މުސްލިމުން ބަލައިގަނެ ޢަމަލުކުރާ 4 މަޛްހަބް އެބައޮތެވެ. ހުރިހާ ޟަޛްހަބްތަކެއްގެ މީހުންވެސް ނަމާދުކުރާނެއެވެ. ކޮންމެ މީހަކުވެސް ނަމާދުކުރާނީ އެމީހަކަށް ދަސްވެފައިވާ ގޮތަށެވެ. ވީމާ އެހެން މީހުން ކުރާ ގޮތަށް ހުރިހާ ކަމެއް ކުރަން އުޅުމެއް ނެތެވެ. އޮތީ ތިމާއަށް މިކުރެވެނީ ރަނގަޅަށްކަން ޔަޤީންކުރުމެވެ. ހަމައެއާއިއެކު އެހެން މީހުން ކުރާގޮތް ކުށްވެރިވެސް ނުކުރާށެވެ! ކުށްދައްކައި ރަނގަޅުގޮތް ބުނެދޭން އެނގޭނީ 4 މަޛްހަބުގައިވާ ގޮތްވެސް އެނގިގެންކަމަށްވާތީއެވެ. ވީމާ އެކަންކުރެއްވޭނީ ޢިލްމްވެރިންނަށެވެ.  
ދެން ވިސްނައިލާށެވެ! ތިބާ އެބަ ނަމާދު ކުރަމުއެވެ. ނަމަވެސް ސުވާލަކީ ނަމާދުކުރަމުން ތިއަ ގެންދަނީ ކުރާ ނަމާދު ނަމާދަކަށް ވާނެ ގޮތަށް ހެއްޔެވެ؟ ނަމާދުކުރާ މީހުން ވަރަށް ގިނައެވެ. ނަމަވެސް ސުވާލަކީ ކުރާ ނަމާދަކީ ނަމާދަކަށް ވާގޮތަށް ނަމާދުކުރަނީ ކިތައް މީހުން ހެއްޔެވެ؟  
ރަސޫލް (ﷺ) ޙަދީޘްފުޅު ކުރައްވަވާފައިވަނީ "ތިމަން ރަސޫލާ (ﷺ) ނަމާދު ކުރައްވަނިކޮށް ތިއަ ބައިމީހުންނަށް ފެނުނު ގޮތަށް" ނަމާދުކުރުމަށެވެ. އެކަން ކުރެވެން މިއަދު އޮތީ ޙަދީޘްފުޅުތައް ބަލައިގެންނެވެ. ވީމާ ޙަދީޘްފުޅުތައް ދެނެގަނެ އެގޮތަށް ނަމާދުކުރަން މަސައްކަތްކުރުމަކީ ކޮންމެ މީހަކުވެސް އެންމެ ބޮޑަށް ކުރަން ޖެހޭނެ މަސައްކަތެވެ.  
ކޮންމެ މީހަކީ އަމިއްލައަށް ޙަދީޘްފުޅުތައް ދިރާސާ ކުރެވޭނެ މީހަކަށް ނުވެދާނެއެވެ. ވީމާ އޮތީ ޢިލްމުވެރިންގެ ލިޔުއްވުންތައް ބަލައި ކިޔައިގެން ދަސްކުރުމެވެ. ކިރިޔާވެސް އޮޅުން އަރާ ކަމެއް އޮތް ނަމަ ދީނީ ޢިލްމުވެރިންގެ އަރިއަހުން އެކަން އޮޅުން ފިލުވައި ދަސްކުރުމެވެ.  
އިންސާނަކަށް މިއަށްވުރެ މުހިންމު މަސައްތަކެއް ނުވެއެވެ. އެހެނީ އެމީހާ ޝަހާދަތް ކިޔައި އިސްލާމްވުމަށްފަހު އެމީހެއްގެ މައްޗަށް އޮތް އެންމެ ބޮޑު ވާޖިބަކީ ނަމާދުކުރުމެވެ. ކޮން ގޮތަކަށް ނަމާދުކުރުން ހެއްޔެވެ؟ ރަސޫލް (ﷺ) ކުރެއްވެވި ގޮތަށް ނަމާދުކުރުމެވެ. އެމީހަކު ބޭނުންހައި ގޮތަކަށް ނަމާދުކުރުމެއް ނޫނެވެ.  
ދިރިއުޅުމަށް ކުރަން ޖެހޭ މަސައްކަތްތައް ކިތަންމެ ބުރަ ނަމަވެސް ނަމާދަށް ސަމާލުކަން ނުދީ ދޫކޮށްލެވޭނެ އެއްވެސް ގޮތެއް ނެތެވެ. އެހެނީ ތިމާ މިހިރީ ﷲ ތަޢާލާއަށް އީމާން ވެގެން ކަމަށް ކިތަންމެ ގިނައިން ބުނި ނަމަވެސް ސުވަރުގެއެއް ނުލިބެއެވެ. ސުވަރުގެ ލިބުން އޮތީ އީމާންވުމާއިއެކު ފުރިހަމައަށް ނަމާދުކޮށްގެންނެވެ. ފަރުޟު 5 ނަމާދު ފުރިހަމައަށް އަދާކޮށްގެންނެވެ.  
އުމުރުން ކިތަންމެ ދުވަސްވެފައި ހުރި ނަމަވެސް ލަދު ނުގަންނާށެވެ! ސުވާލުތައް ކުރާށެވެ! ޔަޤީންވަންދެން ސުވާލުތައް ކުރާށެވެ! ހަމަ އެއާއިއެކު ދީނީ ޢިލްމުވެރިން ނަމާދުކުރައްވާ ގޮތް ބަލައި ދަސްކުރާށެވެ! "ރަސޫލާ (ﷺ) ނަމާދު ކުރައްވަނިކޮށް ފެނިފައިވާ ގޮތަށް" ނަމާދުކުރެވޭނީ އެއިރުންނެވެ. ނަމާދު ނަމާދަކަށްވާނީ އެގޮތަށް ނަމާދުކުރެވިގެނެނެވެ. އެގޮތަށް ނުކުރެވޭނަމަ ކުރާ ނަމާދަކީ ނަމާދަކަށް ނުވާނެއެވެ. ﷲ ތަޢާލާ ޤަބޫލުފުޅުކުރައްވަވާނީ ޤަބޫލުފުޅުކުރައްވަވާނެ ފެންވަރުގައި ނަމާދުކުރުމުންނެވެ.
 
- އިސްލާމީ ތިލަފަތުގެ ދަރުސަކުން