މަތީ ސާނަވީގައި ކިޔަވާ ދަރިވަރުންގެ މަންހަޖުގައި ހިމެނޭ ބައެއް ކަހަލަ ޕްރެކްޓިކަލްތައް ރާއްޖޭގައި ހެދެން ނުހުންނާތީ، އެކަންކަން ތަޖުރިބާކޮށްލުމުގެ ފުރުސަތު ދަރިވަރުންނަށް ދިނުމުގެ ގޮތުން، ވިލާ އިންޓަނޭޝަނަލް ހައި ސްކޫލުން މެލޭޝިއާގެ ބައެއް ޔުނިވަސިޓީތަކަށް ތަޖުރިބާ ދަތުރެއް ކުރުމަށް ނިންމައިފިއެވެ.
އެ ސްކޫލުގެ ގްރޭޑް 11 ގެ ސައިންސް ސްޓްރީމްގައި ކިޔަވަމުން އަންނަ ދަރިވަރުންނާއި ބިޒްނަސް ސްޓްރީމް ދަރިވަރުންނަށް ޚާއްސަކޮށްފައިވާ މި ދަތުރުގައި ބައިވެރިވުމުގެ ފުރުސަތު ހުޅުވާލާފައި ވާއިރު، މި ދަތުރުގައި ދަރިވަރުން ފުރާނީ އަންނަ އޮގަސްޓް މަހުގެ ތެރޭގައެވެ.
ދެ ދަތުރެއްގެ ގޮތުގައި ކަނޑައަޅާފައިވާ މި ދަތުރުގައި ސައިންސް ސްޓްރީމުގެ 45 ކުއްޖަކަށް ފުރުސަތު ހުޅުވާލާފައި ވާއިރު، ބިޒްނަސް ސްޓްރީމަށް ދީފައި ވަނީ 38 ކުދިންގެ ޖާގައެވެ.
މި ދަތުރާ ގުޅޭގޮތުން ވަގުތަށް މައުލޫމާތު ދެއްވަމުން، މި ދަތުރުގެ ކަންކަމުގައި އިސްކޮށް ހަރަކާތްތެރިވާ އެ ސްކޫލުގެ ޓިޗަރުން ވިދާޅުވީ، އެއަށް ވުރެ އިތުރަށް ކުދިން ފޯމް ލާނަމަ، ގުރުއަތަކަށް ދާނެ ކަމަށެވެ. އަދި ކުދިން ހޮވުމުގައި، އެކުދިންގެ އަޚްލާޤާއި ކިޔެވުމަށް ބަލާނެ ކަމަށްވެސް ސްކޫލުން މައުލޫމާތު ދެއެވެ.
ސްކޫލްގެ މިޑް ޓާރމް ބްރޭކަށް ތާވަލު ކުރެވިފައިވާ މި ދަތުރުގައި ކޮންމެ ގްރޫޕަކާއި އެކު 4 ޓީޗަރުންނާއި ސްކޫލްގެ އިސް އެއް ބޭފުޅަކު ބައިވެރިވާނެއެވެ. އަދި ބެލެނިވެރިންގެ ތެރެއިންވެސް ދެ ބެލެނިވެރިއަކަށް ދަތުރުގައި ބައިވެރިވުމުގެ ފުރުސަތު ވަނީ ހުޅުވާލެވިފައެވެ.
މި ދަތުރުގައި ބައިވެރިވާ ކޮންމެ ކުއްޖެއްގެ އަތުން 875 އެމެރިކާ ޑޮލަރު ނެގުމަށް ހަމަޖެހިފައި ވާއިރު، މި ފައިސާގެ ތެރޭގައި ދެކޮޅު ޓިކެޓާއި، ހުރުމާއި ކެއުމުގެ ޚަރަދެއް ހިމެނޭނެ ކަމަށް ޝިމްނާ ވިދާޅުވިއެވެ. ބެލެނިވެރިންގެ އަތުންވެސް ހަމަ މި އަދަދު ނަގާނެ ކަމަށް ސްކޫލުން ބުނެއެވެ.
