މި ފަހަރުގެ ގޯލްޑަން ފުޓްސަލް ޗެލެންޖްގެ ޒޯން ހަތެއްގައި ވާދަކުރަން ސ. ފޭދޫން ތައްޔާރުވާއިރު، ކޮންމެ މެޗެއް ވެސް ނަގާނީ ފައިނަލެއްގެ ގޮތުގައި ކަމަށް އެ ޓީމުގެ ކެޕްޓަން، ހުސެއިން ގައްސާން ލަބީބް (ހުސީ) ބުނެފި އެވެ.
މިދިޔަ އަހަރުގެ ފައިނަލުގައި، ހިތަދޫ އާއި ފޭދޫ ކުޅުނު މެޗު ފުރިހަމަ ވަގުތު ހަމަވިއިރު، އޮތީ 3-3 އިން އެއްވަރުވެފަ އެވެ. ޕެނަލްޓީ ޖަހައިގެން، ހިތަދޫ މޮޅުވީ، 7-6 އިންނެވެ. މި ފަހަރުގެ ފައިނަލުގައި، ފުރިހަމަ ވަގުތު ހަމަވިއިރު، ހިތަދޫ އާއި ފޭދޫ އޮތީ 2-2 އިން އެއްވަރުވެފަ އެވެ. ޕެނަލްޓީގައި، ފޭދޫ މޮޅުވީ 7-6 އިންނެވެ.
"ހަމަ އެންމެ އުނދަގޫ މެޗޭ ބުނެވޭނީ ހިތަދޫ އަނެއްހެން ރާއްޖެ އަށް ބަލައިފިއްޔާ ވެސް ހަމަ. އެންމެ ވަރުގަދަ އެއް ޓީމު ހަމަ، އެހެންވީމަ، މި މޮޅަކީ ހަމަ ވަރަށް ބޮޑު މޮޅެއް ހަމަ މިކޮޅަށް ލިބުނު،" މި ފަހަރުގެ ފައިނަލް މެޗަށް ފަހު، "އަދަދު ސްޕޯޓްސް" އަށް ދިން އިންޓަވިއުގައި، އައްޑު އަތޮޅު ބުރުގެ މި ފަަހަރުގެ މޮޅު ކުޅުންތެރިޔާ ހުސީ ބުންޏެވެ.
ޒޯން ހަތެއް ދެ ގްރޫޕަކަށް ބެހޭއިރު، ގްރޫޕް އެކެެއްގައި އޮތީ، ގއ. ޗެމްޕިއަން، ދެއްވަދޫ، ގއ. ރަނަރަޕް، ވިލިނގިލި، ގދ. ޗެމްޕިއަން، ވާދޫގެ އިތުރުން، ޏ. ފުވައްމުލަކު ދަނޑިމަގު ޓީމެވެ. ޒޯން ހަތެއްގެ ގްރޫޕް ދޭއްގައި އޮތީ، އައްޑޫގެ ޗެމްޕިއަން، ފޭދޫ އާއި ރަނަރަޕް، ހިތަދޫގެ އިތުރުން، ގދ.ގެ ރަނަރަޕް ގައްދޫ އެވެ. މި ދެ ގްރޫޕުން އެއް ވަނަ އާއި ދެ ވަނަ ޓީމުގެ މެދުގައި، ސެމީ ފައިނަލެއް ކުޅެ ފައިނަލަށް ދާ ދެ ޓީމަކަށް މުބާރާތުގެ ގަދަ 16 އިން ޖާގަ ލިބޭނެ އެވެ.
"ޒޯން ހަމަ ހުރިހާ މެޗަކީ ވެސް ފައިނަލެއްގެ ގޮތުގައި އިންނާނީ. އެއީ އީޒީ އެއްވެސް މެޗެއް ނީންނާނެ ޒޯނުގައި ހުރިހާ މެޗެއް ވެސް ހާޑްވާނެ. އެ އަށް ވިސްނައިގެން މި ޓީމު ޒޯނަށް ރެޑީވާނީ،" ހުސީ ބުންޏެވެ.
މި ފަހަރުގެ ގޯލްޑަން ފުޓްސަލް ޗެލެންޖަށް ފޭދޫ ޓީމަށް ތައްޔާރުނުވެވުނު އެންމެ ބޮޑު ސަބަބަކީ އެކަށީގެންވާ ވަރުގެ ވަގުތެއް ޕްރެކްޓިސްތައް ކުރަން ނުލިބުންކަން ހުސީ ވަނީ ފާހަގަކޮށްފަ އެވެ.
"އަސްލު ތައްޔާރުވާން ބޭނުންވާ ވަރަށް ތައްޔާރުވާން ވަގުތެއް ނުލިބުނު. ވާގޮތަކީ، މިދިޔަ ގޯލްޑް ކަޕް ނިންމާފައި ލިބުނީ މަދު ދުވަސްކޮޅެއް ޕްރެކްޓިސް ކޮށްލަން ޓީމާ އެކީ، ޕްރެކްޓިސްކޮށްލަން ލިބުނީ ވަރަށް ދުވަސް މަދުކޮށް، ދެން، އިންޖަރީތައް ވެސް ހުރީމަ، އެކަމު މިހާރު ފެންނަނީ ޓީމު ވަރަށް ފިޓްކޮށް، އެންމެން ގުޅިގެން ކުޅޭތަން،" ހުސީ ބުންޏެވެ.
އޭނާ ބުނީ، މި ހުރިހާ ކަމަކަށް ބަލައި، ފޭދޫ ޓީމުން ޒޯނަށް އަތޮޅު ބުރަށް ވުރެ ވެސް ރަނގަޅުވާނެ ކަމަށެވެ.