މާލޭގައި އިއްޔެ ރޭ ހިންގި ޚާއްސަ އޮޕަރޭޝަނެއްގައި ހަ ކޮފީޝޮޕެއް ބަލައި ފާސްކޮށް، ގަވާއިދާ ޚިލާފަށް އުޅެމުންދިޔަ 5 ބިދޭސީއެއް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.މި އޮޕަރޭޝަނަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ބައެއްކަމަށް އިމިގްރޭޝަނުން މަޢުލޫމާތު ދީފައިވެއެވެ. އިމިގްރޭޝަންގެ ޓާސްކުފޯހުން މާލޭގެ ކޮފީ ޝޮޕްތަކަށް ޚާއްސަކޮށްގެން ހިންގި މި ރެއިޑު އޮޕަރޭޝަންގައި 6 ތަނެއް ބަލައި ފާސްކުރެވުނެވެ.
ހައްޔަރުކުރެވުނު ފަސް ބިދޭސީންގެ ތެރޭގައި ހިމެނެނީ ބަންގްލަދޭޝް އަދި އިންޑިއާގެ ރައްޔިތުންކަމަށް އިމިގްރޭޝަނުން ހާމަކޮށްފައިވެއެވެ. މި ފަރާތްތަކުގެ ވިސާގެ ހާލަތު ބަލައި، ގަވާއިދާ އެއްގޮތަށް ފިޔަވަޅު އެޅޭނެ ކަމަށްވެސް އިމިގްރޭޝަނުން ބުނެފައިވެއެވެ.މި އޮޕަރޭޝަނާ ގުޅިގެން، ވިޔަފާރިތަކުގެ ވެރިންނަށް އިމިގްރޭޝަނުން އިލްތިމާސްކޮށްފައިވަނީ ގަވާއިދާ އެއްގޮތަށް ބިދޭސީން ގެންގުޅުމަށާއި، ގަވާއިދާ ޚިލާފަށް މަސައްކަތްކުރާ ބިދޭސީން ނުގެންގުޅުމަށެވެ. އަދި މިފަދަ ކަންކަން ފާހަގަކުރެވޭނަމަ އިމިގްރޭޝަނަށް ރިޕޯޓުކުރުމަށްވެސް އެދިފައިވެއެވެ.