އިރާނާ ދެކޮޅަށް ކުރަމުންދާ ހަނގުރާމައިގައި އެމެރިކާގެ ރައީސް ޑޮނަލްޑް ޓްރަމްޕަށް ލިބިވަޑައިގެންފައިވާ ބާރުތައް ހަނިކުރުމަށް ސެނެޓަށް ހުށަހެޅި ބިލް ނާކާމިޔާބުކޮށްލައިފި އެވެ.
މި ބިލް ނާކާމިޔާބުވުމުގެ ފަހަތުގައި އޮތީ މައިގަނޑު ދެ ސަބަބެކެވެ. އެއީ ސެނެޓުގެ އަޣުލަބިއްޔަތު ރައީސް ޓްރަމްޕް ނިސްބަތްވާ ރިޕަބްލިކަން ޕާޓީއަށް އޮތުމާއި އެ ޕާޓީގެ ގިނަ މެންބަރުން އިރާނާ ދެކޮޅަށް ކުރާ ހަނގުރާމައަށް ފުރިހަމައަށް ތާއީދުކުރުމެވެ.
އެހެންވެ، ޓްރަމްޕްގެ ބާރުތައް ހަނިކުރާނެ ކަމަށް ކުރިންވެސް ބެލެވިފައެއް ނުވެއެވެ.
ދެވަނަ ސަބަބަކީ، މިކަމާމެދު ރައީސް ޓްރަމްޕް އެއްވެސް ވަރަކަށް ކަންބޮޑުވެވަޑައިނުގަތުމެވެ. ސަބަބަކީ ސެނެޓާއި ހައުސް އޮފް ރެޕްރެޒެންޓޭޓިވްސް އިން ބިލެއް ފާސްކުރި ނަމަވެސް، އެ ބިލެއް، ގާނޫނަކަށް ވާނީ ޓްރަމްޕް ތަސްދީގު ކުރެއްވުމުން ކަމަށްވާތީއެވެ.
މިދިޔަ ހޮނިހިރު ދުވަހު ފެށި އިރާން ހަނގުރާމައަކީ ސީދާ ރައީސް ޓްރަމްޕްގެ ނިންމެވުމަކަށް ވެފައި، އެމަނިކުފާނު އެކަމަށް ތާއީދުކުރައްވާތީ، މިފަދަ ގާނޫނެއްގައި ނުކުރައްވާނެކަން އޮތީ ކަށަވަރުވެފައެވެ.
ޓްރަމްޕްގެ މި ވީޓޯ ބާތިލްކުރެވޭނީ ސެނެޓްގެ ތިންބައިކުޅަ ދެބައިގެ އަޣުލަބިއްޔަތު ލިބިގެން ކަމަށްވާއިރު، އެވަރުގެ ތާއީދެއް މި އިސްލާހަށް ނެތްކަން ރިޕަބްލިކަން ލީޑަރުންގެ ފަރާތުން ޓްރަމްޕަށް ކުރިންވެސް އޮތީ އެނގިވަޑައިގެންފައެވެ.