މިދިޔަ ހަފްތާގެ އަންގާރު ދުވަހުން ފެށިގެން އެމެރިކާގެ ލޮސް އޭންޖަލަސް (އެލްއޭ) ގައި ރޯވި އަލިފާން އަދިވެސް ނިއްވާނުލެވޭކަމަށް އެގައުމުގެ ކަމާ ބެހޭ ފަރާތްތަކުން ބުނެފިއެވެ.
މިހާތަނަށް 6 ސަރަހައްދަކަށް މި އަލިފާންގަނޑު ފެތުރިފައިވާއިރު، މި ހާދިސާއާއި ގުޅިގެން 11 މީހަކު ވަނީ މަރުވެފައެވެ.
ގަދަ ވަޔާއި ގިނަ ދުވަހު ވާރޭ ނުވެހުމުގެ ސަބަބުން ރޯވިކަމަށް ލަފާކުރާ މި އަލިފާންގަނޑު އިއްޔެ އެ ސަރަހައްދުގެ ބްރެންޓްވުޑް ނެއިބާހުޑް އާއި ދިމާލަށް މިސްރާބުޖެހުމާއި ގުޅިގެން އެ ސަރަހައްދުން މީހުން ހުސްކުރުމަށް އަމުރު ނެރެފައިވާއިރު، އެލްއޭގެ ކައުންޓީ އޮފީސް އޮފް އެމަޖެންސީ މެނޭޖްމަންޓްގެ ތަރުޖަމާނު ޖީސަސް ރުއިޒް ވިދާޅުވީ، އަލިފާންގަނޑު ވަރަށް އަވަސް ސްޕީޑެއްގައި ފެތުރެމުންދާކަމަށެވެ.
Advertisement
އޭނާ ވިދާޅުވީ، އެ ސަރަހައްދުގެ ގިނަ އަދަދެއްގެ އާއްމުން ދިރިއުޅޭ ސަރަހައްދަކަށް އަލިފާންގަނޑު ފެތުރެމުންދާތީ އެކަން ހުއްޓުވުމަށް މަސައްކަތްކުރަމުންދާކަމަށާއި، އެކަމާއި ގުޅިގެން ނުހަނު ކަންބޮޑުވާކަމަށެވެ.
މި ހާދިސާ އާއި ގުޅިގެން އެލްއޭގައި އުޅޭ 153,000 މީހުން އެމީހުންގެ ގެދޮރު ދޫކޮށް ގޮސްފައިވާއިރު، 10,000 އަށްވުރެ ގިނަ އިމާރާތްވަނީ އަލިފާނުގައި އަނދައިގެން ގޮސްފައެވެ.
ލޮސް އޭންޖަލަސްގެ ބޮޑު ސަރަހައްދެއް އަނދާފައި؛ 8 ބިލިއަން ޑޮލަރަށް ވުރެ ބޮޑު ގެއްލުމެއް ލިބޭނެކަމަށް ލަފާކޮށްފައިވޭ-- ފޮޓޯ: ޕޯސްޓް ގެޒެޓް
މިއީ އެލްއޭގެ ތާރީހުގައި ކުރިމަތިވި އެންމެ ނުރައްކާތެރި ހާދިސާއަށްވާއިރު، މި ހާދިސާގައި މިހާތަނަށް ލިބުނު ގެއްލުމުގެ އަދަދު 8 ބިލިއަން ޑޮލަރަށްވުރެ މައްޗަށް އަރާނެކަމަށް ވަނީ ލަފާކޮށްފައެވެ.
ޕެލިސައިޑްސް: މިއީ އެންމެ ފުރަތަމަ އަލިފާން ރޯވި އަދި އެންމެ ބޮޑަށް ގެއްލުން ލިބުނު ސަރަހައްދަށް ކަމަށްވާއިރު، މި ސަރަހައްދުގެ 21،000 އަކަފޫޓު އަދާފައިވާއިރު، އޭގެ ތެރޭގައި އަޕްމާކެޓް ޕެސިފިކް ޕެލިސޭޑްސް ނެއިބަރހުޑް ވެސް ހިމެނެއެވެ. މި ސަރަހައްދުގައި ރޯވެފައިވާ އަލިފާންގަނޑުގެ ކޮންޓްރޯލް ކުރެވިފައިވަނީ 8 އިންސައްތައެވެ.
