ޕީޕީއެމްގެ ޕްރައިމަރީ ބާތިލުކޮށް ދިނުމަށް އެދި އުމަރު ނަސީރު ކުރެއްވި ދައުވާއާއި ގުޅިގެން މިއަދު ދަށު ކޯޓުން އިއްވި ހުކުމް އިސްތިއުނާފަށް ހުށަހަޅުއްވާނެ ކަމަށް އޭނާ ވިދާޅުވެއްޖެއެވެ. ސީއެންއެމަށް މައުލޫމާތު ދެއްވަމުން އުމަރު މިއަދު ވިދާޅުވީ އެމައްސަލަ އާދިއްތަ ދުވަހު ހައިކޯޓަށް ހުށަހަޅުއްވާނެ ކަމަށެވެ.
"މައްސަލައިގައި އެބަ ހުރި އިސްތިއުނާފު ކުރަން ޖެހޭ ކަންތައްތަކެއް، ހުކުމް ވެސް އިނގޭ ސިޔާސީ ޕާޓީތަކައި ބެހޭ ގަވާއިދާ ހިލާފަށް ވެސް ކަންތައްތަކެއް ކޮށްފައިވާ ކަން،" އުމަރު ވިދާޅުވިއެވެ.
ޕީޕިއެމްގެ ޕްރައިމަރީ ބާތިލުކޮށްދިނުމަށް އެދި އުމަރު ހުށަހެޅުއްވި މައްސަލާގައި ހުކުމު އިއްވާފައިވަނީ ބާތިލު ކުރަން ނުޖެހޭ ކަމަށެވެ. ހުކުމުގައި ބުނެފައިވަނީ ޕާޓީގެ ތެރޭގައި ފުރިހަމަ ކުރަން ޖެހޭ އިޖުރާއަތުތައް ފުރިހަމަކޮށްފައި ނުވާ ކަމަށާއި އުމަރު ތުހުމަތު ކުރެއްވި ކަންތައްތައް ސާބިތު ކުރެވޭ ވަރަށް ހެކި ހުށަހަޅާފައި ނުވާ ކަމަށެވެ.
ޕްރައިމަރީ ބާތިލުކޮށް ދިނުމަށް އުމަރު އެދިފައިވަނީ ޕްރައިމަރީގައި ޕާޓީގެ ދަފްތަރުގައި ނުހިމެނޭ ފަރާތްތަކަކަށް ވޯޓުދީފައިވާ ކަމަށް ބުނެއެވެ. ނަމަވެސް ޕީޕިއެމުންވަނީ އެކަން ދޮގުކޮށްފައެވެ.