މިދިޔަ އެއްމަހުގެ ތެރޭގައި މިގޮތުން 25 މިލިއަން ޑޮލަރަށްވުރެ ގިނައިން ބޭންކްތަކަށް މާރުކޮށްފައިވާ ކަމުގައި އެމަނިކުފާނު ވިދާޅުވި އެވެ.
ބޭންކިން ނިޒާމަށް ޑޮލަރު މާރުކުރަން ޖެހޭ ސިޔާސަތުތަކުގެ ދަށުން މިހާތަނަށް 25 މިލިއަން ޑޮލަރު މާރުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ހޯރަފުށީ ރައްޔިތުންނާ މުހާތަބު ކުރައްވާ ވާހަކަފުޅު ދައްކަވަމުންނެވެ.ރައީސް ވަނީ ‏ރާއްޖޭގެ އިގްތިސާދު ރަނގަޅުކުރުމަށްޓަކައި ސަރުކާރުން މިދިޔަ 14 މަސްދުވަހުގެ ތެރޭގައި ކުރައްވަމުންދާ މަސައްކަތްތަކުގެ ތަފްސީލު ހާމަ ކުރައްވާފަ އެވެ. ރައީސް ވިދާޅުވީ ދިވެހި އިގްތިސާދު ރަނގަޅު ކުރުމަށް ކުރައްވަން ޖެހިވަޑައިގެންނެވި މަސައްކަތަށް އޮތް އެންމެ ބޮޑު އެއް މައްސަލައަކަށް ވީ ޑޮލަރުގެ މައްސަލަ ކަމަށެވެ.‏ބޭރު ފައިސާއާ ބެހޭ ގާނޫނަށް އަމަލުކުރަން ފަށާފައިވާކަން ފާހަގަކުރައްވާ ރައީސް ވިދާޅުވީ މިއީ ރައްޔިތުންގެ ހައްގު ގައި އެޅުއްވި މުހިންމު ފިޔަވަޅެއްކަމުގައި ވިދާޅުވި އެވެ.‏ބޭރު ފައިސާއާ ބެހޭ ގާނޫނުގެ މަގުސަދަކީ ދިވެހިރާއްޖޭގައި ބޭރު ފައިސާއިން ކުރެވޭނެ މުއާމަލާތްތައް ކަނޑައަޅައި، ބޭރު ފައިސާ ދިވެހިރާއްޖެއަށް އެތެރެކުރުމާއި ދިވެހިރާއްޖެއިން ބޭރުކުރުމާއި، ބޭރު ފައިސާ ދިވެހިރާއްޖޭގައި ގެންގުޅުމާއި، ޖަމާކުރުމާއި، މާރުކުރުމާބެހޭ އުސޫލުތަކާއި، އެނޫންވެސް ބޭރު ފައިސާއާބެހޭ މުޢާމަލާތްތަކާގުޅޭ ހަމަތަކާއި އުސޫލުތައް ކަނޑައަޅައި ހިންގުމަށް ބޭނުންވާނޭ ކަމާބެހޭ ހަރުދަނާ ގާނޫނީ އޮނިގަނޑެއް ކަނޑައަޅައި އެކުލަވައިލުން ކަމުގައި ވެސް ވިދާޅުވި އެވެ.ރައީސުލްޖުމްހޫރިއްޔާގެ ވާހަކަފުޅުގައި، މި ގާނޫނުގެ ދަށުން ވަރަށް މަދު ރިސޯޓެއް ފިޔަވާ ރާއްޖޭގައި އޮޕަރޭޓްކުރާ ގިނަ ރިސޯޓްތަކުން އެކަމަށް ތަބާވެ ބޭރު ފައިސާ މާރުކުރަމުންދާކަން ފާހަގަކުރެއްވި އެވެ. އަދި މިދިޔަ އެއްމަހުގެ ތެރޭގައި މިގޮތުން 25 މިލިއަން ޑޮލަރަށްވުރެ ގިނައިން ބޭންކްތަކަށް މާރުކޮށްފައިވާ ކަމުގައި އެމަނިކުފާނު ވިދާޅުވި އެވެ.އަދި މި ގާނޫނު ފުރިހަމައަށް ތަންފީޒުކުރައްވާނެ ކަމުގެ ޔަގީންކަން ދެއްވާ ގާނޫނުގެ ދަށުން ޑޮލަރު މާރުކުރަންޖެހޭ އެއްވެސް ވިޔަފާރިވެރިޔަކަށް އެއިން އިސްތިސްނާއެއް ނުދެއްވާނެ ކަމުގައި ރައީސުލްޖުމްހޫރިއްޔާ ތަކުރާރު ކުރެއްވި އެވެ.‏މި މަސައްކަތް ރަނގަޅަށް ތަންފީޒުކުރެވިގެންދިޔައިމާ ރާއްޖޭގެ އިގްތިސާދަށް ވަރަށް ބޮޑު ފަސޭހަތަކެއް އަންނާނެ ކަމުގައިވެސް ރައީސް ވިދާޅުވި އެވެ. އަދި މިދިޔަ ސާދަ މަސްދުވަހުގެ ތެރޭގައި، ދަތި އުނދަގުލުގެ ތެރޭ މިއަދާ ހަމައަށްވެސް މި އައީ ވައުދުވެވަޑައިގެންނެވި ގޮތަށް އެއްވެސް ވަރަކަށް ފައިސާ ޗާޕުނުކޮށްކަން ރައީސުލްޖުމްހޫރިއްޔާ ފާހަގަކުރެއްވި އެވެ.
