ހއ. ހޯރަފުށީގެ ބައެއް މީހުން އެހެން ދާއިރާތަކަށް ރަޖިސްޓްރީ ނުކުރިޔަސް އެމީހުންގެ ނަން އެ ދާއިރާތަކުގެ ލިސްޓްގައި އޮތް މައްސަލައެއް ޖުމްހޫރީ ކޯލިޝަނުން ފެންމަތިކޮށްފި އެވެ.ޖޭޕީ އޮފީހުގައި މިއަދު އޮތް ނޫސްވެރިންގެ ބައްދަލުވުމެއްގައި އުމަރު ނަސީރު ވިދާޅުވީ އެއީ ވަރަށް ސީރިއަސް މައްސަލައެއް ކަމަށާއި އެކަން އިލެކްޝަންސް ކޮމިޝަންގެ ސަމާލު ކަމަށް މިހާރު ގެނެސްފައިވާ ކަމަށެވެ. އޭނާ ވިދާޅުވި ގޮތުގައި އެފަދަ ކަމެއް ހިނގައިފާނެކަން އިލެކްޝަންސްގެ ސަމާލު ކަމަށް ކުރިން ވެސް ގެނެސްފައިވާނެ އެވެ. އަދި 2008 ގެ ރިޔާސީ އިންތިޚާބުގައި ވެސް އެފަދަ މައްސަލަތައް ފެންމަތިވި ކަމަށާއި އެހެންކަމުން ހުރިހާ ފަރާތްތަކުން ވެސް އެކަމަށް ސަމާލުވުމަށް އުމަރު ގޮވާލެއްވި އެވެ."މިކަން މިކުރާ ގޮތަކީ ވޯޓު ލާ މީހާ އަށް ނޭނގި އެހެން ގޮތަކުން އޭނާގެ ވޯޓު ލާ އެޑްރެސް ނުވަތަ ވޯޓުލާ ފޮށި އެހެން ރަށަކަށް ބަދަލުކުރަނީ. ބަދަލުކުރީމާ އެމީހާ މި އަންނަނީ ވޯޓުލާން އެމީހާ ކުރިން ވެސް އަންނަ މަރުކަޒަށް. ނުވަތަ އެ މީހާ ހީކުރާ ގޮތުގައި އެ މީހާ ވޯޓުލާން ހަމަޖެހިފައި އޮތް ތަނަށް. ދާއިރުގައި އެ ލިސްޓުގައި އެ މީހާގެ ނަމެއް ނޯވޭ. އެހެންވީމާ އޭނާ ދާން މިޖެހެނީ އެހެން ތަނަކަށް ވޯޓުލާން،" އުމަރު ވިދާޅުވި އެވެ.އޭނާ ވިދާޅުވީ އެއީ ވޯޓު އޮޅުވާލުމަށްޓަކައި ދުނިޔޭގެ އެހެން ގައުމުތަކުގައި ވެސް ކުރާ ކަމެއް ކަމަށެވެ. އެގޮތުން ވަކި ފިކުރަކަށް ތާއީދުކުރާ މީހުންގެ ވޯޓުލުމަށް ހަމަޖެހިފައިވާ ތަން ސިއްރުން ބަދަލުކުރުމުން އެ މީހާ އަށް ބައެއް ފަހަރު ވޯޓުލުމުގެ ހައްގު ގެއްލޭ ކަމަށް އޭނާ ވިދާޅުވި އެވެ. ޖުމްހޫރީ ކޯލިޝަނަށް ތާއީދުކުރާ މީހުން ހޮނިހިރު ދުވަހުގެ ހެނދުނު 11:00 ގެ ކުރިން ވޯޓުލާ ނިންމުމަށް ވެސް އުމަރު ގޮވާލެއްވި އެވެ. އަދި އަމިއްލަ ގަލަމެއް ހިފައިގެން ގޮސް ވޯޓުގައި ފާހަގަލުމަށް ވެސް އެދިވަޑައިގަތެވެ.މިހާރު ސޯޝަލް މީޑިއާގައި އާންމުވެގެން އުޅޭ ލިއުމާ ބެހޭ ގޮތުން އުމަރު ވިދާޅުވީ ވެރިކަން ބަދަލުކުރަން އޭރު މަސައްކަތް ކުރި ނަމަވެސް އެއްބަސްވުމެއްގެ ދަށުން އެކަން ކުރަން އެއްވެސް ވަރަކަށް މަސައްކަތް ކޮށްފައިނުވާނެ ކަމަށެވެ. އަދި އުމަރުގެ ސޮއި އެ ލިއުމުގައި ހިމަނާފައި ވަނީ ފޯޖްކޮށްގެން ކަމަށް ވެސް އޭނާ ވިދާޅުވި އެވެ."ކޮންޓްރެކްޓެއް ހަދައިގެން ވެރިކަން ބަދަލުކުރުން އެއީކީ އެއްވެސް ޒަމާނެއްގައި އަޅުގަނޑުމެންގެ ވިސްނުން ހުރި ގޮތެއް ނޫން. އަދި އަޅުގަނޑު ގަބޫލުކުރާ ގޮތުގައި ޖުމްހޫރީ ގުޅުމުގައި މި ތިއްބެވި ބޭފުޅުން ނޫން އެހެން އެއްވެސް ޕާޓީއެއްގައެއް ނެތް އެފަދަ ކޮންޓްރެކްޓެއްގައި ސޮއިކޮށްލަން ކެރޭނެ މީހަކު. އެހެންވީމާ މިފަދަ ކޮންޓްރެކްޓެއް ހަދާކަށް ނުވެސް ޖެހޭ،" އުމަރު ވިދާޅުވި އެވެ.