"ކޮންމެ ކުއްޖަކަށް ޖެހޭނީ 875 ޑޮލަރު. އެތަނުން 500 ޑޮލަރު ދައްކަން ޖެހޭނީ ޑޮލަރުން. ދެން ބާކީ މައްސަލައެއް ނެތް ދިވެހި ރުފިޔާއިން ދެއްކިޔަސް."، މި ދަތުރުގައި އިސްކޮށް އުޅުއްވާ ޓީޗަރެއް ކަމުގައިވާ ޝިމްނާ ވިދާޅުވިއެވެ.
27 އޯގަސްޓް އިން 3 ސެޕްޓެމްބަރަށް ރާވާފައިވާ 7 ދުވަހުގެ މި ދަތުރުގައި ބައިވެރިވުމަށް އެދޭ ފޯމު މިހާރު ވަނީ ދޫކުރަން ފަށާފައެވެ. ދަތުރުގައި ބައިވެރިވުމަށް ބޭނުންވާ ކުދިން ފޯމު ފުރުމަށްފަހު މި މަހުގެ 20 ވަނަ ދުވަހުގެ 14:00 ގެ ކުރިން ހުށަހަޅަން ޖެހޭއިރު، ފޯމާއި އެކު 100 ޑޮލަރުވެސް ދައްކަން ޖެހޭނެ ކަމަށް ސްކޫލުން މައުލޫމާތުދެއެވެ.
ދަތުރަށް ނަގާ 875 ޑޮލަރުގެ ތެރޭގައި ހިމެނޭ މި 100 ޑޮލަރު ފޯމާއި އެކު ދައްކަން ޖެހޭއިރު، ބާކީ 775 ޑޮލަރު ދައްކަން ޖެހޭނީ ޖުލައި މަހުގެ ފުރަތަމަ ހަފްތާގެ ތެރޭގައެވެ.
ތަޖުރިބާ ހޯދުމަށް ކުރާ މި ދަތުރުގައި ބައިވެރިވާ ސައިންސް ސްޓްރީމުގެ ދަރިވަރުންނަށް މެލޭޝިޔާގެ ނޭޝަނަލް ސައިންސް ސެންޓަރ އާއި، ޔުނިވާސިޓީ ޕުތްރާ މެލޭޝިޔާ އަދި ޔުނިވާސިޓީ ސެއިންސް މެލޭޝިޔާއަށް ޒިޔާރަތް ކުރުމުގެ ފުރުސަތު ލިބިގެންދާނެއެވެ.
ބިޒްނަސް ސްޓްރީމުގެ ދަރިވަރުން ޒިޔާރަތް ކުރާނީ މެލޭޝިޔާގެ ބޮޑެތި ކުންފުނި ތަކާއި، ކާރު ފެކްޓްރީ ތަކާއި، އެހެނިހެން ކާރުޚާނާ ތަކަށެވެ. ވިލާ ސްކޫލުން މައުލޫމާތު ދިން ގޮތުގައި، ރާއްޖޭގައި ފެކްޓްރީތައް މަދުވުމުގެ ސަބަބުން، ބޮޑެތި ފެކްޓްރީތަކުގައި މަސައްކަތް ކުރިއަށްދާ ގޮތް ތަޖުރިބާކޮށްލުމުގެ ފުރުސަތު މި ދަތުރުގައި ލިބިގެންދާނެއެވެ.
އަދި މީގެ އިތުރުންވެސް މެލޭޝިޔާގެ އާސާރީ ތަންތަން ބަލާލުމަށާއި، ބާޒާރުކޮށްލުމުގެ ފުރުސަތުވެސް ކުދިންނަށް ލިބިގެންދާނެ ކަމަށް ސްކޫލުން މައުލޫމާތު ދެއެވެ.