މިއީ ފަހުޒަމާންކަމަށްބުނެ މީހުންގެ ދިރިއުޅުމަށް ގެނެސްފައިވާ އެންމެ ނުބައި ބަދަލަކީ އަމިއްލަ އެދުން އިސްކުރުމެވެ. އެހެންމީހަކަށް ތިމާ އެއްވެސް ކަމެއް ކޮށްނުދޭއިރުވެސް އެހެން މީހުންގެ ކިބައިން ތިމާ ކަންކަމަށް ބޭނުންވުމާއި އަދި މީހަކަށް ތިމާ ކަމެއް ކޮށްނުދިނަސް ތިމާ އެދުނު ކަންތައް ކޮށްނުދީފިނަމަ ރުޅިއައުމުގެ އާދައަކީވެސް ހަމައެނުބައި ބަދަލުގެ ތެރެއިން ހިމެނޭ ކަންކަމެވެ. 
އަދި އެވަރުން ފުދެނީީއެއްވެސް ނޫނެވެ. ﷲ ތަޢާލާ އާއިމެދުގައިވެސް ކަންކަން މިކުރެވެނީ ހަމަ އެފަދަ ގޮތަކަށެވެ. ތިބާ ކަމަކަށް ބޭނުންވުމުން އަވަސްވެގަންނަނީ ﷲ ތަޢާލާއަށް ވަގުތުން ދުޢާކުރުމަށެވެ. ދުވާލެއް ރޭގަނޑެއް މެންދަމެއް ނުބަލަމުއެވެ. އަދި ދުޢާކުރުމާއިއެކު ވަގުތުން ޢިޖާބަކުރައްވަވައި ދެއްވެވުމަށްވެސް އެދެމުއެވެ. އެހައިވެސް ކެތްތެރިކަމެއް ވެސް ނުހުރެއެވެ. 
ވިސްނައިލަންޖެހިފައިވާ ކަމަކީ ހެނދުނެއް މެންދުރެއް ހަވީރެއް ރޭގަނޑެއް ދަންވަރެއް ފަތިހެއް ނެތި ދުވަހުގެ 24 ގަޑިއިރުގެ ތެރެއިން ކޮންމެ ވަގުތަކު ތިބާ ދުޢާކުރި ނަމަވެސް ﷲ ތަޢާލާ އައްސަވައިވޮޑިގެންވާއިރު ދުވާލަކު 5 ފަހަރު ގޮވާ ބަންގީގެ އަޑު ތިބާއަށް އިވޭކަމާއިމެދުގައެވެ. ނަޞްރާއި ކާމިޔާބުލިބިގަތުމަށްޓަކައި ނަމާދުކުރަން އަންނާށެވެ ގޮވާއަޑު އިވޭކަމާއިމެދުގައެވެ. 
މީސްތަކުންގެ ޖާހިލުކަން ބޮޑުކަމުން ﷲ ތަޢާލާ އިންސާނުންނަށް ދެއްވެވި ޢިލްމުން ހޯދާފައިވާ ޓެކްނޮލޮޖީގެ ބޭނުން، ﷲ ރުހިވޮޑިނުގަންނަވާ، ކަނޑައެޅިގެން ޙަރާމްކުރެއްވެވި ކަންކަން ކުރަން ބޭނުންކުރި ނަމަވެސް ހަމައެ ޓެކްނޮލޮޖީގެ އެހީގައި ބަންގީގެ އަޑުވެސް އެހޭނެގޮތް ﷲ ތަޢާލާ ވަނީ ފަހިކުރައްވަވައި ދެއްވަވައިފައެވެ. މިބުނަނީ ގެންގުޅޭ ފޯނުގެ ވާހަކައެވެ. ފޯނުން ބަންގި އަޑު އެހޭނެވާހަކައެވެ. އަދި ބަންގީގެ ކުރިއަށް އެލަރޓް ލިބޭނެ ގޮތްވެސް ހެދޭނެ ވާހަކައެވެ. މީގެ އިތުރުން ޓެކްނޮލޮޖީގެ އެއްވެސް ވަސީލަތެއް ނެތިވެސް ނަމާދުވަގުތުތައް ދެނެގަނެވޭނެ މަގުވެސް ﷲ ތަޢާލާވަނީ ކުރައްވަވައިދެއްވަވައިފައެވެ. 
ވީމާ އެއަޑު ނުއިވޭކަމަށް ނުވަތަ ނަމާދު ވަގުތު ޖެހުނުކަން ނުއެގޭކަމަށް ބުނެ ދެއްކޭނެ އެއްވެސް ބަހަނާއެއް ނެތެވެ. ދުނިޔޭގެ ކޮންމެ ޤައުމެއްގައި ކޮންމެ ތަނެއްގައި ހުރި މީހަކު ނަމަވެސް އެއަޑުއަހަން ބޭނުންވާ މީހާއަށް އަޑުއެހޭނެއެވެ. ވަގުތު ޖެހިއްޖެކަން ދެނެގަންނަން ބޭނުންވާ މީހާއަށް ދެނެގަނެވޭނެއެވެ. 
ވީމާ ﷲ ތަޢާލާގެ ޙަޟްރަތުން ކަންކަމަށް އެދެން ބޭނުންވާއިރު، އެދެން ޖެހިފައިވާއިރު ފުރަތަމަ ކަމަކަށް ބަންގީގެ އަޑުއަހާށެވެ! އެންމެ މަދުވެގެން ފަރުޟު 5 ނަމާދު ބަރާބަރަށް އަދާކުރަމުން ގެންދާށެވެ! ދުނިޔަވީ ގޮތުން ބެލިނަމަވެސް ކަންކަމު އެދޭއިރު ފުރަތަމަ ފުރިހަމަކުރަންޖެހެނީ އެކަމެއް އެދޭ މީހާ ފުރިހަމަކުރަންޖެހޭ ބައެވެ! ﷲ ތަޢާލާގެ ޙަޟްރަތުން ކަންކަމަށް އެދުމުގައިވެސް އޮތީ ހަމައެމަގެވެ. 
ވީމާ ގިނަ ބައަކަށް އައިސްފައިވާ އެންމެ ނުބައިކަންބޮޑު ބަދަލަކީ ބަންގީގެ އަޑު އަހަން ބޭނުންނުވެ ތިމާކުރާ ދުޢާ ވަޤުތުން ޢިޖާބަކުރެއްވެވުމަށް އެދޭކަމެވެ. އެހެން މީހުންނަށް އެހީތެރިނުވެ ތިމާއަށް އެހެން މީހުންގެ ކިބައިން އެހީތެރިކަން ބޭނުންވާ ކަމެވެ. މިދެކަންތައް އިޞްލާޙްކޮށްފިނަމަ ތިމާގެ ބޭނުންތައް ދުނިޔެއާއި އާޚިރަތުގައިވެސް ފުދެން ބޮޑުތަނުން ފަސޭހަވާނެއެވެ. އިން ޝާ ﷲ
 
- އިސްލާމީ ތިލަފަތުގެ ދަރުސަކުން