މިއަދުގެ މެންދުރުފަހުގެ ވަގުތެއްގައި މާލޭސިޓީގެ ބައެއް ސަރަހައްދުތަކުން ކަރަންޓުގެ ޚިދުމަތް މެދުކެނޑިދާނެކަމަށް ސްޓޭޓް އިލެކްޓްރިކް ކޮމްޕެނީ - ސްޓެލްކޯއިން ބުނެފިއެވެ.
މާލޭ ސަރަހައްދުގައި ކަރަންޓުގެ ޚިދުމަތްދޭ ސްޓެލްކޯއިން ބުނެފައިވަނީ އެކުންފުނީގެ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތެއް މިއަދު ކުރިއަށްގެންދާނެ ކަމަށެވެ. މިމަސައްކަތަށް މާލެ ސިޓީގެ، ގުލްހަޒާރު ގޯޅި، ދަކަނދާ މަގު، އުނިގަސް މަގު، މުރަނގަ މަގު، ޢިއްޒުއްދީން މަގު، މުއިވެޔޮ ގޯޅި، ނަސީމީ ހިނގުން، އިސްކަންދަރު މަގު، ހިލާލީ މަގު އަދި ޖަވާހިރު މަގު ހިމެނޭ ސަރަޙައްދުން މިއަދު މެންދުރުފަހު 2:00 އިން 3:15 އަށް ކަރަންޓުގެ ޚިދުމަތް މެދުކެނޑުމަކީ އެކަށީގެންވާ ކަމެއް ކަމަށް އެ ކުންފުނިން ބުންޏެވެ.
ސްޓެލްކޯއިން ދަނީ ގްރޭޓަރ މާލޭ އޭރިއާގެ ކަރަންޓު ވިއުގަ އަޕްގްރޭޑް ކުރުމުގެ މަސައްކަތް ކުރަމުންނެވެ. މިގޮތުން މަސައްކަތްކުރާ ގަޑިތަކުގެ ތެރެއިން ކަރަންޓު ކެނޑޭ ގަޑިތައް އެކުންފުނިން އަބަދުވެސް ކުރީބައިގައި ކަސްޓަމަރުންގެ ސަމާލުކަމަށްޓަކައި ހިއްސާކުރެއެވެ.
މިފަދަ ހާލަތްތަކުގައި ކަސްޓަމަރުންނަށް ދިމާވާ ދަތިތަކަށް ސްޓެލްކޯއިން މައާފަށް އެދެއެވެ. އެކުންފުނިން އަބަދުވެސް ފެންވަރު ރަނގަޅު ޚިދުމަތް ރައްޔިތުންނަށް ފޯރުކޮށްދިނުމަށް މަސައްކަތްކުރާ ކަމުގައި އެ ކުންފުނިން ބުނެއެވެ.