ޣައްޒާގައި ނޫސްވެރިން ދަތުރުކުރަމުންދިޔަ އުޅަނދަކަށް އިސްރާއީލްގެ ހައްދުފަހަނައަޅާފައިވާ އސްކަރިއްޔާއިން ދިން ވައިގެ ހަމަލާއެއްގައި 3 ނޫސްވެރިން ޝަހީދުވެއްޖެއެވެ. 
މި ހާދިސާ ހިނގާފައިވަނީ ޖެނުއަރީ 21 ވީ އަންގާރަ ދުވަހުގެ ހެނދުނު ގާތްގަނޑަކަށް 11:30 ހާއިރެވެ.
މި ހިތާމަވެރި ހާދިސާއާ ގުޅިގެން، ހަނގުރާމައިގެ ޚަބަރުތައް ފަތުރާ ނޫސްވެރިންގެ ސަލާމަތާއި ރައްކާތެރިކަމާ މެދު ބައިނަލްއަގުވާމީ ފެންވަރުގައި އަނެއްކާވެސް ވަނީ ބޮޑެތި ކަންބޮޑުވުންތަކެއް އުފެދިފައެވެ.
ކަމާބެހޭ އިދާރާތަކާއި އެ ސަރަހައްދުގައި ހަރަކާތްތެރިވި ނޫސްވެރިން މައުލޫމާތު ދޭ ގޮތުގައި، މި ހަމަލާ ދީފައިވަނީ އިންސާނީ އެހީއަށް ބޭނުންވެފައިވާ މީހުން ދިރިއުޅޭ ސަރަހައްދެއްގެ ކައިރީގައި، އެ މީހުންގެ ހާލަތު ރިޕޯޓްކުރުމަށް އެ ނޫސްވެރިން ދަތުރުކުރަނިކޮށެވެ. އަލް ޖަޒީރާއިން ރިޕޯޓްކުރިގޮތުގައި ޝަހީދުވި މީހުންގެ ތެރޭގައި ބައިނަލްއަގުވާމީ ޚަބަރު ފަތުރާ އިދާރާތަކަށް ގަވާއިދުން މައުލޫމާތާއި މަންޒަރުތައް ފޯރުކޮށްދޭ ފްރީލާންސް ކެމެރާމަނަކު ވެސް ހިމެނެއެވެ. 
އިޒްރޭލުގެ އަސްކަރިއްޔާއިން ބުނި ގޮތުގައި، މި ހަމަލާ އަމާޒުކުރީ އެމީހުންގެ ސިފައިންނަށް ނުރައްކާވާ ފަދަ އާލާތްތަކެއް ބޭނުންކުރަމުން ދިޔަ ބަޔަކަށެވެ. ނަމަވެސް މިކަމުގެ އެއްވެސް ހެތްކެއް އަދި އިތުރު ތަފްސީލެއް އެމީހުން ނުދެއެވެ. މީޑިއާ ޖަމިއްޔާތަކާއި ނޫސްވެރިކަމުގެ މިނިވަންކަމަށް ވަކާލާތުކުރާ ގްރޫޕްތަކުން ވަނީ އިސްރާއީލްގެ އެ ވާހަކަތައް ދޮގުކުރެއެވެ. އެ ފަރާތްތަކުން ބުނާ ގޮތުގައި، ހަމަލާ ދިން ވަގުތު އެ ނޫސްވެރިން ތިބީ ސާފުކޮށް އެނގޭނޭހެން ނޫސްވެރިކަމުގެ މަސައްކަތްތަކުގައި މަޝްޣޫލުވެގެންނެވެ.
ޝަހީދުވި ނޫސްވެރިންނާއެކު މަސައްކަތްކުރި މީޑިއާ އިދާރާތަކުން ވަނީ މި ހާދިސާއާ ގުޅިގެން ނުހަނު ބޮޑަށް ހިތާމަ ފާޅުކޮށް، މިކަމުގެ މިނިވަން އަދި ދެފުށް ފެންނަ ތަހުގީގެއް ހިންގުމަށް ގޮވާލާފައެވެ. ބައިނަލްއަގުވާމީ މުއައްސަސާތަކުން އިންޒާރު ދޭ ގޮތުގައި، ޣައްޒާއަކީ މިހާރު ދުނިޔޭގައި ނޫސްވެރިންނަށް އެންމެ ނުރައްކާތެރި އެއް ސަރަހައްދެވެ. ނޫސްވެރިންނަށް ވައިގެ ހަމަލާތަކާއި، ދަތުރުފަތުރުގެ ހުރަސްތަކުގެ އިތުރުން ރައްކާތެރިކަމުގެ ވަސީލަތްތަކުގެ ދަތިކަން ވަނީ އިންތިހާއަށް ކުރިމަތިވެފައެވެ.