ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ފަރާތުން ވާދަކުރާ ކެންޑިޑޭޓަށް ޓިކެޓް ދިނުމަށް ނިންމި ނިންމުން ބާޠިލުކޮށް، އެ ދާއިރާގެ ޕްރައިމަރީއެއް ބޭއްވުމަށް ނިންމައިފިއެވެ.
އެމްޑީޕީގެ އިންތިޚާބާއި ބެހޭ ކޮމިޓީގެ ފަރާތުން މިއަދު ވިދާޅުވީ، އެގޮތަށް ކަން ކުރުމަށް ނިންމީ ކުރިން ޕްރައިމަރީއަކާއި ނުލައި އެ ދާއިރާގެ ޓިކެޓް ލިބިވަޑައިގަތް ކެންޑިޑޭޓް އުބައިދުﷲ މުއާޒް އެމްޑީޕީއިން ކުރާ ކޯލްތަކަށް ޖަވާބު ނުދެއްވައި، މަޖިލީސް އިންތިޚަބުގެ ކެމްޕޭންގައި ނޫޅުއްވާތީ ކަމަށެވެ. އަދި އެ ނިންމުން ބާޠިލު ކުރީ ޕާޓީގެ ޗެއާރޕާސަން ލިޔުމުން އެ ކޮމިޓީއަށް އަންގަވާފައިވާތީ ކަމަށްވެސް އެ ކޮމިޓީގެ ފަރާތުން ވިދާޅުވިއެވެ.
އެމްޑީޕީއިން މިއަދު ނެރުނު ނޫސްބަޔާނެއްގައި ވަނީ، މި ދާއިރާއަށް ކުރިމަތިލުމަށް ޝައުޤުވެރިވާ ފަރާތްތަކުން، އެ ޕާޓީގެ ސައިޓުން އެޕްލިކޭޝަން ފޯމް ޑައުންލޯޑް ކުރުމަށްފަހު، ހުށަހަޅަންޖެހޭ ލިޔެކިޔުންތަކާއި އެކު މާދަމާގެ މެންދުރު 12:00 ގެ ކުރިން ހުށަހެޅުމަށް އެ ޕާޓީއިން އެދެއެވެ.
އަދި މި ދާއިރާގެ ޕްރައިމަރީއެއް ބާއްވަން ޖެހިއްޖެ ނަމަ، ބާއްވާނީ 7 ފެބްރުއަރީ ވާ ހުކުރު ދުވަހު ކަމަށް އެޕާޓީއިން ބުނެއެވެ.
އެ ޕާޓީއިން މަޖިލީހަށް ކުރިމަތިލާ 85 ދާއިރާގެ ތެރެއިން، ބައެއް މެމްބަރުންނަށް ޕްރައިމަރީއަކާއި ނުލައި ޓިކެޓް ދީފައިވާ އިރު، ގިނަ ދާއިރާތަކުގެ ޕްރައިމަރީ މިހާރު ވަނީ ނިންމާލާފައެވެ.