އެމެރިކާގެ ރައީސް ޑޮނަލްޑް ޓްރަމްޕް އޭނާގެ ކުރީގެ އެއް ސިޔާސަތު އަނބުރާ ގެނެސް، 12 ޤައުމަކުން މީހުން އެމެރިކާއަށް އެތެރެވުން މަނާކޮށްފިއެވެ. މި މަނާކުރުން ފަށާނީ ހޯމަ ދުވަހުން ފެށިގެންނެވެ. އަދި މިއީ އެމެރިކާގެ ސުޕްރީމް ކޯޓުން ހުއްދަ ދީފައިވާ ކަމެކެވެ.
މުޅިން މަނާކުރެވިފައިވާ ޤައުމުތަކަކީ:އަފްޣާނިސްތާން، މިޔަންމާ، ޗާޑް، ކޮންގޯ ޖުމްހޫރިއްޔާ، އިކުއެޓޯރިއަލް ގިނީ، އެރިތްރިއާ، ހައިޓީ، އީރާން، ލީބިޔާ، ސޯމާލިޔާ، ސޫދާން، އަދި ޔަމަން އެވެ.
މީގެ އިތުރުން، އިތުރު 7 ޤައުމެއްގެ މީހުންނަށް – ބުރުންޑީ، ކިއުބާ، ލާއޯސް، ސިއެރާ ލިއޯން، ޓޯގޯ، ޓަރކްމެނިސްތާން، އަދި ވެނެޒުއެލާ – އެތެރެވުމުގައި ހަރުކަށި ހަނިކުރުންތަކެއް ގެނެވޭނެއެވެ. ނަމަވެސް މުޅިން މަނާއެއް ނުކުރެއެވެ.
ރައީސް ޓްރަމްޕް ވިދާޅުވީ މި ނިންމުން އައިސްފައިވަނީ ވޭތުވެދިޔަ ހަފްތާ ބަންދުގައި ކޮލޮރާޑޯގެ ބޯލްޑަރގައި ހިނގި ޓެރަރިސްޓް ހަމަލާއަކާ ގުޅިގެން ކަމަށެވެ. އެ ހަމަލާ ދިން މީހާއަކީ މިސްރުގެ މީހެކެވެ. މިސްރަކީ މަނާކުރެވިފައިވާ ލިސްޓުގައި ހިމެނޭ ޤައުމެއް ނޫނެވެ. ނަމަވެސް ޓްރަމްޕް ވިދާޅުވީ މިއީ މީހުން ވީޒާގެ މުއްދަތު ހަމަވުމަށްފަހު އެ ޤައުމުގައި މަޑުކުރުމުން ކުރިމަތިވެދާނެ ނުރައްކަލުގެ މިސާލެއް ކަމަށެވެ.
އޭނާ ވިދާޅުވީ ބައެއް ޤައުމުތަކުން މީހުން އެތެރުކުމުގެ ކުރިން އެކަށީގެންވާ ވަރަށް ޗެކްނުކުރާ ކަމަށާއި، އަދި ބައެއް ޤައުމުތަކުން އެމެރިކާއިން އެ ޤައުމުތަކުގެ ރައްޔިތުން އަނބުރާ ފޮނުވާލަން އުޅޭއިރު އެ މީހުން އަނބުރާ ބަލައިގަތުމަށް އިންކާރުކުރާ ކަމަށެވެ.
ޓްރަމްޕް ސީދާ ވިދާޅުވީ: ”އަހަރެމެން އެ މީހުން ބޭނުމެއް ނުވޭ.“
މި ނިންމުމަށް ބައެއް އިސްތިސްނާތައް ގެނެވޭނެއެވެ. މިސާލަކަށް، ބޮޑެތި ކުޅިވަރު މުބާރާތްތަކުގައި ވާދަކުރާ ކުޅުންތެރިންނާއި، ދެ ޤައުމެއްގެ ރައްޔިތުކަން ލިބިފައިވާ މީހުންނާއި، އަފްޣާން ރައްޔިތުންގެ ވަކިބަޔަކަށް އެތެރެވުމުގެ ހުއްދަ ދެވޭނެއެވެ. އަދި ސްޓޭޓް ސެކްރެޓަރީއަށްވެސް ވަކިވަކި ކޭސްތަކަށް ބަލައި މީހުން އެތެރެވުމުގެ ހުއްދަ ދެވިދާނެއެވެ.
މި ނިންމުމާ ގުޅިގެން ތަފާތު ފާޑުކިޔުންތައް ލިބިފައިވެއެވެ. ބައެއް މީހުން ބުނަނީ މިއީ ރައްކާތެރިކަމަށްޓަކައި ބޭނުންވާ ކަމެއް ކަމަށެވެ. އަނެއްބައި މީހުން ދެކޭގޮތުގައި މިއީ އިންސާފުވެރިނޫން ކަމެއް ކަމަށާއި، ބައިނަލްއަޤްވާމީ ގުޅުންތަކަށް އޭގެ ނޭދެވޭ އަސަރު ކޮށްފާނެ ކަމެއް ކަމަށެވެ.
Your email address will not be published. Required fields are marked *
ހިޔާލު *
ނަން
Δdocument.getElementById( "ak_js_1" ).setAttribute( "value", ( new Date() ).getTime() );
Email: [email protected] | Phone: +960 9770541Address: M. Golden Bones, 3rd Floor, Male‘ Maldives© Copyright 2020, Dhuvas.mv, All Rights Reserved