ދިއްގަރު ދާއިރާގައި ހިމެނޭ މ. ދިއްގަރާއި މުއްޔަށް ގިނަ އަދަދެއްގެ އެއާކޮންޑިޝަން (އޭސީ) ތަކެއް ހަދިޔާކުރައްވަން ފޮނަދޫ ދާއިރާގެ މެމްބަރު އަދި ޕީޕީއެމްގެ ޑެޕިއުޓީ ލީޑަރު އަބްދުއްރަހީމް ނިންމަވައިފި އެެވެ. އަދި މިހާރު މުއްޔަށް އޭނާ ވަނީ އޭސީތައް ފޮނުއްވައިފަ އެވެ. ދިއްގަރު ދާއިރާ އަށް ގިނަ އަދަދެއްގެ އޭސީ ހަދިޔާކުރައްވަން އަބްދުއްރަހީމް ނިންމަވާފައިވާ އިރު، އެ ދާއިރާގެ ބައި އިލެކްޝަން އަންނަ މަހު 6 ގައި އޮންނާނެ އެވެ. ދިއްގަރު ދާއިރާ އަށް ވާދަކުރައްވާ ޕީޕީއެމްގެ ކެންޑިޑޭޓް ފާރިސް މައުމޫންގެ ކެމްޕޭން އޮފީހުގައި ބޭއްވި ބައްދަލުވުމެއްގައި އަބްދުއްރަހީމް ރޭ ވިދާޅުވީ ދިއްގަރު މިސްކިތް އޭސީ ކޮށްދެއްވާނެ ކަމަށް އޭނާ ވިދާޅުވީ ހަތަރެއް ނުވަތަ ފަސް އޭސީން އެކަން ވެދާނެ ކަމަށް ހީކުރައްވައި "ސަމާސާ އަކަށް" ކަމަށެވެ. އެކަމަކު ފަހުން އެކަން ބެލިއިރު، މިސްކިތް އޭސީކުރަން 14 އޭސީ ބޭނުންވާތީ އެ ރަށަށް މިހާރު އެކަން ހަމަޖައްސާދީފައިވާ ކަމަށް އަބްދުއްރަހީމް ވިދާޅުވި އެވެ. "އަޅުގަނޑުމެންނަކީ ހުސް ވައުދުވާ ބައެއް ނޫން، މިހާރު ހުންނާނީ ދިއްގަރަށް 14 އެއާކޯން ފޮނުވާފައި،" ފާރިސް އާއި ޕީޕީއެމްގެ ޕާލިމެންޓްރީ ގްރޫޕުގެ އިސް ބައެއް މެމްބަރުން ބައިވެރިވެވަޑައިގެންނެވި ބައްދަލުވުމުގައި އަބްދުއްރަހީމް ވިދާޅުވި އެވެ. އަދި މި މަސް ނިމުމުގެ ކުރިން މުއްޔަށް ވެސް 14 އޭސީ އޭނާގެ ހަރަދުގައި ފޮނުއްވާނެ ކަމަށް އަބްދުއްރަހީމް ރޭ ވިދާޅުވި އެވެ. މިއަދުގެ ސަރުކާރު މިއޮތީ އެހެން ހުރިހާ ކަމަކަށް ވުރެން ބޮޑަށް ދިއްގަރު ދާއިރާގެ މި ކެމްޕޭނަށް ހުސްވެފައި. ދިއްގަރު ދާއިރާގެ ކެމްޕޭން ކާމިޔާބުކުރުމަށްޓަކައި މި ސަރުކާރުން ކޮށްދެއްވަން ޖެހިވަޑައިގަންނަވާ ކޮންމެ ކަމެއް ކޮށްދެއްވާނެ ކަމުގެ ފުރިހަމަ ޔަގީންކަން ރައީސް ޔާމީން ވަނީ އަޅުގަނޑުމެންނަށް ދެއްވާފައި.-- އަބްދުއްރަހީމް އޭނާ ވިދާޅުވި ގޮތުގައި މަޑުއްވަރީ މިސްކިތްތައް އޭސީކޮށްދެއްވާނެ ކަމުގެ ޔަގީންކަން އެމްޑީއޭގެ ލީޑަރު އަހްމަދު ސިޔާމް ވަނީ ދެއްވައިފަ އެވެ. އޭސީ ފޮނުވުމުގެ އިތުރުން އަންނަ މަހު ހަތަރެއްގައި މަޑުއްވަރީ އާއި ދިއްގަރު ބަނދަރު ހެދުމުގެ މަސައްކަތް ފަށާނެ ކަމަށް ވެސް އަބްދުއްރަހީމް ވިދާޅުވި އެވެ. "މިއަދުގެ ސަރުކާރު މިއޮތީ އެހެން ހުރިހާ ކަމަކަށް ވުރެން ބޮޑަށް ދިއްގަރު ދާއިރާގެ މި ކެމްޕޭނަށް ހުސްވެފައި. ދިއްގަރު ދާއިރާގެ ކެމްޕޭން ކާމިޔާބުކުރުމަށްޓަކައި މި ސަރުކާރުން ކޮށްދެއްވަން ޖެހިވަޑައިގަންނަވާ ކޮންމެ ކަމެއް ކޮށްދެއްވާނެ ކަމުގެ ފުރިހަމަ ޔަގީންކަން ރައީސް ޔާމީން ވަނީ އަޅުގަނޑުމެންނަށް ދެއްވާފައި،" އަބްދުއްރަހީމް ވިދާޅުވި އެވެ. އެގޮތަށް ކޮށްދެއްވުމަކީ ކޮރަޕްޝަން ކަމަށް އިދިކޮޅު ފަރާތްތަކުން ބުނެފާނެ ކަމަށާއި ނަމަވެސް އެއީ ކޮރަޕްޝަން ނޫން ކަމަށް އޭނާ ވިދާޅުވި އެވެ. "އަޅުގަނޑު ދަންނަވާލަން ބޭނުން ވަނީ ނޫނެކޭ [ކޮރަޕްޝަނެއް ނޫނޭ] އެއީ ރައްޔިތުންނަށް ގެނެސްދެއްވާ ތަރައްގީއޭ. އަޅުގަނޑުމެންގެ ބަޖެޓުގައި ހުރި ކަންތައްތަކޭ. ބަޖެޓް ނެތް ކަމެއް އަލުން ބަޖެޓުގައި ހިމަނައިގެން ކުރުމެއް ނޫނޭ،" އަބްދުއްރަހީމް ވިދާޅުވި އެވެ. އަދި އެ ކަންކަން މިހާރު ފަށާފައި ވަނީ ޓުވީޓެއްގައި އޭނާ ވިދާޅުވެފައިވާ ފަދަ ސްޕީޑެއްގައި ކުރިއަށް ގެންދަން ކަމަށް ވެސް ވިދާޅުވި އެވެ. އެ ޓުވީޓުގައި ހުޅުމާލެ ބިންހިއްކި އަވަސްކަން ފާހަގަކުރައްވަން ވިދާޅުވެފައި ވަނީ އެކަން ގެންދިޔައީ "ގޫގުލް އަށް ވުރެ ސްޕީޑުގައި" ކަަމަށެވެ.