ޕާކިސްތާނުގެ ދިފާއީ ޚަރަދުތައް 20 އިންސައްތައަށް އިތުރުކޮށްފިއެވެ. އެ ގައުމުގެ ސަރުކާރުން އަންގާރަ ދުވަހު އިއުލާންކުރި 2025-2026 ވަނަ އަހަރުގެ ބަޖެޓުގައި ދިފާއީ ޚަރަދު ނުވަ ބިލިއަން ޑޮލަރަށް އިތުރުކޮށްފައިވާއިރު، މިއީ މި މަހު ނިމޭ މާލީ އަހަރާ އަޅާބަލާއިރު 20 އިންސައްތަ އިތުރު އަދަދެކެވެ. ނަމަވެސް، ޖުމުލަ ޚަރަދު ވަނީ 62 ބިލިއަން ޑޮލަރު (ހަތް އިންސައްތަ)އަށް ކުޑަކޮށްފައެވެ. މި ބަޖެޓުން ދައްކައިދެނީ ވޭތުވެދިޔަ 30 އަހަރު ދުވަހުގެ ތެރޭގައި ނިއުކްލިއާ ހަތިޔާރުގެ ދެ ބާރު ކަމަށްވާ އިންޑިއާއި ޕާކިސްތާނާއި ދެމެދު ހިނގި ސީރިއަސް ހަމަނުޖެހުންތަކާ ގުޅިގެން ޕާކިސްތާނުގެ އަސްކަރިއްޔާ ކުރިއެރުވުމަށް ބޮޑުވަޒީރު ޝެހްބާޒް ޝަރީފް ކުރައްވާ މަސައްކަތް ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ. ދިފާއީ ޚަރަދުތައް 20 އިންސައްތައަށް އިތުރުކުރާނެ ކަމަށް އިގުތިސާދީ މާހިރުން ކުރިން ވެސް ލަފާކޮށްފައިވާއިރު، ޕާކިސްތާނުން ދެން ޖެހޭނީ ތަރައްގީއަށް ކުރާ ޚަރަދު ކުޑަކުރަން ކަމަށް އިގުތިސާދީ މާހިރުންނާ ހަވާލާދީ ރޮއިޓާސްއިން ރިޕޯޓުކޮށްފައިވެއެވެ. ކުރިއަށް އޮތް މާލީ އަހަރު 4.2 އިންސައްތައަށް އިގުތިސާދީ ދުވެލި ހަލުއިވާނެ ކަމަށް ޕާކިސްތާނުން ލަފާކޮށްފައި އޮތް ނަމަވެސް، މި ހިނގާ މާލީ އަހަރު އިގުތިސާދީ ދުވެލި ހަލުއިވާނީ 2.7 އިންސައްތައަށް ކަމަށް ޕާކިސްތާނު ސަރުކާރުން ވަނީ ބުނެއެވެ. ދެކުނު އޭޝިއާގެ އެހެން ގައުމުތަކާ އަޅާބަލާއިރު، ޕާކިސްތާނުގެ އިގްތިސާދީ ކުރިއެރުން އޮތީ ވަރަށް ދަށުގައެވެ. މިދިޔަ އަހަރު ދެކުނު އޭޝިއާގެ ގައުމުތަކުގެ އިގުތިސާދީ ކުރިއެރުން އެވްރެޖްކޮށް 5.8 އިންސައްތައިގައި މަތިވެފައިވާއިރު، އޭޝިއަން ޑިވެލޮޕްމަންޓް ބޭންކުން ލަފާކުރާ ގޮތުގައި 2025 ވަނަ އަހަރު އެ އަދަދު 6.0 އިންސައްތައަށް މަތިވާނެއެވެ. އޭޕްރީލް މަހުން މާރިޗު މަހުގެ ނިޔަލަށް އިންޑިއާގެ 2025-2026 ވަނަ އަހަރުގެ ދިފާއީ ޚަރަދު 78.7 ބިލިއަން ޑޮލަރަށް އިތުރު ކުރުމަށް ކަނޑައަޅާފައިވާއިރު، މިއީ އޭގެ ކުރީ އަހަރާ އަޅާބަލާއިރު ގާތްގަނޑަކަށް 10 އިންސައްތަ އިތުރު އަދަދެކެވެ. ޕާކިސްތާނާއި އިންޑިއާއި ދެމެދު މި ފަހުން ގުޅުން ގޯސްވެފައިވަނީ މިދިޔަ އޭޕްރީލް ކަޝްމީރުގެ އިންޑިއާ ފަޅިއަށް ދިން ހަމަލާއެއްގައި އިންޑިއާގެ 25 މީހަކާއި ނޭޕާލް މީހަކު މަރުވި ހާދިސާއާ ގުޅިގެންނެވެ. އިންޑިއާއިން ތުހުމަތުކުރާ ގޮތުގައި އެ ހަމަލާ ދިނީ ޕާކިސްތާނުންނެވެ. ނަމަވެސް، ޕާކިސްތާނުން އެކަން ދޮގުކުރެއެވެ. އެ ހަމަލާއާ ގުޅިގެން ދެ ގައުމުގެ ސަރަހައްދީ ރޮނގުކައިރީގައި ހަމަލާތައް ބަދަލުކޮށްފައިވެއެވެ.