ރާއްޖޭގެ އިމިގްރޭޝަން ޚިދުމަތުގެ ތާރީޚު ހިމެނޭހެން އިމިގްރޭޝަން ކަލަންޑަރު 2025 "އަލިމަސް ދަތުރު" ރިލީޒްކޮށްފިއެވެ.
އިމިގްރޭޝަންގެ މިއަހަރުގެ ކަލަންޑަރު ޚާއްސަކޮށްފައިވަނީ އިމިގްރޭޝަންގެ 75 އަހަރުގެ ޤައުމީ ޚިދުމަތުގެ މުހިންމު ސަފްހާތައް ހިމެނޭ އަލިމަސް ދަތުރަށެވެ.
މިއަހަރުގެ މާރިޗު 24 ވަނަ ދުވަހު އިމިގްރޭޝަނަށް 75 އަހަރު ފުރޭނެއެވެ. އިމިގްރޭޝަނުން ވިދާޅުވީ، މިއަހަރުގެ ކަލަންޑަރު ބިނާކޮށްފައިވަނީ މި ދިގު މުއްދަތުގައި އިމިގްރޭޝަނުން ހާސިލްކޮށްފައިވާ ކާމިޔާބީތަކާއި ތާރީޚުގެ މުހިއްމު ސަފްހާތަކުގެ މައްޗަށެވެ.
1950 އިން ފެށިގެން 2025 އާއި ހަމައަށް އައިރު، ތާރީޚުގެ ސަފްހާތަކުން ފާހަގަކޮށްލެވޭ ގިނަ ކަންތައްތައް މި ކަލަންޑަރުގައި ވަނީ ހިމަނާފައެވެ.
އެގޮތުން ހަމައެކަނި ރާއްޖެއާއި ސިލޯނާއި ދެމެދުގައި ކުރެވުނު ދަތުރުތަކުގައި ބޭނުންކުރި "މޯލްޑިވިއަން ޕާސް"، އިނގިރޭސީންގެ ހިމާޔަތުގައި ރާއްޖެ އޮތްއިރު ބޭނުންކުރެވުނު "ބްރިޓިޝް ޕާސްޕޯޓު" އަދި ފަހުން އައި އޭ ސީރީސްގެ ޕާސްޕޯޓާއި އިލެކްޓްރޯނިކް ޕާސްޕޯޓުތަކުގެ މައުލޫމާތުވެސް ކަލަންޑަރުގައި ހިމަނާފައިވެއެވެ.
ހަމައެހެންމެ ވައިގެ ބަނދަރާއި ކަނޑުގެ ބަނދަރުގައި ޚިދުމަތްތައް ފުޅާވެގެން ދިޔަގޮތާއި، ރާއްޖޭގެ ބޯޑަރު ހިމާޔަތްކޮށް ބެލެހެއްޓުމުގައި ކޮށްފައިވާ މުހިއްމު މަސައްކަތްތަކާއި، ރާއްޖޭގައި އުޅޭ ބިދޭސީންގެ ކަންކަމުގައި އިމިގްރޭޝަނުން އަދާކޮށްފައިވާ މުހިއްމު ރޯލު މި ކަލަންޑަރުން ދައްކުވައިދެއެވެ. އަދި އެންމެ ފަހުން އައި ޒަމާނީ ބަދަލުތަކާއެކު ޚިދުމަތްތައް ލުއިފަސޭހަވެ ފުޅާވެގެން ދިޔަގޮތާއި، ކުރިމަގުގައި ޚިދުމަތްތައް އިތުރަށް ލުއިފަސޭހަކޮށް ޑިޖިޓަލައިޒް ވެގެންދާނެ ގޮތުގެ ތަސައްވުރަށް ވަނީ އަލިއަޅުވާލާފައެވެ.
ތުއްތު ކުދިން ހިމަނައިގެން އިމިގްރޭޝަންގެ ތާރީހު ދައްކުވައިދޭ މި ކަލަންޑަރުގެ ފަހަތުގައި މުހިއްމު ތާރީޚުތަކާއި ކަންކަން ފާހަގަކޮށްލަން ހާއްސަ ސްޓިކަރތަކެއް ވެސް ވަނީ ހިމަނާފައެވެ. ކުރިންނަމަ "ޕާސްޕޯޓު އޮފީސް"، "ޑިޕާޓުމަންޓް އޮފް އިމިގްރޭޝަން އެންޑް އެމިގްރޭޝަން" އަދި މިހާރު ނަމަ "މޯލްޑިވްސް އިމިގްރޭޝަން" ގެ އަލިމަސް ދަތުރު މި ކަލަންޑަރުން ފުރިހަމައަށް ފެނިގެންދާނެއެވެ.