ސިޔާސީ ކަންކަމުގައި ބައިވެރިވެވަޑައިގެންނެވުމަށް ކުރީގެ ރައީސް އަދި ޑީއާރުޕީގެ ޒައީމު މައުމޫން އަބްދުލްގައްޔޫމް މާލެ ވަޑައިނުގެންނެވުމަށް ރައީސުލްޖުމްހޫރިއްޔާ މުހައްމަދު ނަޝީދު މިރޭ ގޮވާލައްވައިފި އެވެ.
މާލޭގެ ކައުންސިލްކަމަށް އެމްޑީޕީން ވާދަކުރައްވާ މާލޭ މުނިސިޕަލްޓީގެ ރައީސް ސަރަނގު އާދަމް މަނިކުގެ ކެމްޕޭން ފެށުމަށްޓަކައި އާދަމް މަނިކުގެ "ވެށި ފަހި" ޖަގަހައިގައި ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ މައުމޫނު އަލުން ސިޔާސީ މައިދާނަށް ނުކުންނަވަން އުޅުއްވާ ވާހަކަ އަޑުއިވިވަޑައިގަންނަވާ ކަމަށާއި އެކަމާ ކަންބޮޑުވެވަޑައިގަންނަވާ ކަމަށެވެ.
މައުމޫނު އަލުން ސިޔާސީ މައިދާނަން ނުކުންނެވުމަކީ ރައްޔިތުންގެ އިހްސާސްތަކާ ކުޅުއްވުން ކަމަށާއި އެހެން ހައްދަވައިފި ނަމަ ކަންކަން ހިފަހައްޓަން އެ މަނިކުފާނަށް ވެސް އުނދަގޫވެވަޑައިގެންފާނެ ކަމަށް ރައީސް ނަޝީދު ވިދާޅުވި އެވެ.
"ރައީސް މައުމޫނު އަރިހުގައި އަޅުގަނޑު ދަންނަވަން އޮތީ ރައީސް މައުމޫނޭ އެހެން ނުހައްދަވާށޭ. މި ރާއްޖޭގެ ރައްޔިތުންގެ އިހްސާސްތަކާ ކުޅުއްވަން ނުހައްދަވާށޭ. އެހެން ހެއްދެވީމާ ގުޑާއިރު އަޅުގަނޑަށް ވެސް ހިފަހައްޓާލަން އުނދަގޫވާނޭ. އަޅުގަނޑަށް ވީ މިންވަރަކުން ހިފެހެއްޓޭނީ. ރައީސް މައުމޫނުގެ ސަލާމަތަށްޓަކައި އަޅުގަނޑަށް ކުރެވެން ހުރި ހުރިހާ ކަމެއް އިރާދަކުރެއްވިއްޔާ އަޅުގަނޑު ކުރާނަން. އެހެހެން ނަމަވެސް އަޅުގަނޑު އިހްލާސްތެރިކަމާއެކު ރައީސް މައުމޫނު އަރިހު އެދެން އެހެން ނުހައްދަވާށޭ. ސިޔާސީ ކަންކަމުގައި ބައިވެރިވަޑައިގަންނަވަން ރާއްޖެ ވަޑައިގަންނަވާ ވާހަކަ ދައްކަވާކަމަށް ވަނީވިއްޔާ ދެން ހަމަ އަނެއްކާ ވެސް އަޅުގަނޑުމެންނަށް ބޮޑަށް ފެނުން ގާތީ މިރާއްޖޭގެ ތާރީހު އަލުން އެބުރި އިޔާދަވާތަނޭ،" ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ކުރިން ވެރިކަންކުރައްވާފައިވާ ބައެއް ބޭފުޅުން ބޭރުގައި އުޅުއްވުމަށް ފަހު މާލެ ވަޑައިގަންނަވާ ވަގުތު ބައެއް ބޭފުޅުން އަވަހާރަވެފައި އެބަހުރި ކަމަށާއި އަނެއްބައި ބޭފުޅުން މުޅި ހަޔާތް އެކީ ބަރުބާދުވެފައި އެބަހުރި ކަމަށެވެ.
