ލިޔުނީ: އާދަމް ނަވާޒް
އުމަރު ނަސީރުގެ ނަން ދިވެހިންގެ ދުލުކުރިއަށް އަންނަން ފެށީ ރާއްޖޭގައި ސިޔާސީ ޕާޓީ އުފެދެން ފެށި ހިސާބުންނެވެ.
އައިޑީޕީގެ ނަމުގައި ޕާޓީއެއް ހައްދަވައިގެން އުމަރު މައުމޫނުގެ ސަރުކާރާއި ދެކޮޅަށް ވަރުގަދަ ހަރަކާތްތަކެއް ހިންގެވިއެވެ. މާލޭގައި ހުރި މަސާޖް ޕާލާތައް ބަންދުކުރަން އުމަރު އިސްވެ ހުންނަވައިގެން މުޒާހަރާކުރިއެވެ. ބަނޑުހައި ހޫނުކަމުގެ ހަޅުތާލު ހައްދަވާ ސަރުކާރުގެ ސަމާލުކަމަށް ކަންކަން ގެންނެވުމުގައި އުމަރު ކާމިޔާބުތަކެއް ހޯއްދެވިއެވެ.
މައުމޫނު ވެރިކަމުގައި ހުންނެވިއިރު އުމަރަކީ މައުމޫނަށް ފާޑުކިއުމުގައި އޭރު އެންމެ ދޫ ހެލޭ އެއްބޭފުޅާއެވެ. 2008 ވަނަ އަހަރުގެ ރިއާސީ އިންތިހާބަށް ނިކުމެ މައުމޫނާއި ވާދާކޮށް އުމަރަށް 2472 ވޯޓް ލިބުމުން ވެސް ރައްޔިތުންގެ ތާއިދު އުމަރަށް ނެއްކަމަކަށް އުމަރު ގަބޫލެއް ނުކުރެއްވެވިއެވެ.
އަލަށް އުފެދުނު ރައީސް ނަޝީދުގެ ސަރުކާރު ވެސް އުމަރަކަށް ކަމަކު ނުދިޔައެވެ. ނަޝީދުގެ ސަރުކާރާއި ދެކޮޅަށް ފެށި ހަރަކާތް ފުޅާވެ އުމަރު, އުމަރުގެ ޕާޓީ "އުވާލުމަށް" ފަހު ޑީއާރްޕީއާއި ގުޅިވަޑައިގަތެވެ. ކުޑަ އޮޑިއެއްގައި ނިކުމެ ސަރުކާރު ޒިންމާ ދާރު ނުކުރެވޭނެ ކަމަށާއި ސަރުކާރު ޒިންމާދާރު ކުރުވަން ބޮޑު އޮޑިއެއް ބޭނުންވާކަމަށް ވިދާޅުވެ އުމަރު ޑީއާރުޕީއަށް ވަޑައިގަތީއެވެ.
އެއާއި އެކު މައުމޫނަށް އުމަރު ކީ ފާޑުކިއުން ތައުރީފާއި ސަނާއަށް ބަދަލުވެގެން ދިޔައީއެވެ.
އުމަރާއި އެކު ޑީއާރްޕީގެ ހަމަހިމޭން ބަސްމަދު ސިޔާސަތު ބަދަލުވެގެން ދާނެކަމަށް ލަފާކުރެވުނެވެ. ނަމަވެސް ފެނިގެން ދިޔަ މަންޒަރަކީ އުމަރާއި އެކު ޑީއާރްޕީގެ ތެރޭގައި ކުނިޖެހެން ފެށި މަންޒަރެވެ. ޕާޓީގެ ލީޑަރަށް ވުރެ މަތީގައި އުމަރު ހުންނަވަން ފެށުމުން ޕާޓިގެ ލީޑަރޝިޕަށް އެކަން ހަޖަމެއް ނުވިއެވެ.
ލީޑާރޝިޕަރ ކައުންސިލަށް މަޖުބޫރުވީ އުމަރު ޑީއާރްޕީން ބޭރު ކުރާށެވެ. ނަމަވެސް އުމަރު ޑީއާރްޕީން ބޭރުކޮއްލުން މައުމޫނަކަށް ހަޖަމް ކުރައްވަވަން ފަސޭހަފުޅެއް ނުވިއެވެ. އުމަރާއި ދެކޮޅަށް އެޅި ފިޔަވަޅާއި އެކު ރައީސް މައުމޫން އުމަރުގެ ދިފާއުގައި ނިކުމެވަޑައިގަތެވެ. އަނދަމުންދިޔަ ހުޅުގަނޑު ނިއްވާލުމުގައި ރައީސް މައުމޫނަކަށް ވެސް ކާމިޔާބެއް ނުހޯދުނެވެ.
