ބ ކަމަދޫއަށް ދިމާވެފައިވާ ކަރަންޓުގެ މައްސަލަތައް ހައްލު ކުރުމަށް އެ ރަށަށް އިތުރު ޖެނެރޭޓަރެއް ގެންގޮސްފިއެވެ.
ކަމަދޫ ކައުންސިލްގެ ނައިބް ރައީސް އަލީ އިސްމާއީލު ވިދާޅުވި ގޮތުގައި އެ ރަށަށް މިއަދު ގެންގޮސްފައިވަނީ 180 ކިލޯ ވޯޓުގެ ޖަނެރޭޓަރެކެވެ. މި ޖަނެރޭޓަރު ކަމަދޫއަށް ގެންގޮސްފައިވަނީ އެ ރަށަށް ކަރަންޓު ދޭން ބޭނުންކުރާ 60 ވޯޓާއި 80 ވޯޓުގެ ޖަނެރޭޓަރުތަކަށް މައްސަލަ ދިމާވެފައިވާތީއެވެ.
ބ ކަމަދޫއިން މިދިޔަ އަންގާރަ ދުވަހު ކަރަންޓު ކެނޑުނުއިރު އެ ރަށަށް އަލުން ކަރަންޓު ދެވޭވަރު ވެފައިވަނީ މިދިޔަ ބުރާސްފަތި ދުވަހުގެ ރޭގަނޑުގެ ވަގުތެއްގައެވެ.
800 އެއްހާ މީހުން ދިރިއުޅެމުންދާ ބ.އަތޮޅު ކަމަދޫ އަކީ ކަރަންޓުގެ މައްސަލަ ވަރަށް ބޮޑަށް ކުރިމަތިވެފައިވާ ރަށެކެވެ. އަދި މި ކަމުގެ ސަބަބުން ރައްޔިތުންނަށް ދެވޭ އަސާސީ ހިދުމަތް ދިނުމަށް ގިނަ ދަތިތަކެއް ދިމާވަމުންދާ ކަމަށް މައުލޫމާތު ލިބެއެވެ.