ކުޅުދުއްފުށީ ސިޓީ ކައުންސިލްގެ ސްޕޯޓްސް ކަލަންޑަރުގައި ކައުންސިލުން އިންތިޒާމުކޮށްގެން ބާއްވަން ހަމަޖައްސާފައިވާ އިންޓަރ ސްކޫލް ނެޓްބޯޅަ މުބާރާތް ފަސްކުރީ ސްކޫލްތަކުގެ އެދުމުގެ މަތިން ކަމަށް ކުޅުދުއްފުށީ ސިޓީ ކައުންސިލުން ބުނެފި އެވެ.
ކޭއޯއިން ކުރި ސުވާލަކަށް ޖަވާބު ދެއްވަމުން ސިޓީ ކައުންސިލްގެ މެމްބަރު މުހައްމަދު ދާއޫދު ވިދާޅުވީ ކައުންސިލުން ކަލަންޑަރކޮށްފައިވާ ސްކޫލް ނެޓްބޯޅަ މުބާރާތް ފަސްކުރީ ސްކޫލް ބަންދާ ދިމާވެ އަދި ޓެސްޓް އޮންނަ ދުވަސްވަރާ އެދުވަސްތައް ދިމާވާތީ ކަމަށެވެ.
ކައުންސިލް ސްޕޯޓްސް ކަލަންޑަރުގައިވާގޮތުން އެ މުބާރާތް ތާވަލްކޮށްފައިވަނީ ޖޫން މަހުގެ 03 ން 11 އަށެވެ.
މުހައްމަދު ދާއޫދު އިތުރަށް ވިދާޅުވީ މުބާރާތް ފަސްކުރަން ނިންމީ ސްކޫލްތަކާ މަޝްވަރާކޮށް އެ ގޮތަށް ސްކޫލްތަކުންވެސް އެދޭތީ ކަމަށެވެ. އަދި މުބާރާތް ބޭއްވުމަށް އަލުން ސްކޫލްތަކާ ދަނީ މަޝްވަރާ ކުރެވެމުން ކަމަށްވެސް އޭނާ ވިދާޅުވި އެވެ.
މިއާ ސިޓީ ކައުންސިލްގެ ކުޅިވަރު ކަލަންޑަރުގައި ހިމަނައިގެން މި ގޮތަށްބާއްވާ ފުރަތަމަ ނެޓްބޯޅަ މުބާރާތެވެ.
ކައުންސިލުން ވަނީ ކުޅުދުއްފުށީ ސްކޫލުތަކުގެ ފިރިހެން ކުދިންނަށް އަމާޒުކޮށްގެން މިއަހަރުގެ މޭމަހު 20-28 އަށް އިންޓަރ ސްކޫލް ފުޓްބޯޅަ މުބާރާތެއްވެސް ބާއްވާފަ އެވެ.