ސިޔާސީ ޕާޓީތަކަށް މެންބަރުން ވެއްދުމުގައި އީ-ގަވަނަންސް ބޭނުންކުރަން އިލެކްޝަންސް ކޮމިޝަނުން ނިންމާއިރު އީ-ގަވަރނަންސްއަށް ކުރެވޭނީ ވަކީން ކޮން އިތުބާރެއް ހެއްޔެވެ. ރަސްމީ އިދާރާތަކުގައި އީ-ގަވަރނަންސް ވިއުގައަށް އެކްސަސްވެވޭ ހިސާބުގައިތިބި މީހުންގެ ތެދުވެރިކަން ނެތުނީމާ އެ ވިއުގައިގެ ތެރެއިން ވައްކަން ނުކުރާނެ ކަމަށް ގަބޫލު ކުރާނީ ކިހިނެއް ހެއްޔެވެ. 
އައިޑީކާޑް ގެ ޑިޖިޓަލް ނިޒަމަކީވެސް ވަރަށް ބޮޑަށް ރައްކާތެރި ކުރެވިފައިވާ އިތުބާރުހުރި ނިޒާމެއްކަމަށް އެންމެންވެސް ތިބީ ގަބޫލުކޮށްގެންނެވެ. ބޭނުންހާ ބަޔަކަށް ބޭނުންހާކަމެއް އެ ނިޒާމުގެ ތެރެއަކުން ކޮންމެ ކޮންމެ މީހަކަށް ނުކުރެވެއެވެ. އެހެނެއްކަމަކު އެ ވިއުގައަށް ވަދެވޭ ހިސާބުގައި ތިބި މީހުން ބޭނުންކޮށްގެން ވެރިކަމުގައި ތިބި މީހުން އެތިބީ މީހުންގެ ޒާތީ މައުލޫމާތުން ވައްކަން ކޮށްގެންނެވެ. 
ސިޔާސީ ޕާޓީއަށް މެންބަރުން ވެއްދުމަށް ގާއިމުކޮށްފައިވާ ނިޒާމަކީވެސް އެހާ ބަލިކަށި ނިޒާމެއް ނޫނެވެ. ޕާޓީއެއްގެ މެންބަރަކަށް މީހަކަށް ވެވެނީ އައިޑީ ކާޑުގައިވާ މައުލޫމާތުގެ އިތުރަށް އެ މީހެއްގެ ފިންގަރ ޕްރިންޓްވެސް އޮވެގެންނެވެ. ދެ ހެކިވެރިއެއްގެ ހެކިބަސް ލިބިގެންނެވެ. ހެކިވެރިންގެ އަައިޑީ ނަންބަރާއި ސޮއާއި ފިންގަރ ޕްރިންޓްވެސް ލިބިގެންނެވެ. މީހަކު ވަންނަން ބޭނުންވާ ޕާޓީއަކުން ވެރިފައިކޮށް އެކަން ބަލައިގަނެ ވެރިއަކު ސޮއިކޮށް އިލެކްޝަނަށް ހުށަހަޅައިގެންނެވެ. ހަމައެއާއެކު އެ މީހެއްގެ ފޯނަށް ކޮންފޮމޭޝަން ނޮޓިފިކޭޝަންވެސް ލިބިގެންނެވެ. އެ ހުރިހާ ކަމެއް އެހެން ހުރިއިރު ވެރިކަން ކުރާފަރާތުން އެޔެއްމިޔެއް ނުބަލާ ޒާތީ މައުލޫމާތުން ވައްކަންކޮށްގެ ނިޒާމް ނުހަމަގޮތުގައި ބޭނުން ކޮށްގެން މަކަރާ ހީލަތް ހެދީމާ އެއްވެސް ނިޒާމެއްގައި އިތުބާރެއް ނުއޮންނާނެއެވެ. 
މީހުންގެ ޒާތީ މައުލޫމާތުން ވެރިން ވައްކަން ކުރަން ބޭނުންވީމާ މެންބަރޝިޕަށް އެދޭ ފޯމުގައި ޖަހާފައި ހުރީ ސައްހަ ފޮޓޯއެއްތޯއެއް ބެލުމެއް ނޯވެއެވެ. ކޮށްފައި އޮތީ ފޯޖުކުރި ސޮއެއްތޯ ބެލުމެއްވެސް ނޯވެއެވެ. ޖަހާފައިވާ ފިންގަރ ޕްރިންޓް ތަކުގެ ސައްހަކަމެއް ބެލުމެއް ނޯވެއެވެ. ވެރިފިކޭޝަން މެސެޖު ދަނީ އަސްލު މީހާގެ ފޯނަށްތޯ ޔަގީނެއް ނުކުރެއެވެ. ވައްދާހާ ފޯމެއް ޕްރޮސަސް ކޮށްލަނީއެވެ. 
އީ-ގަވް އިން އެކަން ކުރިޔަސް ވަގު އީ- ފާސް ހަދައިގެންނާއި އެގޮތް މިގޮތުން ގަޑުބަޑުކުރަން ސަރުކާރުގެ ވެރިން ދިމާކުރީމާ އީ-ފާހަކަސް އެހެން އެއްޗަކަސް އެއްވެސް ތަފާތެއް ނުއޮންނާނެއެވެ. ވައްކަން ކުރެވޭނެއެވެ.
މީސްމީހުން ރަޖިސްޓްރީ ކޮށްފައި ހުންނަ ކުންފުނިތަކުގެ ހިއްސާދާރުންނަށް ނޭނގި އެހެން މީސްމީހުނަށް އެކުންފުނިތައްް ބަދަލު ކޮށްލެވޭ އީ-ގަވަރނަންސް އަކަށް އިތުބާރު ކުރެވޭނީ ކިހިނެއް ހެއްޔެވެ. 2019 ގައި ރަޖިސްޓްރީކޮށްގެން ހިންގަމުން އަންނަ ކުންފުންޏެއްގެ ހިއްސާދާރުން ގަދަވެ ސަލާމަތުން ދުނިޔޭގައި ތިއްބާ އެމީހުންނަށް ވަގަށް ސަރުކާރުތެރެއިން ބަޔަކު ގުޅިގެން ކުންފުނީގެ ހިއްސާދާރުން ބަދަލު ކުރުމުގެ މައްސަލައެއް އެއްވެސް ފިޔަވަޅެއްނާޅާ މިހާރުވެސް އެކޮނޮމިކް މިނިސްޓްރީއާއި ފުޕުލުސް އޮފީހާއި ރައީސުލްޖުމްހޫރިއްޔާގެ މޭޒުމަތީގައި އެއޮތީއެވެ. އީ-ގަވަރނަންސްގެ ހާލު ހުރި ގޮތަކީ މިއީއެވެ. އިލެކްޝަނުން ބުނީތީ އެވަރުގެ ނިޒާމަކަށް އިތުބާރުކޮށްގެން އަނެއްކާވެސް ތިބެން ވީހެއްޔެވެ. ނޫނެކެވެ. ތިބެވޭކަށް ނެތެވެ. އޮތްހާވެސް ހައްލަކީ މުއިއްޒު ވެރިކަމުން ބޭލުމެވެ.