ކުރީގެ ރައީސް އަދި ޑީއާރްޕީގެ ޒައީމް މައުމޫން އަބްދުލް ގައްޔޫމް މޭލޭޝިޔާގައި ހުންނެވުމަށް ފަހު ރޭ ރާއްޖެ ވަޑައިގަތުމުން އެތަކެއް ސަތޭކަ ބަޔަކު ބޮޑު ފާލަން ދޮށަށް އެއްވެ ކީ މަރުހަބާއަށް އެމަނިކުފާނު ޝުކުރު އަދާކުރައްވައިފި އެވެ.ސެކްރެޓޭރިއެޓް އޮފް ފޯމާ ޕްރެޒިޑެންޓް އޮފީހުން ނެރުއްވި ސްޓޭޓްމެންޓެއްގައި ބުނެފައި ވަނީ "އަޅުގަނޑާއި ނަސްރީނާ ރޭ އެނބުރި މާލެ އައި ވަގުތު، އަޅުގަނޑުމެންނަށް މަރްޙަބާ ވިދާޅުވުމަށް ފާލަންދޮށަށް ވަޑައިގެންދެއްވި ދިވެހި އެންމެހާ ލޮބުވެތި އަޚުންނާއި އުޚްތުންނަށް ލޯތްބާއިއެކު، އަޅުގަނޑު ޝުކުރު ދަންނަވާ" ކަމަށެވެ.އެ ސްޓޭޓްމަންޓްގައި ޒައީމް މައުމޫން ވިދާޅުވެފައި ވަނީ ރަސްމީ ފާލަންދޮށަށް ރޭ ހާޒިރުވެތިއްބެވި ރައްޔިތުންގެ އަދަދު ފެނުމުން، އެމަނިކުފާނަށް ވަރަށް ބޮޑު އުފަލެއް އިހުސާސް ކުރެއްވުނު ކަމަށެވެ. އަދި ވިދާޅުވެފައި ވަނީ ފާލަންދޮށަށް ނުދެވުނު މީހުންގެ ތެރެއިން  ވެސް އެތައް ބަޔަކު ފޯނާއި މެސެޖް މެދުވެރިކޮށް އެމަނިކުފާނަށް މަރުހަބާ ކިޔާފައިވާ ކަމަށެވެ."... ވީމާ، ރާއްޖޭގެ އެކި ކަންކޮޅުތަކުގައި ތިއްބެވި ޑީއާރުޕީގެ ލޮބުވެތި މެންބަރުންނާއި އަޅުގަނޑަށް ހެޔޮ އެދިވަޑައިގަންނަވާ އެންމެހާ ލޮބުވެތި ރައްޔިތުންނަށްވެސް މިފުރުޞަތުގައި ޝުކުރު ދަންނަވަމެވެ." ސްޓޭޓްމަންޓްގައި ވެއެވެ.ކުރީގެ ރައީސް ވިދާޅުވީ އެމަނިކުފާނު މާލެ ވަޑައިގަތް އިރު ގައުމީ ދިފާއީ ބާރާއި ފުލުހުން ވަރަށް ފުރިހަމަ ގޮތެއްގައި ސަލާމަތީ ކަންތައްތައް ހަމަޖައްސައިފައިވާ ކަމަށާއި އެކަމަށްޓަކައި ސިފައިނާއި ފުލުހުންގެ އިސް އޮފިސަރުންނަށް ޝުކުރު ދަންނަވާ ކަމަށެވެ.މައުމޫންގެ ސްޓޭޓްމަންޓްގައި އާ އަހަރުގެ ތަހުނިޔާ އެންމެނަށް ދަންނަވާފައި ވެއެވެ.