ނަތީޖާއަކަށްވީ އުމަރަށް ޑީއާރުޕީގެ ތެރެއިން ފުރުސަތު ނެތުމުން ރައީސް މައުމޫނާއި އެމަނިކުފާނަށް ވާގިވެރިވާ ސަޕޯޓަރުންނާއި އެކު ނިކުންނަވާ އަނެއްކާ ވެސް އާ ސިޔާސީ ޕާޓީއެއް ހެއްދެވުމެވެ.
މައުމޫން އާސިޔާސީ ޕާޓީއެއް ހެއްދެވުމަށް އެންމެ ބޮޑަށް ބާރުއެޅުއްވެވި އެއްބޭފުޅަކީ އުމަރެވެ. މިއީ އުމަރުގެ ހިތުގައި ފޮރުވިފައި އޮތް އެޖެންޑާއެއް ފުރިހަމަ ކުރަން އުމަރު ކުރެއްވެވި ކަމަކަށް ނުވާނެ ބާވައެވެ. މައުމޫން ޑީއާރުޕީ ދޫކުރައްވަވާފަ ނިކުންނެވިއިރު ޑީއާރުޕީގައި ތިރީސް ހާހަށްވުރެ ގިނަ މެންބަރުން ތިއްބެވިއެވެ. ރައްޔިތުންގެ މަޖިލީހުގެ މެޖޯރިޓީ އޮތީ ޑީއާރުޕީ އާއި ޕީއޭ ކޯލިޝަނަށެވެ.
އެދުވަހު ޑީއާރުޕީ އޮތް ގޮތައް އޮތް ނަމަ މިއަދު ގައިމުވެސް ހަމައެކަނި މެންބަރުންގެ އަދަދަށް ބެލިނަމަ ވެސް އެމްޑީޕީއާއި ވާދަކުރެވޭ ވަރަށް މެންބަރުން ތިބޭނެއެވެ. ވަރުގަދަ ޕާލަމެންޓުރީ ގުރޫޕެއް އޮންނާނެއެވެ. ނަތީޖާއަކަށް ވެފައި އޮންނާނީ ޑީއާރުޕީގެ ނުފޫޒު ސިޔާސީ މައިދާނުގައި މިހާރު ޕީޕީއެމްގެ ނުފޫޒު އޮތް ވަރަށް ވުރެ މާވަރުގަދަ އަށް އޮތުމެވެ.
ޑީއާރުޕީ ކުރިން އޮތް ގޮތައް އޮތް ނަމަ މިއަހަރު ބާއްވާ ރިޔާސީ އިންތިހާބު ޑީއާރުޕީގެ ކެނޑިޑޭޓް ފަސޭހަ ކަމާއިއެކު ކާމިޔާބު ކުރާނެކަމަށް ލަފާކުރެވެއެވެ. އެހެންކަމުން އުމަރު ބޭނުންވީ މައުމޫނުގެ ވަރުގަދަ ނުފޫޒެއް އޮތް ބޭފުޅަކަށް ވެރިކަމަށް އައުމުގެ ފުރުސަތު ނައްތާލާށެވެ.
އޭރު މައުމޫނާއި ޑީއާރުޕީގެ ލީޑަރު ތަސްމީން އަލީއާއި ދެމެދު ކުރެވެމުންދިޔަ ސިޔާސީ ހަނގުރާމަ މައުމޫނަށް ކާމިޔާބު ވުމުގެ ކުރިން އަމާންދީ ޑީއާރުޕީއާއި ފެއަށް މައުމޫނު ގެންދެވުމަށް އުމަރު މަސަކަތްކުރީ ޑީއާރުޕީގެ އަސާސީ ގަވައިދު އިސްލާހުކޮށް ރިޔާސީ ޕުރައިމަރީއެއް ޑީއާރުޕީގައި ބާއްވާފާނެތީއެވެ. ޑީއާރުޕީގެ ތެރޭގައި އޭރު އޮތް މަންޒަރަށް ބަލާއިރު ތަސްމީން އަލީއާއި އަބުދުﷲ ޔާމިނާއި ވާދަކޮށް އުމަރަށް ރިޔާސީ ޓިކެޓް ނުލިބޭނެކަން އުމަރަށް އެނގިވަޑައިގަންނަވައެވެ.
