ވޮޝިންޓަން ޕޯސްޓުގެ ރިޕޯޓުގައި ބުނެފައިވާ ގޮތުން އެމްޑީޕީގެ ލީޑަރުންނާއި އެ ޕާޓީގެ ފަރާތުން އިންތިހާބުތަކުގައި ވާދަކުރާ ކެންޑިޑޭޓުން ކަނޑައެޅުމުގައިވެސް އިންޑިޔާއިން މުހިއްމު ދައުރެއް އަދާކުރެ އެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިތާ ކުޑަ ދުވަސްކޮޅެއް ފަހުން އެމަނިކުފާނުގެ ސަރުކާރު ބަދަލުކޮށްލުމަށް އިދިކޮޅު އެމްޑީޕީން އިންޑިޔާގެ އެހީތެރިކަމަަށް އެދުމުން އިންޑިޔާގެ ޖާސޫސީ އިދާރާގެ އޮފިޝަލުންތަކެއް އެކަމުގައި އުޅުއްވި ވާހަކަ ގެނެސްދީ ވޮޝިންޓަން ޕޯސްޓުގައި ޝާއިއުކުރި ރިޕޯޓުގައި ފާއިތުވި އަހަރުތަކުގައި ރާއްޖޭގެ ސިޔާސީ މަސްރަހުގައި އިންޑިޔާއިން އަދާކުރަމުން އަންނަ ދައުރާ ގުޅޭ ބައެއް ތަފުސީލުތައް ހާމަކޮށްފި އެވެ. 
އެ ރިޕޯޓުގައި ބުނެފައިވާ ގޮތުން "ޑިމޮކްރެޓިކް ރިނިވަލް އިނިޝިއޭޓިވް"ގެ ނަމުގައި އެމްޑީޕީން ތައްޔާރުކުރި ކަރުދާހެއްގައި، ސަރުކާރު ހިންގާ ކޯލިޝަނުގެ ބައެއް މަޖިލިސް މެންބަރުން ހިމެނިވަޑައިގަންނަވާހެން 40 މަޖިލިސް މެންބަރަކަށް ރިޝްވަތު ދިނުމަށް އެ ޕާޓީން ރޭވި އެވެ. އަދި އަސްކަރިއްޔާގެ އިސް ދިހަ އޮފިސަރަކަށާއި، ފުލުހުންގެ އޮފިސަރުންނަށާއި މާލޭގެ ބާރުގަދަ ތިން ގޭންގަކަށް ފައިސާ ދީ އެކަމުގައި ބައިވެރިކުރަން އޮތީ ރާވާފަ އެވެ. 
މި ބަޣާވާތް ކާމިޔާބުކުރުމަށް އެކި ފަރާތްތަކަށް ފައިސާ ބެހުމަށް އެ ޕާޓީއަަށް ހަ މިލިއަން ޑޮލަރު ނުވަތަ 87 މިލިއަން ރުފިޔާ ބޭނުންވާނެކަމަށް އެ ލިޔުމުގައި ބުނެފައިވާކަމަށް ވޮޝިންޓަން ޕޯސްޓުގެ ރިޕޯޓުގައި ބަޔާންކޮށްފައިވެ އެވެ. އެތައް މަހަކަށް އެ ވާހަކަ ދިގުލައިގެންދިޔަ ނަމަވެސް އިންޑިޔާއިން އެ ފައިސާ ނުދިނުމާއެކު އެކަން ކާމިޔާބުނުވެ ނިމިގެންދިޔައީ އެވެ. 