"އެއީ އަޅުގަނޑުމެން އެކަކުވެސް ދެކެން ބޭނުންވާ ތަނެއް ނޫން. އެއީ އެއްގޮތަކަށް ވެސް ދެކެން ބޭނުންވާ ތަނެއް ނޫން،" ރައީސް ވިދާޅުވި އެވެ.
ކުރިއަށް އޮތް ކައުންސިލް އިންތިހާބުގެ ކެމްޕޭނުގައި ޑީއާރުޕީގެ ކެންޑިޑޭޓުންނަށް ކެމްޕޭނު ކޮށްދެއްވުމަށް ޑިސެމްބަރު 31 ގައި މައުމޫނު މާލެ ވަޑައިގަންނަވާނެ ކަމަށް ޑީއާރުޕީގެ އުމަރު ނަސީރު ފެކްޝަނުން ވަނީ ބުނެފަ އެވެ. އަދި އަންނަ ރިޔާސީ އިންތިހާބުގައި ޑީއާރުޕީގެ ކެންޑިޑޭޓެއްގެ ގޮތުގައި މައުމޫނު ނުކުންނެވުމަށް ވެސް އުމަރުގެ ފެކްޝަނުން މައުމޫނަށް ދަންނަވާފައިވާނެ ކަމަށް އެ ފެކްޝަނުން ބުނެ އެވެ.
މިރޭ ރައީސް ނަޝީދު އިތުރަށް ވިދާޅުވީ އަރަބިއްޔާ ސްކޫލްގެ މައްސަލައަކީ ދީނީ މައްސަލައެއް ނޫން ކަމަށެވެ.
"އަރަބިއްޔާ ސްކޫލުގެ މައްސަލައަކީ ދީނީ މައްސަލައެއް ނޫން، އެއީ މާލޭގައި ބިން ބޭނުންކުރުމާ ގުޅޭ މައްސަލައެއް. އެ މައްސަލަ ނިންމަނީ ފަންނީ ގޮތުން. އެކަންކުރާ މީހުން ބުނާ ތަންތަނުގައި އަޅުގަނޑުމެން ފްލެޓު އަޅަމުންދާނީ. އެމީހުން ބުނާ ތަންތަނުގައި އަޅުގަނޑުމެން މަދަރުސާ ވެސް އަޅާނީ. މުޒާހަރާކޮށްފައި ބުނާ ތަންތަނަކުނޫން އަޅާނީ،" ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ މާލެ އަށް ދިމާވެފައިވާ މައްސަލަތައް ވެސް ހައްލުކޮށްދެއްވާނެ ކަަމަށެވެ. އަދި ކައުންސިލް އިންތިހާބަށް ކުރިމަތިލައްވާފައިވާ އެމްޑީޕީގެ ކެންޑިޑޭޓުންނަށް ވޯޓު ދެއްވުމަށް އެމަނިކުފާނު އެދިވަޑައިގެންނެވި އެވެ.
ސަރުކާރުގެ އިސްވެރިންނާއި ރައްޔިތުންގެ މަޖިލީހުގެ މެމްބަރުން ވެސް ބައިވެރިވަވޑައިގެންނެވި އެ ރަސްމިއްޔާތު ފެށީ 20 މިނިޓް ލަހުންނެވެ. އެއީ ޖަގަހައިގައި ދިއްލާފައިހުރި ލައިޓުތަކުގެ އައްޔަށް ޕަރުވާނާ އައިނެއް އައިސް ވަނުމުގެ ސަބަބުންނެވެ. އޭރު ރައީސް ނަޝީދު ވެސް އެ ތަނުގައި ހުންނެވި އެވެ.
ޕަރުވާނާ އައިނު ދިޔައީ ބޮކިތައް ނިއްވާފައި ބެހެއްޓުމުންނެވެ.
ވިއްސަކަށް މިނެޓު ވަންދަން ބޮކިތައް ނިއްވާލާފައި ބެހެއްޓުމަށް ފަހު އަލުން ދިއްލުމުން ކަރަންޓުގެ މައްސަލަތަކެއް ދިމާވެގެން ފެށުން އަނެއްކާ ވެސް ކުޑައިރުކޮޅަކަށް ލަސްވެގެން ދިޔަ އެވެ.