19 ވަނަ ރައްޔިތުންގެ މަޖިލީހުގެ ހިތަދޫ އުތުރު ދާއިރާއަށް އިންތިހާބުވެވަޑައިގެންފައިވާ މެމްބަރު މުހައްމަދު އަސްލަމް މަޖިލީހުގެ ރައީސް ކަމަށް ކުރިމަތިނުލައްވަން ނިންމަވާފައިވާ ކަމަށް ބުނެ އޭނަގެ ނަމުގައި ދައުރުވަމުންދާ މެސެޖަކީ ފޭކު މެސެޖެއް ކަމަށް މެމްބަރު އަސްލަމް ވިދާޅުވެއްޖެއެވެ.
މެމްބަރު އަސްލަމުގެ ނަމުގައި ދައުރުވަމުންދާ މެސެޖުގައި ބުނެފައިވަނީ ރައީސް ނަޝީދުގެ އެދިވަޑައިގަތުމުގެ މަތިން ރައްޔިތުންގެ މަޖިލީހުގެ ރައީސް ކަމަށް ކުރިމަތިނުލެއްވުމަށް ނިންމަވާފައިވާ ކަމަށެވެ. އަދި މަޖިލީހުގެ ރައީސް ކަމަށް ވިލުފުށި ދާއިރާއަށް އިންތިޚާބުވެވަޑައިގެންފައިވާ ހަސަން އަފީފްއަށް ތާއިދު ކުރައްވަން ނިންމަވާފައިވާ ކަމަށްވެސް މެސެޖުގައިވެއެވެ.
މިކަމާއި ގުޅިގެން ވީނިއުސްއިން ދެންނެވި ސުވާލަކަށް ޖަވާބުދެއްވަމުން މެމްބަރު އަސްލަމް ވިދާޅުވީ އެއީ ފޭކު މެސެޖެއް ކަމަށާއި އެފަދަ މެސެޖެއް ނުކުރައްވާ ކަމަށެވެ.