ފާއިތުވި 24 ގަޑިއިރު މާލެއަށް ކުރި ބޯ ވިއްސާރައިގައި ފެންބޮޑުވުމުގެ ސަބަބުން ބައެއް ގޭގޭގެ ފާހާނައިން ނަޖިސް ލީކުވެ އާންމު ދިރިއުޅުމަށް ހުރަސް އެޅޭ ހާލަތަށް ކަންކަން ގޮސްފިއެވެ.
އިއްޔެ ހެނދުނު 8:00 އިން ފެށިގެން މިއަދު ހެނދުނު 8:00 އަށް މާލެއަށް 130 މިލިލީޓަރުގެ ވާރޭ ވެހިފައިވެއެވެ. މަގުތަކުގައި ފެންބޮޑުުވުމުގެ ސަބަބުން ރޭ ފަތިހުން ފެށިގެން ދިފާއީ ބާރުން ވަނީ އެހީތެރިކަން ބޭނުންވާ ގޭގެއަށް އެހީ ފޯރުކޮށްދީ މަގުތަކުން ފެން ބޭރުކުރުމުގެ މަސައްކަތް ކޮށްފައެވެ.
ބޯކޮށް ވާރޭވެހި މާލޭގައި ފެންބޮޑުވެގެން ވެލިބަސްތާ ޖެއްސުމާއި ފެން ހިއްކުމުގެ މަަސައްކަތް ސިފައިންނާއި ފުލުހުން އަދި ސިޓީ ކައުންސިލް ގުޅިގެން ވަނީ ކޮށްފައެވެ. އަދި ނެޝަނަލް ޑިސާސްޓާ މެނޭޖުމަންޓް އޮތޯރިޓީން ވަނއީ ރެއިން ފެށިގެން ގޭބިސީތަކުގެ ހާލަތު ގާތުން މޮނީޓާ ކުރަން ފަށާފައެވެ.
އެ އިދާރާއިން ކުރި ޕޯސްޓެއްގައި ބުނީ ބައެއް ގޭގޭގެ ފާހާނާތަކުން ނަޖިސް ލީކުވުމާއި ކައްކާ ކައިބޮއެ ހެދުމަށް ބުރޫ އަރާ އާންމު ދިރިއުޅުމަށް ހުރަސްއެޅިފައިވާ ހާލަތަށް ގޮސްފައިވާ ކަމަށެވެ. އެފަދަ ހަތް ގޭބިސީއަކުން 44 މީހަކަށް އެއް ދުވަހަށް ވަގުތީ ބޯހިޔާވަހިކަމާއި ކެއިން ބުއިންމުގެ އިންތިޒާމު އެ އޮތޯރިޓީން ވަނީ ހަމަޖައްސައިދީފައެވެ.
ދިފާއީ ބާރުން ވަނީ މިހާތަނަށް 104 ގެއަކަށް އެހީތެރިކަން ފޯރުކޮށްދީ، 528 ވެލި ބަސްތާ ޖަހައިދީފައެވެ. މާލޭގެ މަގުތަކުން 18,000 އަށް ވުރެ ގިނަ ޓަނުގެ ފެން ވަނީ ބޭރުކޮށްފައެވެ.