ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރަށް ރޯޑު ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރު ކަމުގައި ހުންނެވި އަލީ ޒުހައިރު އައްޔަންކުރުމަށް ޕީސީބީން މިއަދު ނިންމައިފި އެވެ.
ވީކިހިނެއް؟ - އެޗްޑީސީގެ މެނޭޖިން ޑިރެކްޓަރުގެ މަގާމު ހުސްވީ އެ މަގާމުގައި ހުންނެވި މައުރޫފު ޖަމީލު އިސްތިއުފާ ދެއްވުމުންނެވެ. އެ ގޮތުން:
އޭނާ މިއަދު މަގާމުން އިސްތިއުފާ ދެއްވީ، އަންނަ މަހު 18ގައި އޭނާ ރިޓަޔާކުރައްވާނެކަން ކުރިން އިއުލާންކުރައްވާފައިވަނިކޮށް
އެނގިފައިވާ ގޮތުގައި މައުރޫފް މަގާމުން އިސްތިއުފާ ދެއްވީ އެ ގޮތަށް އަމަލުކުރަން ޕީސީބީން އެންގުމުން
ތަފްސީލް - ހުސްވެފައިވާ މަގާމަށް ޒުހައިރު އައްޔަންކުރިކަން 'ދައުރު'އަށް ވަނީ އެނގިފަ އެވެ.
ޒުހައިރަކީ:
މި ވަގުތު އާރުޑީސީގެ މެނޭޖިން ޑިރެކްޓަރު
އޭގެ ކުރިން ސިފައިންގޭގައި 30 އަހަރު ހިދުމަތްކުރެއްވި
ސިފައިންގެ ވެލްފެއާ ކުންފުނި، ސިވެކްގެ ޗެއާމަންކަން ކުރެއްވި
ފާހަގަ ކުރެވޭ - މައުރޫފް ވަނީ މީގެ ކުރިން ރައީސް މައުމޫން އަބްދުލްގައްޔޫމުގެ ވެރިކަމުގައި، އެޗްޑީސީ އުފެއްދުމުގެ ކުރިން، ހުޅުމާލޭ ތަރައްގީ ކުރުމުގެ މަސައްކަތް ކުރި ހުޅުމާލޭ ތަރައްގީ ކުރުމާ ބެހޭ ޔުނިޓުގެ ޑިރެކްޓަރު ޖެނެރަލްގެ މަގާމު އަދާކުރައްވައިފަ އެވެ.
މީގެ އިތުރުން:
ކޮންސްޓްރަކްޝަން އެންޑް ޕަބްލިކް އިންފްރާސްޓްރަކްޗާ މިނިސްޓަރުކަން އަދާކުރައްވާފައިވޭ
އެޗްޑީސީ އާއި އެޗްޑީއެފްސީގެ މުހިއްމު މަގާމުތަކެއް އަދާކުރައްވާފައިވޭ
އާކިޓެކްޗާ ހެރިޓޭޖުގެ ދާއިރާ އިން ގިނަ މަސައްކަތްތަކެއް މިހާރު ވެސް ކުރައްވާ
އެނގުން މުހިންމު - މައުރޫފް އެޗްޑީސީގެ އެމްޑީގެ މަގާމަށް އައްޔަންކޮށްފައިވަނީ އެ މަގާމުގައި ކުރިން ހުންނެވި އިބްރާހިމް ފަޒުލް ރަޝީދު، ހުޅުމާލޭން ބިން ދޫކުރުމާއި ވިނަރެސް ފްލެޓު ދޫކުރުމާ ގުޅޭ ކޮރަޕްޝަނުގެ ބޮޑެތި މައްސަލަތަކެއް ފެންމަތިވެފައިވަނިކޮށް މަގާމުން އިސްތިއުފާ ދެއްވުމުންނެވެ.