(ނ.ހެނބަދޫ) އާބާދީގައި 724 މީހުން ދިރިއުޅޭ ނ.ހެނބަދޫ ސްކޫލުގައި ޖުމްލަ 163 ދަރިވަރުން އަންނަނީ ތައުލީމު ހާސިލްކުރަމުންނެވެ. ގްރޭޑް ދިހައަކާ ހަމައަށް ހެނބަދޫ ސްކޫލުގައި ތައުލީމު ފޯރުކޮށްދެމުން އަންނައިރު، މި ސްކޫލަކީ ނ އަތޮޅަށް ބަލާއިރު ތައުލީމީގޮތުން ފާހަގަ ކޮށްލެވޭ ސްކޫލެކެވެ.
ހެނބަދޫ ސްކޫލަށް "ވަގުތު" ޓީމުން ޒިޔާރަތްކޮށް ސްކޫލުގެ ސީނިއަރ މެނޭޖްމެންޓާއި ވާހަކަ ދައްކާލަން ލިބުނު ފުރުސަތުގައި އެނގިގެން ދިޔައީ މި ސްކޫލުގެ ދަރިވަރުންނަކީ ވަރަށް ރަނގަޅު އަޚްލާޤެއް ހިފަހައްޓަމުން އަންނަ ދަރިވަރުންތަކެއް އުޅޭ ސްކޫލެއްކަމެވެ. ގްރޭޑް 10 އަކާއި ހަމައަށް ހެނބަދޫ ސްކޫލުގައި ކިޔަވައިދޭއިރު ސްކޫލުގެ މެނޭޖުމެންޓުން ބުނީ ނ އަތޮޅަށްބަލާއިރު، އެންމެ ނަތީޖާ ރަނގަޅު ތިން ސްކޫލުގެ ތެރޭގައި ހެނބަދޫ ސްކޫލު ހިމެނެއެވެ.
25 ޓީޗަރުންނާއެކު މި ސްކޫލު ހިންގަމުން އަންނައިރު، ސްކޫލަށް ދިމާވެފައިވާ އެންމެބޮޑު ދައްޗަކީ ޖާގައިގެ ދަތިކަމެވެ. ލައިބްރަރީގެ ޚިދުމަތް ކޮންމެވެސް ގޮތަކަށް ފޯރުކޮށްދެވުނު ނަމަވެސް އެތާނގައި ހުރި ފޮތްތައް "އަޕްޑޭޓް" ކުރުމުގައި ގޮންޖެހުންތައް ހުރިކަން ސްކޫލުގެ ވެރިން ފާހަގަ ކުރައްވައެވެ. "ސްކޫލުގައި އެބަހުރި ލައިބްރަރީ، ކޮމްޕިއުޓަރ ލެބެއް ޤާއިމް ކުރެވިފައި ހުރިނަމަވެސް ޖާގައިގެ ދަތިކަން ކުރިމަތިވެ، އެތަންވެސް މިހާރު ބޭނުންކުރަނީ ކްލާސްރޫމެއްގެ ގޮތުގައި" ސްކޫލުގެ ފަރާތުން ވާހަކަދެއްކެވި ޓީމުން ފާހަގަކުރެއްވިއެވެ. ހެނބަދޫ ސްކޫލުގައި ކިޔަވައިދެމުން އަންނަނީ ކޮމްބައިންޑް ސްޓްރީމެކެވެ. ބަޔޮލަޖީ އާއި ކެމިސްޓްރީ ގަޑިތަކަށް ބޭނުންވާ އެކްސްޕެރިމެންޓެއް ހަދާލާނެ ލެބޯޓްރީއެއް ނެތުމަކީވެސް ސްކޫލަށް ދިމާވެފައިވާ ގޮންޖެހުމެކެވެ.
"އަޅުގަނޑުމެން ވާނީ އެޑިއުކޭޝަނުގައިވެސް އެދިފައި އިތުރު ކްލާސްރޫމް އަށް ބޭނުންވާކަން. އެކަމަކު އެހެން ދަންނަވާކަށް ނޭނގެ ކޮން އިރަކުން ކަމެއް އެ ކަންތައް ހަމަޖެހޭނީ"
ހެނބަދޫ ސްކޫލުގެ ދަރިވަރުންގެ ކިޔެވުމަށް ފަސޭހަ ކުރުމަށް ލައިބްރަރީގައި ވަނީ އިންޓަނެޓްގެ ޚިދުމަތް ދޭން ފަށައިފައެވެ. އަދި ދަރިވަރުން ބޭނުންވެއްޖެ ހާލަތެއްގައި ވައިފައިގެ ޚިދުމަތްވެސް ދޭކަމަށް ސްކޫލުން ބުނެއެވެ. ފާއިތުވި އަހަރު ހެނބަދޫ ސްކޫލުން ގްރޭޑް 10 ނިންމި ދަރިވަރުންގެ 60 އިންސައްތަ ދަރިވަރުން ފަސް މާއްދާއިން ފާސްވެފައިވާއިރު، މިއަހަރުގެ އަމާޒަކީ އޯލެވެލް ހަދާ ހުރިހާ ކުދިންވެސް ފަސްމާއްދާއިން ފާސްވާވަރު ކުރުވުންކަމަށް ސްކޫލު މެނޭޖްމެންޓުން ބުނެއެވެ. "ދަސްވާރު ޕްރޮގްރާމްގެ ބައިވެރިންނާއެކު އެކަން ހާސިލްކުރުން އުއްމީދަކީ"
ހެނބަދޫ ސްކޫލުން ތައުލީމު ހާސިލްކުރި ދެ ދަރިވަރަކު ވަނީ ފާއިތުވިއަހަރުގެ އޯލެވެލް އިމްތިހާނުގެ ގަދަ ދިހައެއްގެ ދެވަނައިގައި ހިމެނިފައެވެ.
