ކޮންމެ ކުއްޖަކީވެސް މުސްތަގްބަލަށްޓަކައި އެކުއްޖަކު އަމިއްލަަ މަސައްކަތުން ފައިސާ ހޯދާ ކުއްޖަކަށް ވާން ޖެހޭ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހްމަދު ނަސީރު ވިދާޅުވެއްޖެ އެވެ.
ގަވަރުނަރު މިހެން ވިދާޅުވީ "ގްލޯބަލް މަނީ ވީކް" ފެށުމަށް އިސްކަންދަރު ސްކޫލްގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ގަވަރުނަރު އަހްމަދު ނަސީރު ވިދާޅުވީ ކުއްޖާގެ ޅަފަތުން ފެށިގެން އަމިއްލަ މަސައްކަތުން ފައިސާ ހޯދާ އެ ފައިސާ ހަރަދު ކުރާނެ ގޮތްތައް ދަސްކޮށްދިނުމަކީ މުހިއްމު ކަމެއް ކަމަށެވެ. އަދި ފައިސާގެ މުއާމަލާތްތަކަކީ އެންމެ ކުޑައިރުން ފެށިގެން އެނގެން ޖެހޭނެ ކަންތައްތަކެއް ކަމަށްވެސް ވިދާޅުވި އެވެ. އެގޮތުން އެކުއްޖެއްގެ އުމުރާއި އެކަށީގެންވާ ގޮތަށް ފައިސާގެ ކަންކަން ބުނެދީ ފައިސާއަށް ހޭލުންތެރި ކުރުވުމަކީ ތައުލީމީ ދާއިރާއިން އިސްކަމެއްދީގެން ކުރުން މުހިއްމު ކަމެއް ކަމުގައިވެސް ވިދާޅުވި އެވެ.
"ވީހާވެސް ކުޑައިރުއްސުރެ ދަސްކުރަން އެބަޖެހޭ ލިބޭ އާމްދަނީން ތިޔަ ކުދިންގެ ކަންކަން ހަމަޖައްސަން ދަސްކުރަން. މިހާރު ތިޔަ ކުދިންނަށް ޕޮކެޓްމަނީގެ ގޮތުގައި ލިބޭ ފައިސާ ފޮތެއްގައި ނަމަވެސް، ރެކޯޑު ކުރަން. ފައިސާ ލިބުނު އަދަދާ، ތިޔަ ކުދިން ކުރި ހަރަދު. އޭރުން މުޅި އުމުރުގައި އޭގެ ފައިދާ ލިބިގެންދާނެ" ގަވަރުނަރު ވިދާޅުވި އެވެ.
ގަވަރުނަރު ވިދާޅުވީ ރާއްޖޭގެ ޒުވާނުންނަކީ އަމިއްލަ މަސައްކަތުން އާމްދަނީ ހޯދާ ބަޔަކަށް ވުމަކީ މުހިއްމު ކަމެއް ކަމަށެވެ އަދި ޒުވާން އުމުރުގައި ރިޓާޔަމަންޓަށް ފަހަށް ރައްކާ ކުރަން ޕްލޭނެއް ކުރާއިރު، މާކެޓްގައި ލިބެން ހުރި ފެސިލިޓީތަކަކީ ކޮބައިކަން ދެނެގަނެގަތުމަކީ ވެސް މުހިއްމު ކަމެއް ކަމަށެވެ. އަދި ގައުމުގެ ކުރިއެރުމުގައި އެންމެ ބޮޑު ހިއްސާއެއް ވާބަޔަކީ ޒުވާނުންކަމުން މިހާރަށް ވުރެން ބޮޑަށް ޒުވާނުން ޒިންމާދާރުވާން ޖެހޭކަމަށް ވެސް ވިދާޅުވި އެވެ.
"ގްލޯބަލް މަނީ ވީކް" އަކީ ފަހަށް ފައިސާ ރައްކާކުރުމާ ގުޅޭގޮތުން ހޭލުންތެރިކުރުވުމަށް މުޅި ދުނިޔޭގައި ފަށާފައިވާ ހާއްސަ ހަރަކާތެކެވެ. މި ކެމްޕޭނާ ގުޅޭ ހަރަކާތްތައް މި މަހުގެ 30 ވަނަ ދުވަހުގެ ނިޔަލަށް ކުރިއަށް ގެންދިއުމަށް ވަނީ ނިންމާފަ އެވެ.