އިދިކޮޅު އެމްޑީޕީއިން "މިންޖުވާން" ނަމުގައި މިއަދު ހަވީރު ބޮޑު ހިނގާލުމެއް ބޭއްވުމަށް ނިންމައިފިއެވެ.
"މިންޖުވާން" ނަމުގައި މިއަދު މާލޭގެ އިތުރުން ރާއްޖޭގެ ގިނަ ރަށްތަކެއްގައި މި ހިނގާލުން ކުރިއަށްދާނެ ކަމަށް އެ ޕާޓީން ބުނެއެވެ. މާލޭގައި ހިނގާލުން ފެށުމަށް ހަމަޖެހިފައިވަނީ އާޓިފިޝަލް ބީޗް ސަރަހައްދުންނެވެ. އެހެން ރަށްރަށުގައި ހިނގާލުން ފަށާނީ އެ ރަށެއްގެ އެމްޑީޕީގެ ހަރުގެއިންނެވެ.
މާލޭގައި ހިނގާލުން ފެށުމަށް ހަމަޖެހިފައިވަނީ މިއަދު ހަވީރު ހަތަރެއް ޖަހާއިރުއެވެ. ވީހާވެސް ގިނަ ފަރާތްތަކުން މި ހިނގާލުމުގައި ބައިވެރިވުމަކީ އެ ޕާޓީގެ އެދުމެކެވެ.
މި ހިނގާލުމަކީ 13 އަހަރަށް ޖަލަށް ލާފައިވާ ކުރީގެ ރައިސުލްޖުމްހޫރިއްޔާ އަދި އެމްޑީޕީގެ ރައީސް މުހައްމަދު ނަޝީދު ދޫކޮށްލުމަށް ގޮވާލައި، އަނިޔާވެރިކަން ހުއްޓާލުމަށް ގޮވާލައި ކުރިއަށް ގެންދާ ހިނގާލުމެކެވެ.
އެމްޑީޕީއިން މަގުމަތީ ހަރަކާތްތައް މަޑު ޖައްސާލުމަށްފަހު އަނެއްކާ މަގުމަތީ ހަރަކާތްތައް ފަށާފައިވަނީ އދގެ ވޯކިން ގުރޫޕުން ރައީސް ނަޝީދު ދޫކޮށްލުމަށް ގޮވާލުމާ ގުޅިގެން އެކަމަށް ސަރުކާރަށް ޕްރެޝަރުކުރުމުގެ ގޮތުންނެވެ.
އެމްޑީޕީ، އަދާލަތު ޕާޓީގެ ރައީސް އިމްރާން އަބްދުﷲއަށް ތާއިދުކުރާ ފަރާތްތައް އަދި ކުރީގެ ޑިފެންސް މިނިސްޓަރ މުހައްމަދު ނާޒިމަށް ތާއިދުކުރާ ފަރާތްތައް ގުޅިގެން އަންނަ މަހު ހަ ވަަނަ ދުވަހު ރަށްރަށުން މީހުން މާލެ ގެނެސް، މާލޭގައި ބޮޑު އެއްވުމެއް ބޭއްވުމަށް ދަީ ތައްޔާރުވަމުންނެވެ.