މިހާރު އުމަރުގެ ކެންޕޭންގައި މައުމޫނުގެ ފޮޓޯފުޅެއް ބަހައްޓާ މައުމޫނަށް ސަނާކިއުމުގައި އުމަރުގެ ހުރިހައި ވަގުތެއް ހޭދަކުރަމުން ދިޔަ ނަމަވެސް އުމަރަކީ މައުމޫނަށް ހަގީގަތުގައި ވެސް ހެޔޮއެދިވަޑައިގަންނަވާ ބޭފުޅެއްކަމާއިމެދު ޝައްކުކުރުމުގެ ޖާގަ އެބައޮތެވެ. އުމަރު މިހާރު އުމަރަކީ މައުމޫނަށް "ތާއީދު" ކުރާ ބޭފުޅެއްކަން ސާބިތު ކޮއްދެއްވަން މަސައްކަތްކުރަނީ ޕީޕީއެމްގެ ތެރެއިން އެއްވެސް ކަމެއް ކާމިޔާބު ކުރަން ބޭނުންނަމަ މައުމޫނަށް ހެޔޮ އެދިގެން ވާހަކަ ދައްކަން ޖެހޭތީއެވެ.
ޕީޕީއެމްގެ އެކުޓިވިސްޓުންގެ ތާއިދު އުމަރަށް އެބައޮތެވެ. އެކަމަކާއި ޝައްކުކުރާނެ ޖާގައެއް ވެސް ނެތެވެ. ރިޔާސީ ޕުރައިމަރީގެ ފޯރި ގަދަވެ ދެބޭފުޅުންނަށް ވެސް އިންތިހާބު ކާމިޔާބު ކުރުމުގެ ހަމަހަމަ ފުރުސަތެއް އޮތް އިރު މިއަދު ޕީޕީއެމްގެ މެންބަރުން ނިންމަވަން ޖެހޭ ނިންމުމަކީ ޕީޕީއެމް މެންބަރުން ބޭނުން ވަނީ ރައީސް މައުމޫނުގެ ސިޔާސަތު އެގޮތުގައި ދަމަހައްޓާނެ ބޭފުޅެއްތޯ ނުވަތަ ނޫންތޯއެވެ.
އުމަރަކީ ހަގީގަތުގައި ވެސް ރައީސް މައުމޫނަށް ހެޔޮ އެދިވަޑައިގަންނަވާ ބޭފުޅެއްތޯ މިއަދު ޕީޕީއެމްގެ ކޮންމެ މެންބަރަކު ވެސް އަމިއްލަ ނަފްސާ ސުވާލު ކުރަން އެބަޖެހެއެވެ. ޕީޕީއެމްގެ ޕުރައިމަރީ އަކީ އަބުދުއްﷲ ޔާމިނާއި އުމަރު ނަސީރާއި ދެމެދުގައި ކުރިއަށްދާ އިންތިހާބެއްތޯ ނުވަތަ ރައީސް މައުމޫނާއި އުމަރު ނަސީރާއި ދެމެދު ކުރިއަށްދާ އިންތިހާބެއްތޯ ފެންނަ މަންޒަރު ތަކަށް ބަލާފަ ނިންމަން ތިބި ބަޔަކީ ޕީޕީއެމްގެ އާންމު މެންބަރުންނެވެ.
ރައީސް މައުމޫނުގެ ވެރިކަން ވައްޓާލަން މީގެ އަށެއްކަ އަހަރު ކުރިން ނިކުތް އުމަރު ނަސީރު މިއަދު އެވަނީ ރައީސް މައުމޫނާއި އެމަނިކުފާނުގެ ސިޔާސަތު މިގައުމުން ފޮހެލުމުގެ ފަހު މަރުހަލާއަށް ނިކުމެފައެވެ. އެކަން އެގޮތައް ކުރަން ބޭނުންނަމަ ޕީޕީއެމްގެ މެންބަރުން އުމަރު ނަސީރަށް ވޯޓް ދެއްވާށެވެ.