އިންޑިޔާގެ މަސްއޫލުވެރިންނާއި ރާއްޖޭގެ ބައެއް ސިޔާސީ ފަރާތްތަކާވެސް މަޝްވަރާކުރެވިގެން މައުލޫމާތު ހޯދައިގެން އެކުލަވައިލި ރިޕޯޓުގައި ފާހަގަކުރި ގޮތުގައި އެމްޑީޕީގެ ލީޑަރުންނާއި އެ ޕާޓީގެ ފަރާތުން އިންތިހާބުތަކުގައި ވާދަކުރައްވާނެ ކެންޑިޑޭޓުން ކަނޑައެޅުމުގައިވެސް ބޮޑު ދައުރެއް އަދާކުރަމުން ދިޔަ އެވެ. ހާއްސަކޮށް ރައީސް އަބްދުﷲ ޔާމީނުގެ ވެރިކަމުގައި ޗައިނާއާއެކު އޮތް ގުޅުން ބަދަހިކުރެއްވުމާއެކު އިންޑިޔާއިން އެމްޑީޕީއަށް ދެމުންއައި މަދަދު އިތުރުކޮށްފައިވާކަން އެ ރިޕޯޓުގައި ފާހަގަކޮށްފައިވެ އެވެ. 
އެގޮތުން ރިޕޯޓުގައި ފާހަގަކުރި ގޮތުގައި 2023 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ކެމްޕެއިނަށް އެހީތެރިވުމަށް އިންޑިޔާއިން ޕޮލިން އެނަލިސްޓުންނާއި ކެމްޕެއިން ހަރަކާތްތައް އިންތިޒާމުކުރުމުގެ ތަޖުރިބާކާރުންގެ މައްޗަށް އެކުލެވޭ ޓީމެއް ރާއްޖެއަށް އައެވެ. އެ ޓީމު އައިސް އިންތިހާބާ ގުޅޭ މަސައްކަތްކުރުމުން އެއިރުވެސް ސަލާމަތީ ހިދުމަތްތަކުގެ އޮފިޝަލުން ކަންބޮޑުވުން ފާޅުކުރެއްވި ކަމަށްވެސް އެ ރިޕޯޓުގައި ބުނެފައިވެ އެވެ. 
އޭގެ އިތުރަށް އެމްޑީޕީގެ އެތެރޭގައި ފާއިތުވި ސަރުކާރުގައި އުފެދުނު ނުތަނަވަސްކަމުގައި އެ ޕާޓީގެ ކުރީގެ ރައީސް ރައީސް މުހައްމަދު ނަޝީދާއި، ޕާޓީގެ އިސްލީޑަރުގެ ގޮތުގައި ހުންނެވި އެއިރުގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާ ދެމެދުގައި އޮތް ނުތަނަވަސްކަަން ކުޑަކުރެއްވުމަށް އިންޑިޔާ ސަފީރު ސީދާ މަސައްކަތްކުރެއްވިކަން ރިޕޯޓުގައި ފާހަގަކޮށްފައިވެ އެވެ. އެގޮތުން ސީދާ ސަފީރު ރައީސް ނަޝީދާ ބައްދަލުކުރައްވަައި ދެ ބޭފުޅުން އެއްގަލަކަށް އެރުއްވޭތޯ މަސައްކަތްކުރެއްވި އެވެ. 
އަދި ޓްރާންސްޕޮންޑާ ނިއްވާލައިގެން ވަގަށް އިންޑިޔާއިން ވެލޭނާ އިންޓަނޭޝަނަލް އެއާޕޯޓަށް އައި ފުލައިޓެއްގައި އިންޑިޔާގެ އޮފިޝަލުންތަކެއް ރާއްޖެއަށް ވަޑައިގެން ކުރުނބާ އައިލެންޑް ރިސޯޓުގައި ސިއްރިއްޔާތުގައި ނަޝީދާ ބައްދަލުކުރައްވައި ރައީސް ސޯލިހަށް ތާއީދުކުރައްވާތޯ އާދޭސްކުރެއްވި ކަމަށް އެ ރިޕޯޓުގައި ބުނެފައިވެ އެވެ. 
