ކުރިއަށް އޮތް ރައްޔިތުންގެ މަޖިލިސް އިންތިހާބަށް އެމްޑީޕީގެ ޓިކެޓްގައި ވާދަ ކުރާނެ ކެންޑިޑޭޓޫން ހޮވުމަށް އައްޑޫގެ ހަތަރު ދާއިރާއެއްގައި ބާއްވާ ޕްރައިމަރީ 4 ޖެހި އިރު ފަށައިގެން ކުރިއަށް އެބަދެއެވެ.
ފޭދޫ ދާއިރާ އާއި މަރަދޫ ދާއިރާގެ އިތުރުން ހިތަދޫ ދެކުނު، މެދު ދާއިރާގެ ޕްރައިމަރީގެ ވޯޓުލުން ފޯރިއާއި އެކު ކުރިއަށްދާއިރު މިހާތަނަށް ބައެއް ސަރަހައްދުގެ ވޯޓުފޮށްޓަށް ދެބައިކުޅަ އެއްބައި މީހުން ވަނީ ވޯޓު ލާފައެވެ.
4 ޖެހި އިރު ފަށަން ހަމެޖެހުނު ވޯޓުލުން، ފޭދޫގައި ފެށިފައިވަނީ އިރުއޮއްސި 6 ޖަހަން އުޅެނިކޮށެވެ. ފޭދޫން ވާހަކަ ދެއްކި މީހަކު ބުނީ ވޯޓޫލުން ނުފެށި ލަސްވެގެން ދިޔައީ ވޯޓާސް ލިސްޓުގެ މައްސަލާގައެވެ. އޭނާ ބުނީ މިހާތަނަަށް 150 އެއްހާ މީހުން ވޯޓު އަޅާފައިވާ ކަމަށެވެ.
މަރަދޫ ދާއިރާގެ ވޯޓުލުން އޮމާން ކަމާއި އެކު ކުރިއަށްދާއިރު އެދާއިރާގެ ވޯތުލުމުގެ ހައްގުލިބިގެންވާ 800 އަށް ވުރެ ގިނަ މީހުންގެ ތެރެއިން 400 އަށް ވުރެ ގިނަ މީހުން ވަނީ ވޯޓުދީފައެވެ.
މަރަދޫ ދާއިރާގެ ޕްރައިމަރީއަށް 5 ކެންޑިޑޭޓަކުވަނީ ވާދަކޮށްފައެވެ.
ހިތަދޫ ދެކުނު ދާއިރާގެ ވޯޓު ފޮށްޓަށް 200 އެއްހާ މީހުން މިހާތަނަށް ވަނީ ވޯޓު އަޅާފައެވެ. މެދު ދާއިރާގެ ވޯޓު ފޮށްޓަށް ވެސް 2 ބައިކުޅަ އެއްބައި މީހުން ވޯޓުލާފައިވާކަމަށް އިލެކްޝަން އޮފިޝަލަކު ވަނީ ބުނެފައެވެ.
ވޯޓުލުން މިރޭ 11 ޖަހަން ދެން ކުރިއަށް ގެންދިއުމަށް އެމްޑީޕީން ވަނީ ނިންމާފައެވެ.
އައްޑޫގެ 7 ދާއިރާގެ ތެރެއިން 3 ދާއިރާއަށް އެމްޑީޕީން ވާދަކުރާނެ ކެންޑިޑޭޓުން ވަނީ ހޮވިފައެވެ. އެއީ ހިތަދޫ އުތުރު ދާއިރާއަށް މުހައްމަދު އަސްލަމް އާއި ހުޅުދޫ ދާއިރާއަށް އިލްޔާސް ލަބީބްގެ އިތުރުން މީދޫ ދާއިރާއަށް ރޮޒެއިނާ އާދަމްއެވެ.