މިދިޔަ ބުރާސްފަތި ދުވަހުގެ ރޭ ޕީޕީއެމުން މާލޭގައި ބޭއްވި ޖަލްސާގައި، އެ ޕާޓީގެ އިންތިގާލީ ރައީސް މައުމޫން އަބްދުލް ގައްޔޫމް ދެއްކެވި ވާހަކަފުޅުގައި އިލެކްޝަންސް ކޮމިޝަނަށް ފާޑުވިދާޅުނުވާ ކަމަށާއި އެ ކޮމިޝަނަށް ނިސްބަތްވާ ގޮތަށް ވެސް އެމަނިކުފާނު އެއްޗެއް ވިދާޅުނުވާ ކަމަށް މައުމޫންގެ ތަރުޖަމާން މުހައްމަދު ހުސެއިން ޝަރީފު (މުންދު) މިއަދު ވިދާޅުވެއްޖެ އެވެ.
އާޓިފިޝަލް ބީޗް ސަރަހައްދުގައި ބޭއްވި ޖަލްސާގައި މައުމޫން ވިދާޅުވީ، އިންތިހާބުތަކުގެ ނަތީޖާ މިހާރު ނުކުންނަނީ ރައްޔިތުން ވޯޓުލާ ގޮތަށް ނޫން ކަމަށެވެ. އަދި އެއަށް ރައްދު ދެއްވައި އިލެކްޝަންސް ކޮމިޝަންގެ ރައީސް ފުއާދު ތައުފީގު އިއްޔެ ވިދާޅުވީ މައުމޫން އެގޮތަށް ވާހަކަ ދެއްކެވުމަކީ ސީރިއަސް މައްސަލައެއް ކަމަށެވެ. އަދި އެ ވާހަކަފުޅުގެ ސަބަބުން ކޮމިޝަންގެ އިތުބާރު ގެއްލޭ ކަމަށް ފުއާދު ވިދާޅުވި އެވެ.
ނަމަވެސް މައުމޫންގެ ތަރުޖަމާން ވިދާޅުވީ އިލެކްޝަންސް ކޮމިޝަންގެ އިހުލާސްތެރިކަމާ މެދު މައުމޫން ސުވާލު ނުއުފައްދަވާ ކަމަށެވެ. އަދި އިންތިހާބުތަކުގެ ނަތީޖާ މިހާރު ނުކުންނަނީ ރައްޔިތުން ވޯޓުލާ ގޮތަކަށް ނޫން ކަމަށް މައުމޫން އެ ވިދާޅުވީ ސަރުކާރަށް ނިސްބަތް ކުރައްވައި ކަމަށް ވެސް މުންދު ވިދާޅުވި އެވެ.
"އިންތިހާބުތަކާ ދިމާކޮށް ސަރުކާރުން ފޯރުވަމުންދާ ނުފޫޒުގެ ވާހަކަ ރައީސް މައުމޫން ދެއްކެވީ. ފުރަތަމަ ކަމަކަށް މިނިވަން އިންތިހާބެއް ބާއްވަން ބަލާއިރު އެމްއެންބީސީ އަކީ އެކަމަށް އޮތް ހުރަހެއް. ޕީޕީއެމް އިން ގަބޫލުކުރާ ގޮތަކީ އެއީ. ރައީސް މައުމޫން ހުންނަވައިގެން 2008 ވަނަ އަހަރު ރިޔާސީ އިންތިހާބު ބޭއްވިއިރު އޭރުގެ ޓީވީ މޯލްޑިވްސް މަސައްކަތް ކޮށްފައިވާނީ ވަރަށް މިނިވަންކޮށް. އިސްލާހީ ހެޔޮ ބަދަލުތަކުގެ ތެރެއިން އައި ބަދަލެއް އެއީ. އެކަމަކު މުހައްމަދު ނަޝީދު ވެރިކަމަށް ވަޑައިގެންނެވި ފަހުން އެއް ފިޔަވަޅު ކުރިއަށް ދިއުމުގެ ބަދަލުގައި މި ދިޔައީ ފަހަތަށް،" މުންދު ވިދާޅުވި އެވެ. "މުހައްމަދު ނަޝީދު އެ ގެންދަވަނީ ދައުލަތުގެ ހަރު މުދާތައް ވިއްކައި، ދައުލަތުގެ ވަސީލަތްތައް ބޭނުން ކުރައްވައިގެން ކެމްޕޭން ކުރައްވަމުން. އެ ނުފޫޒުގެ ވާހަކަ މި ދައްކަނީ."
އޭނާ ވިދާޅުވީ އިލެކްޝަންސްގައި ކުރިން ހުންނެވި މެމްބަރެއްގެ މައްޗަށް މިހާރު ވެސް ތުހުމަތުގެ އިނގިލި ދިއްކުރާއިރު، މިހާރުގެ ކޮމިޝަންގެ ބޮލުގައި ޕީޕީއެމުން އެ އިލްޒާމް ނާޅުވާ ކަމަށެވެ.
"މި ކަންތައްތަކަކީ އިލެކްޝަންސް ކޮމިޝަންގެ އިހުލާސްތެރިކަމާ ގުޅިފައިވާ ކަމެއް ނޫން. އެ ބޭފުޅުންގެ އިދާރީ އުނިކަމެއް ވެސް ނޫން. އެކަމަކު އަޅުގަނޑުމެންނަށް ސުވާލު އުފެދޭ އިލެކްޝަންސް ކޮމިޝަނާ ދޭތެރޭގައި ރައީސް މައުމޫން އެއްޗެއް ވިދާޅުވާއިރަށް ދެ ބަޔާން ނެރެ މާ ކަންތައް ބޮޑުވެގެން އުޅޭތީ،" ތަރުޖަމާން ވިދާޅުވި އެވެ.