިކަމުގެ އެކިއެކި ހަރަކާތްތައް ދައްކުވައިދޭ މަންޒަރުތައް ހިމެނޭ ކަމެކެވެ.
ޖުމްހޫރީ ދުވަހުގެ މުނާސަބަތުގައި ގައުމީ ދިފާއީ ބާރުން ވަނީ މިދިޔަ ބުދަ ދުވަހު ވެސް މިއުޒިކަލް ޑްރިލް ޑިސްޕްލޭއެއް ބާއްވާފައެވެ. އަދި އިއްޔެ ވަނީ އާޓިފިޝަލް ބީޗުގައިވެސް މިއުޒިކަލް ޑްރިލް ޑިސްޕްލޭއެއް ބާއްވާފައެވެ
މި މިއުޒިކަލް ޑްރިލް ޑިސްޕްލޭއަށްފަހު ޑިސްޕްލޭގައި ބައިވެރިވި ސިފައިންނާއެކު ފޮޓޯ ނެގުމުގެ ފުރުޞަތު އެސަރަޙައްދަށް ޖަމާވި އާންމުންނަށް ވަނީ ހުޅުވާލާފައެވެ.