ލޯކަލް ކައުންސިލްތަކުގެ އިންތިހާބުގައި ވާދަކުރާ ޑީއާރްޕީގެ ކެންޑިޑޭޓުންނަށް ތާއީދު ހޯދުމަށްޓަކައި ޒައީމް މައުމޫން އަބްދުލްގައްޔޫމް ބައިވެރިވެވަޑައިގަންނަވާ ޚާއްސަ ޖަލްސާއެއް މިރޭ ކ. ގުރައިދޫގައި ބާއްވާ ގޮތަށް ހަމަޖައްސައިފި އެވެ.
ކުރީގެ ރައީސުލްޖުމްހޫރިއްޔާ އަދި ޑީއާރްޕީގެ ޒައީމް މައުމޫންގެ ތަރުޖަމާނު މުހައްމަދު ހުސެން ޝަރީފް (މުންދު) މިއަދު ވިދާޅުވީ، މިރޭ ކ. ގުރައިދޫގައި ބާއްވާ ޖަލްސާއަކީ މައުމޫން އަތޮޅުތަކަށް ފައްޓަވާ ސިލްސިލާ ކެމްޕޭނު ދަތުރުފުޅުތަކުގެ ފެށުން ކަމަށެވެ. އިންތިހާބު ފެށުމަށް ކުރިއަށް އޮތް މަދު ދުވަސްކޮޅުގެ ތެރޭގައި އެ މަނިކުފާނަށް ހުރިހާ ރަށަކަށް ވަޑައިނުގެންނެވުނު ނަމަވެސް، ގިނަ އަތޮޅުތަކަށް ވަޑައިގަންނަވާނެ ކަމަށް މުންދު ވިދާޅުވި އެވެ.
މިރޭ ގުރައިދޫގައި ބާއްވާ ޖަލްސާއަށް ފަހު ދެން ޒައީމް މައުމޫން ވަޑައިގަންނަވާނީ ހދ. ކުޅުދުއްފުއްޓަށް ކަމަށާއި ކުޅުދުއްފުށީ ޖަލްސާ އޮންނާނީ އަންނަ ހުކުރު ދުވަހުގެ ރޭ ކަމަށެވެ.
މިރޭ ގުރައިދޫގައި ޒައީމް މައުމޫންގެ ޖަލްސާއެއް ބާއްވާއިރު، އެ ޖަލްސާގައި ތަސްމީން ބައިވެރިވެވަޑައިއެއް ނުގަންނަވާނެ އެވެ. ޑީއާރްޕީގެ މީޑިއާ ކޯޑިނޭޓާ އަލީ ސޯލިހު ވިދާޅުވީ، މާކުރިން ހަމަޖެހިފައި އޮތް ޑީއާރްޕީގެ ޖަލްސާއެއް މިރޭ ކ. ތުލުސްދޫގައި އޮންނާނެ ކަމަށާއި ތަސްމީން ވަޑައިގަންނަވާ ގޮތަށް ހަމެޖިފައި އޮތީ އެ ޖަލްސާއަށް ކަމަށެވެ.
ކުޅުދުއްފުށީގައި އޮންނަ ޖަލްސާގައި ތަސްމީން ބައިވެރިވެވަޑައިގަންނަވާނެތޯ ދެންނެވުމުން ސޯލިހު ވިދާޅުވީ އެ ސުވާލަށް ޖަވާބު ދެއްވެން ނެތް ކަމަށެވެ. ނަމަވެސް ތަސްމީނާ އެކު ޑީއާރުޕީގެ 30 މެންބަރުންގެ ވަފުދެއް މާދަމާ ގއ. އަދި ގދ.ގެ ރަށްތަކަށް ފުރާވަޑައިގަންނަވާނެ ކަމަށް އޭނާ ވިދާޅުވި އެވެ.
މުންދު މިއަދު އިތުރަށް ވިދާޅުވީ، ކެމްޕެއިން ޖަލްސާތައް ރާވާފައި ވަނީ ޚަރަދަށާއި ވަގުތައް ބަލައިގެން ކަމަށާއި އަދި ޖަލްސާއެއް ބާއްވާ ރަށަކަށް ކައިރި އެހެން ރަށްރަށުން ވެސް މީހުންނަށް އާދެވޭނެ ގޮތަކަށް ބަލައިގެން ކަމަށެވެ.
"އަޅުގަނޑުމެން މިހާރު ފޯކަސް މިކުރަނީ ވަޑައިގަންނަވާ ރަށަކީ ހަބެއް ކަމަށް ބަލައިފައި ކައިރީގައި ހުންނަ އެހެން ރަށްރަށަށް އަޅުގަނޑުމެން މި ދަންނަވަނީ ވަޑައިގަންނަވާށޭ. އެހެންވީމާ، މިސާލަކަށް ގުރައިދޫގެ ޖަލްސާ ވެގެންދާނީ ގުރައިދޫގައި އޮންނަ ޖަލްސާއަކަށް ވިޔަސް، މިސާލަކަށް މާފުށީ ބޭފުޅުންނާއި ގުޅީ ބޭފުޅުން ވެސް ބައިވެރިވެވަޑައިގަންނަވާނެ،" މުންދު ވިދާޅުވި އެވެ.