ރާއްޖޭގައި ޒަމާނުއްސުރެ ފެށިގެން ކަރަންޓުގެ އަގު ބޮޑުވަނީ އެސްޓީއޯ އިން، އާދަޔާ ހިލާފު ބޮޑު ފައިދާއެއް ނަގައިގެން ތެޔޮ ވިއްކަމުން ދާތީ ކަމަށް އަދާލަތު ޕާޓީން ބުނެފި އެވެ. އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ސެކްރެޓަރީ ޖެނަރަލް އިޔާދު ހަމީދު ވިދާޅުވީ އެސްޓީއޯ އިން ތެޔޮ ފީފާއަކުން 30 ޑޮލަރުގެ ފައިދާއެއް ނަގާ ކަމަށް، ރައީސް އަބްދުﷲ ޔާމީން ރައްޔިތުންގެ މަޖިލީހުގެ މުލަކު ދާއިރާގެ މެމްބަރުގެ ގޮތުގައި ހުންނެވި އިރު ބޭއްވި މާލިއްޔަތު ކޮމެޓީގެ ބައްދަލުވުމެއްގައި ވިދާޅުވެފައިވާ ކަމަށެވެ. އަދި އޭގެ ސަބަބުން ހަކަތައިގެ އަގު އިންތިހާ އަށް ބޮޑުވެގެން ދާނެ ކަމަށް ވެސް އޭރު ރައީސް ވިދާޅުވި ކަމަށް އިޔާދު ވިދާޅުވި އެވެ. "އެކަމަކު ރައީސްގެ ވެރިކަމަށް ދޮޅު އަހަރު ވީއިރު ވެސް އެސްޓީއޯ އިން ތެޔޮ ވިއްކަމުން މިދަނީ 40 ޕަސެންޓްގެ ފައިދާއެއް ނަގައިގެން. މިކަން ހައްލު ކުރުމަށް އެއްވެސް މަސައްކަތެއް ނުކުރެވޭ،" އޭނާ ވިދާޅުވި އެވެ. ކުރިން ދެމުން އައި ސަބްސިޑީ ކަނޑާލުމުން، ފިހާރަތަކާއި ވިޔަފާރިކުރާ ތަންތަނުގެ ކަރަންޓު ބިލް ބޮޑުވުމާ ގުޅިގެން ބައެއް ރަށްރަށުގެ ފިހާރަތައް ބަންދުކޮށް އިހްތިޖާޖް ކުރަމުން ދާތީ އެކަމާ ކަންބޮޑުވުން ފާޅުކުރައްވައި އިޔާދު ވިދާޅުވީ ސަރުކާރުން ކަރަންޓު ދެމުން އަންނަނީ މާލެ އާއި ރަށްރަށުގައި ވަރަށް ތަފާތު ބޮޑުކޮށް ކަމަށެވެ. މާލޭގައި ކަރަންޓު ޔުނިޓަކަށް ދެ ރުފިޔާ ނަގާ އިރު ރަށްރަށުގައި އެ އަދަދު އުޅެނީ ހަތް ރުފިޔާ ނުވަތަ އަށް ރުފިޔާގައި ކަމަށާއި މިއީ ރައްޔިތުންނަށް ދޭ ބޮޑު އަނިޔާއެއް ކަމަށް އޭނާ ވިދާޅުވި އެވެ. އޭނާ ވިދާޅުވީ ތެލުގެ ޑިއުޓީ އަށް ގެނައި ބަދަލާއެކު ކުރިމަގުގައި ކަރަންޓުގެ އަގު މި އަށް ވުރެ ބޮޑުވެގެން ދާނެ ކަމަށެވެ. އަދި ވަރަށް އަވަހަށް ރައްޔިތުން ކަރަންޓު ބިލަށް ސަލާން ޖަހަން ޖެހިދާނެ ކަމުގެ އިންޒާރު ވެސް އިޔާދު ދެއްވި އެވެ. "ހަގީގަތުގައި ކުދި އަދި މެދު ފަންތީގެ ވިޔަފާރިތައް ކުރިއަރުވާކަށް ސަރުކާރުން އެއްވެސް މަސައްކަތެއް ނުކުރޭ. ކަރަންޓުގެ މައްސަލަ ދިމާވާން ފެށިތާ ހަފުތާއެއް ވީއިރު މިކަމަށް އެއްވެސް ހައްލެއް ނާދޭ،" އޭނާ ވިދާޅުވި އެވެ. އިޔާދު ވިދާޅުވީ އިގްތިސޯދީ ގޮތުންނާއި އިޖްތިމާއީ ގޮތުން ސަރުކާރު ފެއިލްވެފައިވާ ކަމަށާއި ރައްޔިތުންނަށް ދިމާވާ މި ފަދަ މައްސަލަތައް ހައްލު ކުރުމަށް ސަބްސިޑީއެއްގެ އިތުރުން ލޯނުގެ އެހީއެއް ލިބޭނެ ގޮތް ހަމަޖައްސަން ޖެހޭނެ ކަމަށެވެ. އޭނާ ވިދާޅުވި ގޮތުގައި ވިޔަފާރިތަކުގެ ކަރަންޓު ބިލް ބޮޑުވުމުގެ ސަބަބުން ދެން ވިޔަފާރިވެރިންނަށް މަޖުބޫރު ވާނީ މުދަލުގެ އަގު ބޮޑުކުރާށެވެ. އެކަމުގެ ގެއްލުން ލިބޭނީ އެ ތަންތަނުން ވިޔަފާރި ކުރާ އާއްމު ރައްޔިތުންނަށް ކަމަށް ވެސް ވިދާޅުވި އެވެ. ކަރަންޓު ބިލް ބޮޑުވުމުގެ މައްސަލާގައި ހދ. މަކުނުދު އާއި އެ އަތޮޅު ކުޅުދުއްފުއްޓާއި އައްޑޫގެ ވިޔަފާރިތައް ވެސް އިއްޔެ ވަނީ ބަންދުކޮށް، އިހްތިޖާޖްކޮށްފަ އެވެ. ވިޔަފާރިތަކަށް ދެމުން އައި ކަރަންޓް ސަބްސިޑީ ކަނޑާލުމުން ރަށްރަށުގެ ވިޔަފާރިތަކުގެ ކަރަންޓު ބިލުން ފެނަކަ އަށް އިތުރު 11 މިލިއަން ރުފިޔާ ލިބޭނެ ކަމަށް ފެނަކަ ކޯޕަރޭޝަނުން އިއްޔެ ބުނެފައިވެ އެވެ. އަދި ސަބްސިޑީ އަކީ ފެނަކަ އިން ދޭ އެއްޗަކަށް ނުވާތީ އެކަމުގައި އެ ކުންފުންޏަށް ކޮށްދެވޭނެ ކަމެއް ނެތް ކަމަށް ވެސް ބުނެފައިވެ އެވެ. ކަރަންޓް ބިލަށް ސަބްސިޑީ ދެނީ، ބިލްގައި ހިމެނޭ ފިއުލް ސާޗާޖަށް ޖެހޭ ވަރަށެވެ. އެހެންވެ ސަބްސިޑީ ކަނޑާލުމުން ވިޔަފާރިކުރާ ތަންތަނުން ދެން ފިއުލް ސާޗާޖް ދައްކަން ޖެހޭނީ އަމިއްލަ އަށެވެ.