މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އިންތިޒާމުކޮށްގެން ބާއްވާ ހިނގާލުން މިއަދު ހަވީރު މާލޭގައި އޮންނާނެއެވެ.
ކުރީގެ ރައީސް މުހައްމަދު ނަޝީދު ދޫކޮށްލުމަށް ގޮވާލައި، ބޭއްވުމަށް ހަމަޖެހިފައިވާ މި ހިނގާލުން ފެށުމަށް ހަމަޖެހިފައިވަނީ 16:00 ގައި އާޓިފިޝަލް ބީޗު ސަރަހައްދުންނެވެ.
މމާލޭގެ ބޮޑު މަގުތަކުގައި ކުރިއަށް ގެންދާ ހިނގާލުމުގައި އެމްޑީޕީ އަދި އަދާލަތު ޕާޓީގެ އިސްވެރިން ބައިވެރިވެވަޑައިގަންނަވާނެއެވެ. އަދި މި ހިނގާލުމުގައި ވީހާވެސް ގިނަ ބަޔަކު ބައިވެރިވުމަށް އެމްޑީޕީން އެދެއެވެ.
އެމްޑީޕީން ވަނީ މިއަދުގެ ހިނގާލުން މަގްރިބު ނަމާދަށް ނިންމާލާނެ ކަމުގެ ޔަގީންކަން ފުލުހުންނަށް ދީފައެވެ. އަދި މިއަދުގެ ހިނގާލުމަކީ ސުލްހަވެރިކަމާއެކު ގާނޫނީ އިމުގެ ތެރެއިން ބާއްވާ ހަރަކާތްތަކެއްގެ ގޮތުގައި ބޭއްވުމަށް ފުލުހުން ވަނީ އެދިފައެވެ.
ފުލުހުން މައުލޫމާތުދޭ ގޮތުގައި ހިނގާލުން ބޭއްވިނަމަވެސް އެފަދަ ހިނގާލުމެއްގައި ހަތަރު ފުރޮޅީ އިންޖީނު އުޅަނދު ބޭނުން ނުކުރެވޭނެއެވެ. ހިނގާލުމުގެ ކުރިމަތިން އަދި ފަހަތުންވެސް ސައިކަލުތަކުގައި ދުއްވާފައި ދާ ފަރާތްތައް އެއްގަމު ދަތުރުފަތުރުގެ ގާނޫނާ ހިލާފަށް އަމަލުކުރާނަމަ އެފަރާތްތަކާމެދު އަޅަންޖެހޭ ފިޔަވަޅު އަޅާނެއެވެ.