މި ރިޕޯޓުގައި ތުހުމަތުކޮށްފައިވަނީ ރައީސް ވެރިކަމާ ހަވާލުވެވަޑައިގެންނެވިތާ ކުރީ ކޮޅުގައި އެމަނިކުފާނުގެ ވެރިކަން ބަދަލުކުރުމަށް ޕްލޭނުތައް ތައްޔާރުކުރަން އެމެރިކާގައި ހުންނަ އިންޑިޔާގެ ސަަފާރާގައި މަސައްކަތްކުރާ، އެގައުމުގެ ޖާސޫސީ އިދާރާ ރޯގެ އެޖެންޓަކު މަސައްކަތް ފެށި ކަމަށެވެ. އޭނާ އެކަމުގައި މަޝްވަރާކުރިކަމަށް ރިޕޯޓުގައި ބުނެފައިވާ އިންޑިޔާ ދެ މީހުންވެސް އެފަދަ ރޭވުމެއްގައި ބައިވެރިވިކަމަށް އެއްބަސްވެފައިވެ އެވެ. 
އަދި އެމްޑީޕީގެ އެތެރޭގައި ކުރިން އުޅުއްވި ބައެއް ބޭފުޅުންނާ ހަވާލާދީ އެ ރިޕޯޓުގައި ބަޔާންކުރި ގޮތުގައި އެމްޑީޕީއަށް އިންޑިޔާ މެދުވެރިގެން ފައިސާ ހޯދައިދެއްވަން ހުށަހެޅުއްވީ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) އެވެ. އޭނާއަކީ އެމްޑީޕީގެ ރައީސް އަދި ކުރީގެ ހާރިޖީވަޒީރު އަބްދުﷲ ޝާހިދުގެ އަރިސް ބޭފުޅެކެވެ. 
އެ ރިޕޯޓަށް ވާހަކަދެއްކެވި އިންޑިޔާގެ ނޭޝަނަލް ސެކިއުރިޓީ އެޑްވައިޒަރީ ބޯޑުގެ ކުރީގެ އޮފިޝަލެއް ވިދާޅުވި ގޮތުގައި އަނދުން ހުސައިނަކީ އިންޑިޔާގެ ޖާސޫސީ އިދާރާއަށް މުހިއްމު އެސެޓެކެވެ. އެ އިދާރާއިން ބޭނުންވާ ކަންކަމުގައި ވާހަކަދައްކަން ބޭނުންކުރާ ބޭފުޅެކެވެ. 
ބަޣާވާތް ނާކާމިޔާބުވާ ހާލަތުގައި 2024 ވަނަ އަހަރުގެ މަޖިލިސް އިންތިހާބުގައި އެ ޕާޓީގެ ކެމްޕެއިނަށް އެހީތެރިވުމަށް އިންޑިޔާއިން ފައިސާ ހޯދައިދެއްވިދާނެކަމަށް ހުށަހެޅުއްވީ ކެނދިކުޅުދޫ ދާއިރާގެ ކުރީގެ މަޖިލިސް މެންބަރު އަހްމަދު އީސަ އެވެ. 
މަޖިލީހުގެ ތެރެއިން ރައީސްގެ އިތުބާރު ނެތްކަމަށް ފާސްކުރަން އުޅުނު މަސައްކަތް ފެއިލުވެގެންދިޔައިރު އެކަމަށް އިންޑިޔާއިން ފައިސާގެ އެހީ ނުލިބުނެވެ. އަދި މަޖިލިސް އިންތިހާބުގައިވެސް އެމްޑީޕީއަށް އިންޑިޔާއިން ބޭނުންވި ވަރުގެ އެހީތެރިކަމެއް ނުލިބުނެވެ. އިންޑިޔާއިން އަށް މިލިއަން ޑޮލަރު ލިބޭނެކަމަށް އެމްޑީޕީން އުންމީދުކުރި ނަމަވެސް އެވަރަށް ފައިސާ ލިބިފައިނުވާކަމަށް ވޮޝިންޓަން ޕޯސްޓުގެ ރިޕޯޓުގައި ބުނެފައިވެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