ތަންކޮޅެއް އާދައިގެ ދިރިއުޅުމަކަށް ރައްޔިތުން މި ދުވަސްކޮޅު ތިރިވެލަންޖެހޭ ކަމަށް ރައީސް އޮފީހުގެ މިނިސްޓަރު އަލީ އާރިފް ވިދާޅުވެއްޖެ އެވެ.
ޕީއެންސީގެ ހަރުގޭގައި ރޭ ބޭއްވި ޖަލްސާގައި ވާހަކަދައްކަމުން އާރިފް ވިދާޅުވީ ރާއްޖޭގެ މިނިވަންކަމާއި އިސްތިގުލާލު ދަމަހައްޓައި ރައްކާތެރިކުރުމަށްޓަކާ ވެސް ހަރަދު ކުޑަކުރުމުގެ ފިޔަވަޅުތައް އަޅަންޖެހޭ ކަމަށާއި މީހަކު ބައްޔެއް ވުމުން އެ ބައްޔަށް ޝިފާއެއް އޮތީ ހިތި ބޭހެއް ބޮއެގެން ކަމަށްވާނަމަ އެ ހިތި ބޭސް ބޯންޖެހޭ ކަމަށެވެ.
ރާއްޖޭގެ މިނިވަން ކަމާއި އިސްތިޤްލާލާއި ގުޅެ ގޮތުން ވެރިކަމަށް އައުމަށް ޕީޕީއެމް ޕީއެންސީ އިން ހަދާފައި ވަނީ ދޮގު ކަން ރާއްޖޭގެ ރައްޔިތުންނަށް ވަނީ ސާފު ވެފައެވެ. ގެއްލުން ކަނޑާއި، އެތައް ހާސް ސިފައިންނާއި، އުތުރު ތިލަފަޅުގައި އަޅާކަމަށް ބުނެ ދޮ ގު ހެދި މިލިޓަރީބޭހެއް ވެސް ނެތް ކަން ރައްޔިތުންނަށް ވަނީ ސާފު ވެފައެވެ. ރާއްޖޭގެ ގިނަ ރައްޔިތުން ވަނީ ޕީއެންސީ އިން ހިންގި ސްކޭމް ގައި ޖެހިފައެވެ.
މި ހާލަތުން އަރައިގަތުމަށްޓަކާ މި ސަރުކާރަށް ވެސް ފައިސާ ޗާޕު ކުރެވިދާނެ ކަމަށާއި ނަމަވެސް އެއީ ޒިންމާދާރުވެރިން ކުރާނެ ކަހަލަ ކަމެއް ނޫން ކަމަށް އާރިފް ވިދާޅުވި އެވެ. އަދި އިހުލާސްތެރި ވެރިން ކުރައްވާނެ ކަމަކީ އުނދަގޫވި ނަމަވެސް އަޅަންޖެހޭ ފިޔަވަޅުތައް އެޅުން ކަމަށާއި ރައީސް ޑރ. މުހައްމަދު މުއިއްޒު ކުރައްވަނީ އެކަން ކަމަށް އާރިފް ވިދާޅުވި އެވެ.
މިހެން އާރިފް ވިދާޅުވި ނަމަވެސް، މުއިއްޒު މަސައްކަތް ކުރައްވަމުން ގެންދަވަނީ ފައިސާ ޗާޕް ކުރުމަށް ކަމަށް ކަމަށް އެމްޑީޕީގެ ޗެއަރޕާސަން ވަނީ ދާދި ފަހުން ހާމަ ކުރައްވާފައެވެ. އަދި އެކަން ނުކުރެވިގެން އުޅެނީ، ވެރިކަމަށް އައިތަނާ، ފައިސާ ޗާޕް ނުކުރާނެ ކަމަށް ވިދާޅުވެ ދެއްކުނުހާ ވާހަކަ ތަކުން ލަދުންނެވެ.
މިއީ ދަތި ދުވަސްކޮޅެއް ނަމަވެސް ރާއްޖެ ބަނގުރޫޓެއް ނުވާ ކަމަށް އަލީ އާރިފް ވިދާޅުވިއެވެ.
“މި ދުވަސްކޮޅު މި ޖެހެނީ އެއްކަލަ އަބަދު ޓޭކްއަވޭ ހަދައިގެން ގޭގައި ކެއި ކެއުން ހުއްޓާލާފައި، ކޮންމެވެސް ވަރަކަށް ގޭތެރޭގައި އަމިއްލަ އަށް ގަރުދިޔަ އާއި ބަތާއި ކައްކައިގެން ކާލައިގެން، ތަންކޮޅެއް އާދައިގެ ދިރިއުޅުމަކަށް ތިރިވެލުން،” އާރިފް ވިދާޅުވި އެވެ.
ޓޭކް އަވޭތަކާއި، ރެސްޓޯރަންޓް ތަކަކީ ރާއްޖޭގައި ހިންގާ ކުދި ވިޔަފާރި ތަކެވެ. މި ވިޔަފާރިތަކަށް ގެއްލުން ވާހެން، ދޭދޭ މީހުންގެ މެދުގައި ހިނގާ ވިޔަފާރީގެ މުއާމަލާތް ހުއްޓާލުމަކީ އިޤްތިޞާދު އިތުރަށް ހީނަރުވެ، މުއްސަނދިންގެ އަތުގައި ފައިސާ ހަރުލައި، ފައިސާ ދައުރު ނުވެ، އިޤްތިޞާދު އިތުރަށް ހީނަރުވާނެ ކަމެކެވެ.
އާރިފް ވަނީ މާލީ ހާލަތާއި ގުޅިގެން ދުވަސްވީ މީހުންނަށްދޭ އިނާޔަތްތަކާއި، ކިޔަވާ ކުދިންނަނަށްދޭ އިނާޔަތްތަކާއި އެކަނިވެރި މައިންނަށްދޭ އިނާޔަތްތައް ކަނޑާނުލާ ކަމަށާއި އެ އިނާޔަތްތައް ކަނޑާލަން އުޅޭ ކަމަށް ބުނެ ބަޔަކު ފަތުރަނީ ދޮގު ވާހަކަތަކެއް ކަމަށްވެސް ވިދާޅުވެފަ އެވެ.