ސްކޫލުގެ ކުރިއެރުމަށް އޮތް އެންމެ ބޮޑު ހިތްވަރަކީ ޓީޗަރުންގެ މޯޓިވޭޝަން އާއި، ބެލެނިވެރިންގެ ފަރާތުން ސްކޫލުގެ ކަންކަމަށްލިބޭ ތާއީދުކަން ހެނބަދޫ ސްކޫލުގެ ސީނިއަރ މެނޭޖްމެންޓުން ފާހަގަކުރެއެވެ. "އަޅުގަނޑުމެންނަށް ލިބޭ އެންމެ ބޮޑު ހިތްހަމަ ޖެހުމަކީ ސްކޫލުގެ ޓީޗަރުންގެ މޯޓިވޭޝަން. އެބޭފުޅުންގެ ގުޅުން. ސްކޫލުން ކޮންމެވަގުތަކު ގުޅައިލިނަމަވެސް އެބޭފުޅުންގެ ފަރާތުން އެއްބާރުލުން ލިބޭ.  ދަރިވަރުންގެ އަޚްލާޤް އަޅުގަނޑުމެން ފާހަގަކުރަން. ބެލެނިވެރިންގެ ސަޕޯޓަކީވެސް އަޅުގަނޑުމެންނަށް ލިބޭ ވަރަށްބޮޑު ހިތްވަރެއް."
ދާދިފަހުން ބެލެނިވެރިން ވަނީ ހެނބަދޫ ސްކޫލުގެ ކްލާސްރޫމްތައް ޑިޖިޓަލައިޒް ކުރުމަށް 50 އިންޗީގެ އަށް ޓީވީ އެ ސްކޫލަށް ހަދިޔާކޮށްފައެވެ. މީގެ އިތުރުން ޕްރީސްކޫލް، ހެނބަދޫ ސްކޫލުގެ ދަށަށް ބަދަލުވުމާއެކު، އެކުދިންނަށް ބޭނުންވާނެ ޕްލޭ އޭރިޔާ ހެދުމަށް ކުރެވުނު މަސައްކަތުގައި ބެލެނިވެރިންގެ ފަރާތުން ލިބުނު އެއްބާރުލުން ސްކުލުގެ ފަރާތުން ވަރަށް ޝުކުރުވެރިކަމާއެކު ފާހަގަކުރެއެވެ.
ކިޔެވުމުގެ އިތުރުން އިތުރު ހަރަކާތްތައްވެސް ވަރަށް ކާމިޔާބު ކަމާއެކު ހެނބަދޫ ސްކޫލުން އަންނަނީ ހިންގަމުންނެވެ. އެގޮތުން އިންޓަސްކޫލް ފޮޓްބޯޅަ އާއި ބަށި މުބާރާތްތަކާއި ޤުރުޢާން މުބާރާތްތައްވެސް ކާމިޔާބު ކަމާއެކު ކޮންމެ އަހަރަކުވެސް އަންނަނީ ހިންގަމުންނެވެ. ނުރަސްމީގޮތެއްގައި ސްކައުޓުގެ ހަރަކާތް ހެނބަދޫ ސްކޫލުގައި ހިންގަމުން އަންނައިރު، މި ހަރަކާތްތައްވެސް އެންމެ އެދެވޭގޮތުގައި ހިންގުމަށް ބޭނުންވާނެ ޖާގަ އާއި ވަސީލަތްތައް ލިބުމަކީ ސްކޫލު މެނޭޖްމެންޓުން ކުރާ އުއްމީދެކެވެ.
ނއަތޮޅުގެ ނިސްބަތުން ތައުލީމީގޮތުން ފާހަގަކުރެވޭ ރަށަކަށް ހެނބަދޫ ވެފައިވާއިރު، ސްކޫލުގެ އަމާޒަކަށް ވެފައިވަނީ އަތޮޅުގެ ނިސްބަތުން އެއްވަނަ ސްކޫލަށްވުމެވެ. ރަށުގައި ތިބެގެން މަތީ ޘާނަވީ އިމްތިހާނު ނިންމައިލެވޭނެ ދުވަހަކަށް ރަށުގެ ރައްޔިތުން އިންތިޒާރު ކުރަމުންދާއިރު ސްކޫލުން ލިބެން ހުރި ތައުލީމާއިމެދު ބެލެނިވެރިންވެސް ތިބީ ނުހަނު ހިތްހަމަޖެހިފައެވެ.