އީޓަން: ލޮސް އެންޖެލިސްގެ އުތުރު ސަރަހައްދުގައި ރޯވެ، އަލްޓަޑެނާ ފަދަ ސިޓީތަކުގެ ތެރެއިން ރޯވެފައިވާއިރު، މި ސަރަހައްދުގެ  ގާތްގަނޑަކަށް 14،000 އަކަމީޓަރު އަދާފައިވާއިރު، މިއީ  އެ ސަރަހައްދުގައި ހިނގި ދެވަނައަށް އެންމެ ބޮޑު އަލިފާނުގެ ހާދިސާއެވެ. މީގެ ތެރެއިން މިހާތަނަށް ކޮންޓްރޯލް ކުރެވިފައިވަނީ 3 އިންސައްތައެވެ.
ހާސްޓް: ސެން ފަރނަންޑޯގެ  އުތުރުގައި އޮންނަ މި ރަށަށް އަލިފާނުގެ އަސަރުކޮށް، އަންގާރަ ދުވަހުގެ ރޭ އަނދަން ފެށިއިރު، 771 އަކަމީޓަރަށް ވަނީ އަސަރުކޮށްފައެވެ. މި ސަރަހައްދުގައި ރޯވި އަލިފާނުގެ 70 އިންސައްތަ ވަނީ މިހާރު ކޮންޓްރޯލް ކޮށްފައެވެ.
ލޮސް އޭންޖަލަސް އަނދަނީ-- ފޮޓޯ: ޕީޕަލް
ލިޑިއާ: މިދިޔަ ހަފްތާގެ ބުދަ ދުވަހުގެ މެންދުރު ފަހު ލޮސް އެންޖެލިސްގެ އުތުރުގައި އޮންނަ ފަރުބަދަމަތީ އެކްޓަން ސަރަހައްދުގައި ރޯވެ، ގާތްގަނޑަކަށް 400 އަކަމީޓަރުގެ ބިމަކަށް ވަނީ އަސަރުކޮށްފައެވެ. އެމެރިކާގެ ކަމާބެހޭ ފަރާތްތަކުން ބުނާ ގޮތުގައި މި ސަރަހައްދުގައި ރޯވި އަލިފާނުގެ 98 އިންސައްތަ ވަނީ ކޮންޓްރޯލް ކުރެވިފައެވެ.
ކެނެތު: ބުރާސްފަތި ދުވަހު ލޮސް އެންޖެލިސް އާއި ވެންޗޫރާ ކައުންޓީގެ ބޯޑަރުގައި ރޯވި މި އަލިފާނުގެ އަސަރު މިހާތަނަށް 1،000 އަކަފޫޓަށް ވުރެ ގިނަ ބޮޑު ސަރަހައްދަކަށް ހުއްޓިފައިވާއިރު، އެ އަލިފާންގަނޑު ފެތުރުން ހުއްޓުވައި އޭގެ 50 އިންސައްތަ ވަނީ ނިއްވާލާފައެވެ.
އާޗަރ: މި ސަރަހައްދުގައި ހުކުރު ދުވަހު އަލިފާން ރޯވެ 19 އަކަފޫޓަށް އަސަރުކޮށްފައިވާއިރު، މިހާތަނަށް މި އަލިފާންގަނޑު އެއްވެސް ވަރަކަށް ނިއްވާލުމުގައި ކާމިޔާބުވެފައެއް ނުވެއެވެ.
އެމެރިކާގެ އަލިފާން ނިއްވާ ފަރާތްތަކުގެ އިތުރުން ކެނެޑާއިން ވެސް އަންނަނީ މި އަލިފާންގަނޑު ނިއްވުމުގައި އެހީތެރިކަން ފޯރުކޮށްދެމުންނެވެ.