"ހަވީރު"ގެ ސީނިއަ އެސިސްޓެންޓް އެޑިޓަރުގެ މަގާމުގައި ހުންނެވި އަހުމަދު ހަމްދޫނަށް މި އަހަރުގެ ގައުމީ އިނާމު ލިބިވަޑައިގެންފި އެވެ. މިރޭ ދަރުބާރުގޭގައި އޮތް ޖުމްހޫރީ ދުވަހުގެ ގައުމީ ޖަލްސާގައި ހަމްދޫނަށް އިނާމު ހަވާލުކޮށްދެއްވީ ރައީސް އަބްދުﷲ ޔާމީނެވެ. ހަމްދޫން ހަވީރުގައި -- ހަވީރު ފައިލް ފޮޓޯ "މިއީ ހަމައެކަނި ހަމްދޫނަށް ލިބުނު އުފަލެއް ނޫން. މިއީ މުޅި ހަވީރުގެ ޓީމަށް ވެސް ލިބުނު ޝަރަފެއް،" އެޑިޓަރު މޫސާ ލަތީފު ވިދާޅުވި އެވެ. "ހަމްދޫނަކީ މިވަގުތު ރާއްޖޭގައި ހުރި އެންމެ ކުޅަދާނަ އެއް ނޫސްވެރިޔާ. ސިޔާސީ ދާއިރާގެ މައްސަލަތަކަށް ލޯ ހުޅުވޭ، އެ ދާއިރާގެ ގިނަ ލިއުންތަކެއް ލިއާ ނޫސްވެރިއެއް." "ހަވީރު"ގައި ހަމްދޫން ނޫސްވެރިކަމުގެ ތެރެއަށް ހަމްދޫން ވެންނެވީ 1998 ގައި "ހަވީރު"ންނެވެ. ސްކޫލް ނިންމެވުމަށް ފަހު އެންމެ ފުރަތަމަ އޭނާ ސީރިއަސްކޮށް ނެންގެވި ދާއިރާ އަކީ ވެސް ނޫސްވެރިކަމެވެ. ފުރަތަމަ ހަމްދޫން ލިއުއްވަމުން ގެންދެވީ އާންމު އަދި އާދައިގެ ހަބަރުތަކެވެ. އެކަމަކު ފަހުން ތައުލީމީ ދާއިރާއާ ބެހޭ ހާއްސަ ރިޕޯޓެއްގެ ގޮތުން މަސައްކަތްކުރެއްވި އެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހަމްދޫން -- ހަވީރު ފައިލް ފޮޓޯ މިދިއަ 17 އަހަރުގެ ތެރޭގައި ހަމްދޫން ވަނީ ރާއްޖޭގެ ހުރިހާ ދާއިރާއެއްހެން ކަވަރުކުރައްވައިފަ އެވެ. ފަހުން ހަމްދޫން ގިނަ ވަގުތުތަކެއް ހޭދަކުރެއްވި އެއް ދާއިރާ އަކީ ރައްޔިތުންގެ މަޖިލިސް ކަވަރުކުރެއްވުމާއި މަޖިލިހާ ގުޅޭ އެހެން ކަންކަމެވެ. ނޫސްވެރިކަމުގެ ރޮނގުން ގައުމީ އިނާމް ލިބުނު "ހަވީރު"ގެ ހަމްދޫން އަށް ރައީސް އިނާމް ދެއްވަނީ.---ފޮޓޯ: ރައީސް އޮފީސް ރާއްޖޭގެ ރައީސުން ބޭރަށް ކުރެއްވި ދަތުރުފުޅުތަކާއި، ގައުމީ ފެންވަރުގެ ބޮޑެތި އެތައް އިވެންޓްތަކެއް އޭނާ ވަނީ ކަވަރުކުރައްވައިފަ އެވެ. ރާއްޖޭގެ އެތައް ރަށަކަށް ވަޑައިގެން، ގިނަ ލިއުންތަކެއް ލިއުއްވި އެވެ. ނޫސްވެރިންގެ ބައްދަލުވުމެއްގައި ހަމްދޫން -- ހަވީރު ފައިލް ފޮޓޯ "ހަމްދޫންގެ އެންމެ ރަނގަޅު އެއް ތަންކޮޅަކީ ގިނަ ބަޔަކާ އެކު އޮންނަ ގުޅުން. ކޮންމެ ވަގުތަކު ވެސް ހަމްދޫން ހުންނާނީ ހަބަރަކަށް ތައްޔާރުވެގެން. ވަކި ގަޑިއެއް، ވަކި ކަމެއް ނޯންނާނެ،" މޫސަ ވިދާޅުވި އެވެ. "ހަމްދޫން އަށް ނޫސްވެރިކަމުގައި ލިބުނު ކާމިޔާބީއެއް ވިއްޔާ އޭގެ ފަހަތުގައި އޮންނާނީ އޭނާގެ ޝައުގުވެރިކަން. އެންމެ އަވަހަށް ހަބަރު ކަވަރުކުރާ ނޫސްވެރިޔާ އަށް ވާން ހަމްދޫން ބޭނުންވާނެ. މިއީ މިހާރުގެ ނޫސްވެރިކަމުގައި ވަރަށް މުހިންމު ސިފައެއް." މުހިންމު ހަބަރުތަކާއި ރިޕޯޓްތައް ލިއުއްވުމުގެ އިތުރުން "ހަވީރު" ނިއުސްރޫމްގެ ގިނަ ކަންތައްތަކެއް އިންތިޒާމްކުރެއްވުމުގައި ވެސް ވަރަށް ބުރަކޮށް އުޅުއްވަ އެވެ.