ރާއްޖޭގެ ޑޮލަރު ކަޅު ބާޒާރު ނައްތާލައި، ރާއްޖޭގެ ވިޔަފާރިތަކާއި އާއްމުންގެ ބޭނުންތަކަށް އިތުރު ޑޮލަރު ފޯރުކޮށްދިނުމުގެ މަގުސަދުގައި ސަރުކާރުގެ އިސް ނެގުމަކާއެކު މަރުކަޒީ ބޭންކް (އެމްއެމްއޭ) އިން ގާނޫނެއް ހަދައި ބޭންކިން ނިޒާމަށް ޑޮލަރު މާރު ކުރަން ފެށީ މިދިޔަ އޮކްޓޫބަރު މަހުން ފެށިގެންނެވެ. މަރުކަޒީ ބޭންކުގެ އޮފިޝަލަކު ކުރީން ވިދާޅުވި ގޮތުގައި މިހާތަނަށް ހުށަހަޅާފައިވާ ސޭލްސް ރިޕޯޓްތަކަށް ބަލާއިއިރު 30 މިލިއަން ޑޮލަރާއި 40 މިލިއަން ޑޮލަރާއި ދެމެދުގެ އަދަދެއް ބޭރުފައިސާ މާރުކުރުމުގެ ގަވާއިދުގެ ސަބަބުން ބޭންކު ތަކަށް މާރުކުރެވިގެންދާނެ ކަމަށް އަންދާޒާ ކުރެވެ އެވެ. ރާއްޖޭގައި 175 ރިސޯޓެއް ހިންގަމުންދާއިރު މިހާތަނަށް ބޭންކިން ނިޒާމަށް ޑޮލަރު މާރުނު ކުރުމަކީ 37 ރިސޯޓަކުންނެވެ. މިހާރު އަންދާޒާ ކުރެވެނީ މި ރިސޯޓްތަކުންވެސް ބޭންކިން ނިޒާމަށް ޑޮލަރު މާރު ކުރާނެ ކަމަށެވެ. ޓޫރިޒަމްގެ އޮފް ސީޒަންގެ އޮކްޓޫބަރު މަހު 40 މިލިއަން ޑޮލަރު މާރުކުރާނެ ކަމަށް އަންދާޒާ ކުރެވިފައިވާއިރު ކުރިއަށް އޮތް ދުވަސްތަކުގައި މާރުކުރާ ޑޮލަރުގެ އަދަދު އިތުރު ވެގެންދާނެ ކަމަށް ބެލެވެ އެވެ. ބޭރު ފައިސާގެ ގާނޫނު ނުވަތަ ފޮރެސް ގާނޫނަށް އަމަލު ކުރަން ފަށާފައިވަނީ މި އަހަރުގެ ޖެނުއަރީ އެއް ވަނަ ދުވަހުން ފެށިގެންނެވެ. ބޭރުފައިސާއާ ބެހޭ ގާނޫނަށް އަމަލު ކުރަން ފެށި އިރު އެމްއެމްއޭ އިން ވަނީ މިދިޔަ އޮކްޓޫބަރު މަހުން ފެށިގެން އެކަމާ ގުޅޭ ގަވާއިދެއް އެކުލަވައިލާފަ އެވެ. މި ގަވައިދުގެ ދަށުން މިދިޔަ އަހަރުގެ ފަހު ތިން މަހު އައި ޓޫރިސްޓުންގެ ބޮލަކަށް ޑޮލަރު މާރުކުރަން ޖެހޭނެ އެވެ. އެ ގަވައިދުގައިވާ ގޮތުން ރިސޯޓުތަކުން މާރުކުރަން ޖެހޭނީ ޓޫރިސްޓެއްގެ ބޮލަކަށް 500 ޑޮލަރެވެ. އަދި ގެސްޓްހައުސްތަކުން ބޭންކްތަކަށް މާރު ކުރަން ޖެހޭނީ އަންނަ ޓޫރިސްޓުންގެ ބަލަކަށް 25 ޑޮލަރެވެ.ބޭރު ފައިސާ މާރު ކުރާ ގާނޫނުގައިވާ ގޮތުން 500 ޑޮލަރު މާރުކުރަންޖެހޭ އެސްޓަބްލިޝްމެންޓުތަކަކީ ޓޫރިސްޓު ރިސޯޓުތަކާއި އިންޓަގްރޭޓެޑް ރިސޯޓުތަކާއި ޕްރައިވެޓް އައިލެންޑުތަކާއި އެނޫންވެސް އެފަދަ ތަންތަން ކަމުގައި ކަނޑައަޅައި 50 އެނދަށްވުރެ ގިނަ އެނދު ހުންނަ ގެސްޓުހައުސް އަދި ސިޓީ ހޮޓާތަކާއ ޓޫރިސްޓު އުޅަނދުތައް 25 ޑޮލަރު މާރުކުރާ ކެޓަގަރީ އަށް ބަދަލުކުރުމެވެ. އެގޮތުން ބިލުގެ 13 ވަނަ މާއްދާގައި ބުނެފައިވަނީ ކެޓަގަރީ އޭ ޓުރިޒަމް އެސްޓަބްލިޝްމެންޓަކަށް މީލާދީ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ މަގުން އެ މަހެއްގައި އައި ޓޫރިސްޓުންގެ ޖުމްލަ އަދަދަށް ޖެހޭ މިންވަރު އެ މަހަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ރާއްޖޭގައި ރަޖިސްޓްރީކޮށްފއިވާ ބޭންކަކަށް މާރުކުރަން ޖެހޭނެ ކަމުގަ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