ޔުމްނު ވެއްޓުނު މައްސަލައާ ގުޅިގެން ފުލުހުން އަމަލުކުރަމުންދަނީ ކަނޑައެޅިފައިވާ އުސޫލުތަކާ އެއްގޮތަށް ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެ އެވެ.
"އަހާ" ފޯރަމްގައި ރޭ ވާހަކަފުޅު ދައްކަވަމުން މިނިސްޓަރ އިހުސާން ވިދާޅުވީ މިހާތަނަށް އެ މައްސަލައާ ގުޅިގެން ފުލުހުން ގޯސް ގޮތަކަށް އަމަލުކޮށްފައިވާކަން ފާހަގަކުރެވިފައި ނުވާ ކަމަށެވެ. އަދި ފުލުހުންގެ މަސައްކަތްތައް ބަލާ އިދާރާތަކުން އެކަންކަން ބަލަމުންދާ ކަމަށާއި، އެފަދަ ކަމެއް ފާހަގަވެއްޖެ ނަމަ އެ މައްސަލަ ބަލައި ފިޔަވަޅު އަޅުއްވާނެ ކަމަށް މިނިސްޓަރު ވަނީ ވިދާޅުވެފައެވެ.
މި މައްސަލައިގެ ތަހުގީގު ކުރިއަށްދާއިރު، ޔުމްނު ވެއްޓުނު ގޭގައި އެރޭ އޭނާއާއެކު އުޅުނު ރައުދު އަހްމަދު ޒިލާލް ވަނީ މިދިޔަ މަހުގެ 24 ވަނަ ދުވަހު ހައްޔަރުކޮށްފައެވެ. އަދި މި މައްސަލަ ތަހުގީގުކުރުމަށް މިދިޔަ އޭޕްރީލް މަހުގެ 27 ވަނަ ދުވަހު ރައީސް ޑރ. މުހައްމަދު މުއިއްޒު ވަނީ ފަސް މެންބަރުންގެ ކޮމިޝަނެއް އެކުލަވާލައްވާފައެވެ.
ނަމަވެސް، ޔުމްނުގެ އާއިލާ އާއި އާންމުންގެ ގިނަ ބަޔަކު ތުހުމަތުކުރާ ގޮތުގައި، މި މައްސަލައިގެ ތަހުގީގަށް ނުފޫޒު ފޯރުވައި، ފުލުހުން ވަކި ބައެއްގެ މަސްލަހަތު ހިމާޔަތް ކުރަން މަސައްކަތްކޮށްފައިވެއެވެ. މިކަމާ ގުޅިގެން މާލޭގައި ޒުވާނުންތަކެއް މުޒާހަރާތަކެއްވެސް ކުރިއަށް ގެންގޮސްފައިވެއެވެ.
މިނިސްޓަރ އިހުސާންގެ މި ބަސްފުޅުތައް އައިސްފައިވަނީ، މި މައްސަލައިގެ ތަހުގީގާމެދު އާންމުންގެ މެދުގައި ކަންބޮޑުވުންތައް އުފެދިފައިވާ ދަނޑިވަޅެއްގައެވެ.